Les Pages Jèrriaises

Honni soit qui mal y pense

Honni soit qui mal y pense

M'v'chin encouore une fais à bailler d'ma becque et à écrithe un tas de gnollin, coumme s'fait l'buanhomme, pour mettre sus la gazette.

Pus d'une fais j'ai ouï dithe : Si Marie Hibou savait chunna oulle en mettrait un but sus la gazette. Pour en dithe la vérithèt, fouai de Marie Hibou, il y a bé des choses que j'sais mais que j'aime mus garder à man tout seu car mé, si j'sis un mio picagneresse j'n'aime pas animer l'esprits.

Criyous èttout que je m'otchuppe des élections pour pliaithe à un bord pus que d'l'autre ? Pour seur que nennin car quant à mé j'sis couomme Jean Le Bas je ne m'en mêle pas.

J'aime tréjous une bordaie d'fun et n'v'la pourtchi qu'annièth j'sis bein contente d'ver que m'n'amin Raymond a encouore une fais mis tout à feu dans sa paraisse.

Quand n'ou n'est pon fort y faut être ruzai et pour seur Raymond a tout tchulbuté.

Au meeting, Mardi au sé, quand y s'levi coumme un épars d'feu et monti sus la strade nos gens, d'l'autre bord, s'démandaient tchès qui s'en allé proposé.

Nous avait fait couort l'brit qui s'n'allaient proposé l'buanhomme Phlip mais quand nos gens entendites l'papi d'nomination et que Raymond proposi l'vier Chantgni Jim, tchi qui pendais l'nais !

Pour un buan trick chunna fut un buan trick car nos gens d'l'autre bord n'en savaient rein et chunna les a tous tchulbultés.

Comme s'faisait Raymond oprès l'meeting : J'avons deux candidats ; j'sommes seur d'en aver ieun d'dans !! Pour seur, pour penser d'même y faut aver pus d'chervé qu'une scabelle !

Me j'reste ès ecoutes dans chutte paraisse car pour seur y s'en va y aver une bordaie d'fun mais j'n'crais pas que Raymond s'en va faithe la paraisse avec la véthute a Mess Boucheré chutte fais. Je gagerais bein ieunne de mes plus belles plieumes qu'il n'aura pas les souliers crottés l'matin d'l'élection comme l'autre fais.

A bétôt, Raymond.

***

Dans la paraisse a man biau cliochi l'siens qu'aiment l'buan cidre pourront en uver du raide buan et à buan marchi d'vant la St.-Jean tchi vint.

Ver, d'pis que John Ernest, l'sien de la Commune, s'ra proposé pour Chantgni, fouai de Marie Hibou, et j'sis seur qu'y s'fra un pliaisi de douenner une fais de buan cidre ès siens qui aiment bain l'jus d'la pomme qui, couomme nou l'dit dans le chanson, guerit de touote maladie.

George èttout s'ra proposè mais tchès qu'en s'ra pour Nicholas ? !

***

Diantre sé, n'v'la Sieur Caouain, qui rentre et les vaissiaux sont encouore sus la table. Y's'en va y aver du feu de satchi et un divers ‘row.

N'v'la qui n'fais rein car y n'porte pas les braies a san tout seu, mais ch'est un drôle d'ouaisé et quand y m'vais mârie y n'rêpon pon ès nice compliéments que j'lis dit à ce chièr et doux canard de souaie!!

***

Dans ma brouaite a lettre – tchique fais nou m'écrit, - n'v'chein que j'trouvi hier au matin :

Ma Chière Marie – Veur tu mettre sus la gazette ma p'tite touennée, qu'é j'fis Mardi au sé, et j'en s'rait bein erconnaissant :

Y faut vous dithe que j'avais ouï qui s'en allé y avé une grande bordée à St.-Jean, et j'mé m'ensipi d'allé veis si j'pourrais trouvé un mio d'jibi pour man souper car n'ou m'avait dit qui y'en avait tout plein dans ces parages là.

J'arrivi là juste en temps quand la salle paroissiale fut ouverte et j'ergardi bein que personne ne me visse entré. J'fut me juchit sus la portrait de l'Avocat Le Sueur et je pensi que je ouïrez tout le tintamare qui s'en allé y avait. Le Recteur et le Connétable firent lus entrée et s'assiévirent à la table. N'vla deuxtreis messieurs qu'arrivent et s'assièvent en d'vant y distchutaient ;

Joe et Raymond firent lus entrée, et s'assievites en d'vant étout. Le monde arrivait par douzaines, et y'un s'fit, tchest qu'est la haut juchit. Nous l'y réponnit : C'hest un épeuthas pour esfritai les moque pour qui n'touche pon au portait. Mé j't'ais tout agrouflié ne disait mot, mais ne v'la t'y pon que le Mâle-Cat entre et veint se jutchi sus une t'chièze justement en fâche du Portrait. J'lis vit ses babines lus corlé, comme s'il avait déjà le s'cent et j'pensi me v'la happé chutte fais.

Le Connétable qu'menchi a lieze l'annonce qu'avait paru dans la boête et l'papi du Greffi et il invite les électeurs a proposé qu'ique Candidat.

Ne v'la t'y pon que le grand Raymond se butte et monte s'us la s'trade comme si Jerri y'avait apartins. Y dit qu'il avait un Candidat bien erconnu dans la Paraisse, et qui s'en allait le proposer avec pl'aisi et qu'il espézait qui veindrait au haut du Poll.

Je vit le mâle cat se drêchit et ouvri la boueche comme si voulait me happé, mais y corlit ses babines quand Raymond fit la proposition que Jim était san Candidat. Philip, qu'avait un papi dans sa pouchette et qui s'en allait en faize les louanges, erchût le coup de mort de surprinze. John qu'est tréjous Brun s'condi, et les deux lus r'assievirent. Stan monti la platteforme; il avait l'air d'être troublié un mio, et proposi Philip du Mouezi, et un autre que je ne connais pon le secondi.

La Salle n'tait pon trop plienne, quand n'v'la une scouade d'Electeurs qu'arrivent, y y'avait John le Baveux du Mouezi, Frank qu' n'fait pas d'grines, Charlie qu'avait les gambes étreintes comme un c'hva d'cab et y l'us assiévirent pensant d'ouïr les éloges, mais après tout, rein. Ne v'la t'y pon que Raymond erfait une apparition s'us la strade, et les cheveux corlées comme un hanneton y proposi un autre candidat. Chutte fais ch'tait John qu'est tréjous Brun. Ma fé ne v'lat'it pas le mâle cat, de surprinze qui fit un jump. Je pensi chutte feis, y s'en va me happé, mais n'ou fait, c'h'tait la surprinze, car il avait ouï qui voulait un cat au Parish Hall pour happé les râts et que Raymond s'en allait proposé à l'assemblée d'en avé y'ieun pour sauvegarder le plianché du niblage des râts et souezis.

Dans une vingtaine de minutes tout fut fini et pas d'sabbat. Stan inviti touos les Messieurs à passer l'autre coté pour avé chique chose pus fort que du thée. La Compagnie se dispersit et mé pour me déshaller je fus obligé de rester le dernier. Je sauti sus le plienchée. La porte était ouverte et y faisait jentiment bas, aussi j'fit un saut et de deux coups d'ailes j'étais jutchi sus ieunne des fenêtres au pignon d'la maison à Frainque. Je ouï Philip, Jim et le Corbin qui s'faisaient, y n'ous en ont donné une cliamuse chutte feis – Ha ! Ha !

Frainque avé mins les blinds ès "Tea Rooms" et clieuttée du papi sus l'haut d'la porte, je ne pouvais pas veis, mais j'entendi i'eun qui chantait John Brown coumme s'il le t'nait. Coumme j'vit qui n'y avait pas d'jibi pour mé, seulement que j'avais rencontré un torsolé sus ma route, je fis un start et avec mes grandes ailes je n'fut pas longtemps à r'gagni les sapins de Westmount et en arrivant je senti l'frais d'un lapin que j'happi bé vite.

A la prochaine bordée

LE JEUNE AIGLON

Marie Hibou
24/1/1920
 

Viyiz étout:

 

Les Pages Jèrriaises