L'autre jour j'tais jutchie sus l'desk au Boss
L'autre jour j'tais jutchie sus l'desk au Boss a grignoter une p'tite galette qu'il avait laissi tchais de sa pouchette en déhallant san moucheux, quant j'ouï une Missis à lunettes s'faithe : Est-che Marie Hibou qu'est v'nue traithe les vacques du bord de siez Elie des Fontaines, pas bé-lièn du vièr Chaté ?
Quand j'ouï chunna, j'failli tchais de mon jutcheux sus l'biau capé à chutte Missis. Pour seur que nennin, ch'n'est pas mé qui voudrait faithe dithèt tricks. Et pis viyou, Missis, tchès que j'f'rais de deux ou trais pots de lait. Ch'n'est pon amathé autouor d'man cô que j'pouorrais l'porter dans ma niche pour en faithe un poddin d'riz !
***
Dans la paraisse iou qui s'en vont aver un nouviau boss avec une belle tunette blianche à saluette, coumme un Captaine, j'alli faithe une p'tite touornaie l'autre Dimanche l'arlevée et bé seur j'en ouï a l'entouore du grand plaisi qu'ieun des vièrs de chutte paraisse fit siez li quand y dit à ses gens iou qu'il 'tait alle s'proumener.
Marie Hibou tais ta becque, et n't'en va pas raconter pourtchi que l'grand homme du pays des montagnes d'mande tréjous iou que sont les ptits barils quant y commence sa vainée d'patates a porter sus l'bridge !!
***
Dans la paraisse que l'fossi d'mandi, il y a tchique temps, a aver les gages hautchi et iou que Moussieu l'Recteur fit la r'merque que ses gages a li n'avaient pon était hautchi en tout, chein qui fit dithe au fossi que Moussieu l'Recteur n'avais pas besoin d'acater de pelle pour gagni ses gages (!) dans chutte paraisse la p'tite band n'est pu en tune du tout.
La p'tite fliute suffle : Wha't the use of worying, le p'tit tambour li répond en plieurant comme grêle chu une tine viède et l'grand tambour n'a que de boster avec chès boom boum d'colère qui font trembliai touout Morville !
Et tout chunna parceque l'Union a mins la désunion !!
Marie Hibou
12/6/1920
Viyiz étout: