* * *

Couomme nous sait, pon d'élection à St. Ou pouor chantgniers et achteu que l'affaithe est finie j'peux vos raconter chein qui s'passi car y n'faut pas craithe qu'nos gens sont de l'entente cordiale et j'sais bein pouortchi que l'affaithe resti d'même.

Nous avait oui une rumeur que d'un bord nous paslait d'mettre en avant l'Jack, qui batchi l'sien qui voulait aver drouait de vouaie, et d'l'autre bord nous était prêt à mettre en avant un quatrième candidat mais l'billet de nomination, qui était tout prêt signé, resty dans la pouchette de ieun des seins qui étaient au meeting et n'v'la pouortchi que Bill le forgeur n'fut pon proposi.

* * *

Dans la paraisse à mon biau cliochi l'affaithe s'en va cauffer raide et j'pense bein qu'oprès l'election j'en aurai bein des p'tits buts à vos raconter.

J'savais bein mé qu'il y en avait une djingue de décédé a opposer l'sien de la Commune et j'en couonnais ieun des siens qui allites à la prumièthe députation et qui d'pis s'fait que n'v'la qui fut une bêtise de sa part. J'sais bein ettout qui s'fait que viyant que ch'est d'même, y n's'en mêlera pon en touot et restera siez ly.

Ch'est Dimanche au sé que l'affaithe fut décidée, fouai de Marie Hibou, car j'tais jutchie sus ieun des bouais dans l's'envithons quand ieun oprès l'autre j'vit arriver tchiques grands d'la paraisse et j'savais bein que ch'n'tait pon pouor se r'poser ou pouor lus cauffer un miot qu'ils allaient patte a coue sièz Charles.

Couomme il n'y avait pon d'temps à perdre y fut décidé qu'nous mettrait une annonce dans la Post.

Quant à mé, j'reste ès écoutes et couomme il y aura èttout election pour chantgni, si l'sien d'la Commune vient a haut du pole, j'espèthe que j'pouorrai vos en raconter pus long qu'nous voudrait vais sus la gazette!

Marie Hibou
1924
 

Viyiz étout:

• Le système honoraire

• Nos r'velà grés de deux bouans Chantn'iers pour treis ans d'pus

• Saint Louothains: Election pour Chantgniers

• Dialogue entre Me. Jean et Me. Philippe

• Achteu que l'élection pouor Chantgniers