Samedi passé le Chef me dit, “N'oublie pas que ch'est Samedi tchi veint qu'i' nos faut un articlye.”
“Oh, all right,” je li raîponni, mais sus tchi sujet? Nos lecteurs c'menchent à lus ennier de lièthe tréjous la même ture-luthe. Iun me d'mandi l'aut'e jour quand tchi qu'il aithait l'pliaisi de vaie l'nom de Mait'e Cliément d'Caen dans les “Décès.”
Je trouvi ch'la une bain cruelle ermerque sustout comme le pouore bouonhomme n'a jamais fait d'ma à personne.
Et j'li dis qu'i' devthait aver honte de pâler d'même la mort de san prochain, n'était pas digne d'être un abonné des “Chroniques.”
Là-dessus le Chef se mârri et m'dit que si je m'en allais c'menchi à prêchi comme chenna à nos clients, je nos allions en perdre la maintchi.
“Contentes-té d'êcrithe,” qu'i' m'dit, “j'avons dêjà assez de précateurs en Jerri sans que tu t'en mêle.”
“Eh bain,” je dis, “je n'peux pas penser à autchun sujet, à mains qu'ou n'me donniez permission d'aller ès Courses Jeudi. Nou peut trejous trouver d'la copie dans les pliaiches comme chenna.”
“Oh, vas-y, à ches maudites courses, et fait-té voler comme d'habitude! V'là tchi t'servitha bain!”
“Mercie,” j'li raîponni, “s'ou voulez m'baîlli chinq louis, je les mettrai sus “Timbers” pour vous. Ch'est li qui s'en va gagni la Coupe.”
Mais l'Chef, avec touos ses d'fauts, n'en est pas iun pour gaspillyi s'n argent à gagi sus des ch'vaux.
Eh bain, Jeudi matin je me l'vi d'bouanne heuthe avec l'intention de mettre tout en ordre dans la boutique et donner les ordres nécessaithes dans l'imprimethie.
Il 'tait dêjà biau jour et je r'gardi à la tête de not'e lièt pour vaie tchille heuthe qu'il 'tait par ma montre, que j'garde pendue là sus un crochet.
Mais où n'tait pas là!
J'êprouvi à m'rasouvenin ouest qu' j'avais té la séthé de d'vant, mais j'avais comme des éthagnies sus l'chervé, et je n'tais pas seux si j'l'avais avec mé ou si je l'avais pendue à sa pliaiche ordinaithe quand je m'couochi.
Heutheusement que Marie Hibou dormait oquo, car on se s'sait bain vite aperchue qu'i' y avait tchiquechose qui n'allait pas bain et oulle aithait dit tout-d'suite que j'avais 'té victimisé par des “pock-picket,” - car ch'est d'même que Marie prononce chu mot-là - et comme je c'menchais à réaliser mé-même que j'avais 'été volé, je m'decidi de n'en dithe pas un mot, mais je vos asseuthe que j'tais bain minséthablye parceque j'y t'nais à chute montre-là.
J'entri sus l'Champ d'Course à douze heuthes et comme j'étais bain connu comme étant le pus illustre journaliste de l'ile, les messieux à la hèche me laissirent passer sans payi.
La prumié course fut un fiasco.
Raique un ch'va qui couothi, sapresti!
Et i' n'sauti seulement pas par sus un seul obstaclye, opprès que Clem Steel et ses compagnons avaient prins tant d'embarras à prépather les “hurdles” et les mettre en pliaiche.
Les préchaines courses valaient bain mus mais che n'tait pas le pouore “Timbers” qui gagni la Coupe de Sa Majesté, chêin qui prouvi que l'Chef avait pus d'jugement que l'Caouain.
Nou m'a dit que chu ch'va-là ne r'couorra pas d'autre mais que pour gagni san maintchaint i' s'en va être mins à traîner des cherges d'bouais entre la cauchie et l'Esplianade.
La “paisson d'cliavé” qui vaint d'Angliéterre touos l's ans, était là comme d'habitude à travaillyi ses jeux d'attrapesot. I'y avait du “Crown and Anchor,” “Three Card Trick,” “Red and White Horse” et ainsi d'suite et l'bouan public était à s'laissi voler comme d'habitude.
Ch'tait tchuthieux de vaie des gens qui habituellement ergrettent de baîlli treis sous pour une gâzette comme “Les Chroniques,” fliantchi des piéches d'êtchu sus la tablye à ches ouaîsiaux-là justement comme s'ils avaient té à souogni des pouochins.
Mais ch'est d'même dans des jours de courses.
L'argent est à bouan marchi.
Un jeune homme du côté d'la Prumié Tour avait une bille d'un louis à sa main et oulle li fut airaichie dans un clyin d'yi par un “moussieu” angliais qui s'sauvi attou. Il eut biau d'chasser avec l'aide de deux policemainne, jamais ne purent le r'trouver car i' n'avait pas perdu d'temps à s'faufiler dans la “crowd” et à s'estchiver tout-à-fait.
Parmi les “bookies” i' s'en r'trouvi un certain nombre qui fichirent lus camp sans payi lus clients, deux qui travaillaient souos l'nom de “Gold” et une autre “firm” souos l'nom d' “Harrison.”
Jack de St. Ou était parmi lus victimes et i' dit, li, qu'i' s'en allait au baté de Vendredi matin lus présenter ses billets comme i' d'vallaient à bord. Je n'sais pas s'il a réussi, mais j'en doute, car ch'n'est pas quand nous est sur l'point de s'embertchi pour un viage que nou peut d'même à la dernié minute, s'otchuper de tchestions financières.
Mais tout badinage à part, si nos Messieux du Jersey Race Club veulent réussi dans lus entreprinse, i' faut qu'i' lus dêrangent un mio pour la protection du public. I' sont absolûment maîtres d'la position et tout ch'qu'ils ont à faithe est d'imposer une condition à tous les parieurs qui veulent êtabli un “stand” sus l'champ d'course. Pas un seul ne dev'thait être permins de s'installer sans avé versé une somme de bouanne fouaie, les argent lus étant ertouâné à la fin du “meeting.” Le règlyement ne cau'sait autchun inconvénient ès “firms” solides et asseuth'ait l'appui et la confiance d'un pus nombreux public.
Il est bouan de r'chever le prix d'allocation de n'importe tchi qui veurt applitchi mais perdez la confiance et l'support du public et ou pouorrez bain vite frumer les héches!
A bon entendeur, salut.
Caouain
1924
Viyiz étout: