Ch'n'est pas tout pliaisi que d'êcrithe
D'la prose ou des vers amusants
Quand nou' n'a pon du tout l'tcheu' d'rithe
Et qu'nou'-z'enrage de mal-es-dents.
Et quand nou souffre dans la tête,
Ou qu'nou'-z'a des bibets dans l's'yeux,
Criyous que ch'est autchun'ment fête
D'êcrithe un tas de tchi tchuthieux?
Ah nan! j'vos l'dis, j'en sais tchic-chose,
- Bein qu'j'en pâle assez humbl'yement -
Rêjouir tout l'monde avec sa prose
- Sans pâler d'vers! - Ch'est bouffl'yement
Difficile et quand nou'-z'y'êprouve
Nou'-z'a pus l'tcheu que d'trill'yi tout:
Nou' veurt des mots qu'jamais nou' n'trouve
Et nou les cherche en vain partout!
J'tais d'même annièt, j'avais bieau faithe
Je n'valais rein en prose ou vers;
Pus bête occouo qu'd'amor faut craithe,
Je n'pouvais rimer que d'travers.
Quand tout d'un coup, j'ouï dithe: "Attrappe."
J'dréchi la tête et craithêt'ous
Qu'ne v'lo sus man papi deux grappes
De bieau vergus, couleu' de v'lous!
J'vos en rêponds ch'en'-tait deux belles,
Crues en pliain air à Saint-Cliément. -
Tout l'personnel de la Nouvelle
Vos r'mercie, amin, d'votr' "Colman!"
I' f'thaient, je n'sais tchi pour vos pliaithe!
Et mé, je n'pouorrais pas m'montrer
Trop r'counnaissant; je n'savais dghéthe,
Annièt, sus tchi sujet rimer!!
Elie
|
