L'incident des Mintchiers otchupant tout chu temps l'intéthêt du public, je pensi que les lecteurs des Chroniques aimethaient à aver de l'information authentique sus la position et de suggéri au Chef que not'e journal ne dev'thai pas laissi l'Evening Post monopoliser les entreveues avec les interêssés.
“Tch'est qu'tu veues dithe par chenna?” i'me d'mandi.
“Eh bain, pourtchi pas noliser un baté et m'y envier mé, interviewer les pêtcheurs et même Mons. Leroux li-même. Je connais la Maîtresse Ile comme je connais le Vier Marchi et un résumé d'la position dans “Les Chroniques” signé par le Caouain pouorrait résulter dans la vente de p't'-être chinq mille numéthos de not'e gâzette dans toutes les parties de la France.”
Mais l'Chef n'est pas bisnesse, i'n'vait pas pus liain que l'but d'san nez et toutes les fais que j'li fais une suggestion pratique, i' la r'pousse immédiatement et s'imagine que j'ai tréjous tchique motif ou tchique intéthêt personnel.
Et ch'a 'té d'même dans chu cas ichin.
“Oh, oh, Caouain!” qu'i'm'dit, “je vai bain tchest que'tu cherches. Tu voudrais faithe une extchursion à bouan marchi ès frais des Chroniques et aller passer un jour ou deux ès Mintchiers à mangi du homard, d'la chervette et des crabes-à-co, mais che n'est pas oquo pour chute feis, man vi, l'affaithe est entre les mains de l'Evening Post et nos lecteurs es'sont obligis de lus contenter d'une traduction des renseignements fournis par notre estimablye confrère.”
V'là don, mes chiers lecteurs, le sorte d'homme que j'avons pour condithe les destinées des Chroniques!
Mais si l'Caouain fut empêchi d'aller ès Mintchiers, i'put interviewer iun des pêtcheurs tout-d'même.
Jeudi matin Maît'e Tom Merlespit de la Rocque vint à la boutique pour un patchèt d'enveloppes et opprès que j'l'eu servi, je li d'mandi, “allous oquo ès Mintchiers, Maît'e Tom, avec vot'e baté?”
“Mais oui, je sis là à peu près tout l'temps dans chute saison ichin!”
Et bain tch'est qu'en est pour chu moussieu français-là qu'est à y bâti une maison? Ou n'avez pas peu l'empêchi don de faithe une patheille bêtisse?”
“Ah dame!” se fît l'bouanhomme, l'empêchi comment? Je li dîmes qu'i' n'en avait pas l'drouait, que j'étions là sus la pâraisse de Grouville et qu'i' n'pouvait pas bâti une maison sans la permission du Connaîtablye et du Comité des C'mins. Mais i'n'vouli pas nos êcouter. I' nos dit que toute la permission qui l'concernait était dans sa pouchette et avait 'te obtenue des autorités compétentes.
J'ai passé ma vie là-bas mé sa presti et man pèthe et man grand-pèthe devant mé, et j'avons tréjous comprins que les Mintchiers formaient partie d'Jerri. Ou pouvez bain penser que v'là tchi nos faisait chose de vaie un êtrangi v'nin accapather not'e terrain comme chenna, nous qu'avons tréjous 'té gaillards qui n'aithaient pas té aisiement êffrités, i'y avait deux d'ches machons-là qu'aithaient peu facilement nos fendre la tête avec lus truelles.”
“Oh! Maît'e Tom,” je li dis, “je n'veur pas dithe pour un moment qu'il aithait fallu aver recours à la forche, chenna aithait entraîné de sérieuses complications entre les deux gouvernements, mais selon man point d'veue à mé, i'y avait un moyen bain simplye, et autchun d'entre vous qui y aithait pensé, pouvait arrêter, séance tenante, auchuns travaux, et gare au sien qu'aithait osé de mettre deux pierres l'une sus l'autre.”
“Et tchi moyen est chenna, mon doux?”
“Eh bain, pardi, ou n'aviez qu'à l'ver la “Clameur de Haro!” en vos agenouollant sus l'rotchi et crier à hauteur de vouaix, “Haro, Haro! A l'aide mon Prince, on me fait tort!”
Et pas un seul coup d'truelle aithait peu être donné devant qu'la Cour aithait visité les lieux et rendu san jugement.”
“Ous avez raison,” se fit Maît'e Tom, “ch'est drôle que pas iun d'nous y pensi.
Je m'en r'vais là-bas Lundi matin et je m'en vais dithe à nos garçons tch'est que l'Caouain m'a dit, et s'ils en sont d'avis et qu'i' n'est pas trop tard, v'là justement tch'est qu'j'allons faithe.”
Maît'e Tom sorti d'la boutique tout radieux de penser qu'il avait trouvé une solution du problème, mais au but de chinq minutes i' rentri et m'dit comme chenna, “Caouain, ch'est raique acheteu que v'là qui m'a frappé, mais i'm'semblye d'aver oui que des Clameurs de Haro, des Transports de Justice et toutes sortes d'fanfaronnades comme chenna entraînent une masse de frais. J'ai pensé que si la Cour et touos les administrés qu'en dêpendent vainnent visiter la Maîtresse Ile, che n'est pas le pouore petit “Duc de Normandie” qui peut les transporter, i' faudrait noliser au mains, la “Princess Ena,” et chenna ajouôté ès frais des Avocats, Ecrivains, Vicomtes, Protchutheurs et ainsi d'suite se ramont'ta à une somme fabuleuse.
Un supposé que l'jugement îthait contre nous tch'est qui s'en va payi tout chenna?”
“Bah, bah,” j'li dis, “ne vos en faites pas, je connais touos ches messieux-là, mé, et i'f'thont tout chenna grâtis, par pur patriotisme et n'vos chergethont pas un sou.”
Mais pour montrer qu'ou n'êtes pas tout-à-fait des ingrats - ch'est des gars qui peuvent apprécier un fricot d'paisson - bailliz lu châtchun un homard."
Caouain
1929
Viyiz étout: