|
J'ai eune amie où'est qu'j'vais souvent, Eune seule fille auvec trais grands fréthes, Ah, la pouorre garçe - qu'oulle est à pliaindre! Tch'est qu'sa vie est, ou n'pens'rêtes dgéthe, Au mains qu'ous avez p't-être, comme lyi, Ieu la mal-chance d'aver des fréthes! I' la ramâssent comme eune escliave, Ches trais apaûtres, et craient qu'ou n a Rein d'autre à faithe, chutte malheutheuse, Qué les sèrvi à pid, à ch'va! Et si parchance ou trouve à r'dithe I' groumâchent tous et lî chantent ma. Lus péthe étout ne vaut pas mus. Faut lî netti bottes et souliers, Chèrchi chenne-chin, ramasser ch'la, Erléver les choses qu'i' laîsse tchaie; Jé crai qu'i' crév'thait d'sé pûtôt Qué d'sé vèrser eune tassée d'thée!! "Tel péthe tel fis" est l'vièr diton, Et danme, ichîn i' s'applyique bein! Tch'est qu'i' f'thaient, j'mé d'mande, sans la méthe Et la fille à lus t'nîn la main? Si j'tais lus soeur mé, j'fich'rais l'camp! V'la tchi les sèrvithait danme bein! I' n'pathaîssent pon lus prêssi trop D'chèrchi eune fille et d'lus mathier; I' veulent sans doute tchique pouorre moumie Prete à dithe ouï et l's êcouter. Et quant à mé, j'espéthe, valet, Qu'il' aient d'la peine à en trouver! Es méthes partout j'dis, êcoutez L'cri des hardelles qui vos supplient! - Né poulottez pas vos garçons! Pensez en nous, don, j'vos en prie, N'condaumnez pas à l 'escliavage La fille qui mathiêtha votre fis! A.L.P. |
Viyiz étout: