Oh! Mess Bisson!
Mais dites mé don,
Quand est-qu'ou s'sez logique
A la Nouvelle Chronique?
N'y'avait rein qu'huit jours l'autr' Samedi
Qu'ou vos abûziètes à slachi
A tigue de corps sus l's'autr' gazettes
Parce qu'ils impriment de p'tites sornettes
Pus tôt que d'vos conter tréjous
Le même bavin - que j's'avons tous.
Et pis anniet
Tch'est qu'ch'est que j'lièt
Dans la même gazette qui s'motchait
D'la grosse groèzille, du serpent d'mé,
D'la poule à deux têtes, d'la grosse grille; -
Qu'app'lait ch'la d's'histoèthes à vieille fille;
Tchi riat d'la "Saison des Sottises"
Et traitait tout chonna d'bêtises??
- "Que nou peut vaie dans votr' boutique
Du grain d'Espagne qu'est unique!"
D'même, s'ou z'aidghis
Par vos êcrits,
A condamner - chein qu'ou bliaumez;
Ch'est vous-même qui vos démentez
En nos montrant sus votr' compteux
Tout chein qu'est drôle, rare, ou tchuthieux
....................
Montrez, montrez, ch'la vaudra mus
Que d'continuer à crier sus
Les pouorres baloques qui font comme vous
Et cherchent à nos abûser tous!
Mais votre articl'ye nos disait
De n'craithe pas tout chein qu'nou liésait:
Que l'grain d'Espagne à Mess Durell
S'sait, comme ou dites, sans parallèl';
Je n'veurs pas l'craithe sans l'aver veu,
Car d'après vous je somme achteu
En plienne Saison d'Sottises.
Elie
|
