M'v'chein encouore une fais à bailler de ma becque. Ch'est que j'voudrais vos raconter une p'tite scène qui s'passi l'autre Dimanche dans ieunne des paraisses de l'Est et chunna est la pure vérithèt, fouai de Marie Hibou.

Donc chu Dimanche là devait y avèr service à trais heuthes de r'levée dans la petite chapelle... située tchique bord en Jerri. Dans tchi paraisse? Tchès que chunna peut vous faithe oprès touot.

D'ver un quart de trais, ieun des siens de la congrégation arrive et attendi, chein qui prouve que ch'est un homme qui comprend son devoir et qui n'aime pon arriver au mitan du service couomme il y en a bé d'trop qui ont fait quassiment une mauvaise habitude.

Oprès tchiques minutes d'autres arrivites à lus touor y comprins l'organiste et les siens du quyire et la porte lus fut ouverte.

Trais heuthes sonnites mais nous attendait tréjous l'sien qui d'vait faithe l'service religieux. L'organiste couommençait à s'énerver, les autres d'visaient, le sien en chèrge de la chapelle allait et v'nait d'un bord et d'lautre mais Moussieu n'arrivait pon. Tchès qui ly était arrivé. Ch'est qu'avec chest motorbikes nous n'es jamais en sureté de sa vie.

Ieun des grands de la congrégation déshalli sa montre et s'fit qu'il tait trais heuthes un quart. D'autres déshallites éttouot lus montre mais nous n'était pus d'accord car la sienne à Phlip n'faisait que trais heuthes chinq tandis que la sienne à John faisait trais heuthes vingt. Et touos nos gens étaient seurs que ch'tait la montre du vaisin qui n'allait pon assez vite ou trop vite.

Nous s'mins à dischutter pendant tchiques minutes, espèrant tréjous vais arriver l'sien qu'nous attendait.

A force d'attendre et d'être couomme soeur Anne de Barbebleue qui n'voyait rein v'nir nos gens commencites à lus impatienter. Ieun s'fit qu'il n'attendait pon pus tard que trais heuthes vingt chinq. D'autres dirent amen à chutte r'merque et enfin y fut décidé d'même mais achteu la tchestion était de saver tchi montre marquait la buanne heuthe. Heureusement, parmi les siens troupés à d'viser s'trouvit un nouviau Salomon qui s'fit que pouorre s'mettre d'accord nous sen irait chacun siez sé dès que la montre la pus en r'tard marquerait trais heuthes vingt chinq. Et les montres furent encouore une fais déshallées et quant vint l'temps dit nos gens rentrites siez ieux car de service religieux il n'y ieut pon d'pis que l'sien en chèrge n's'présenti pon et les souos pouor la collecte restites dans les pouchettes.