Si ch'est qu'i' n'y eut pas un Chant'nyi d'nommé l'aut'e jour à l'assembliée à l'Hotel de Ville, ch'est absolûment d'la faute au Chef.
Ch'est p't-être bain audacieux d'ma part de lanchi une pathielle atchusation contre li, mais quand j'vos aithai contre li, mais quand j'vos aithai raconté chein qui s'est passé, ou verrez que j'ai parfaitement raison.
Opprès touos les bouleversements qu'eurent lieu dans la municipalité, ch'est-à-dithe, deux des Chantgniers actuels qui voulithent rêsigni et pis pour couronner tout, que Moussieu Ryan, opprès aver accepté, mystifiyi le public en annonçant qu'i' n'en voulait pus, les êlecteurs de St. Hélier étaient bain gênés tch'est qu'i' s'en allaient faithe pour sorti de l'impasse.
I' fallait à tout prix trouver un candidat et ils avaient bian cherfouoilli la ville d'un but en l'autre, pas moyen de trouver un volontaithe pour sauter dans la brèque.
Quand i' furent quâsiment au m'sespé iun d'ieux, qu'est un principa et un homme qu'a d'l'influence dans la politique, eut une soudaine inspithation.
“Pourtchi pas d'mander au Caouain?”
“Mais sans doute!” les autres se firent, “tchi sorte d'imbéciles que j'sommes de n'y aver pas pensé d'vant!”
Et dans rain d'temps i' formirent une députation et s'en vinrent au bureau me trouver.
Ou pouvez jugi d'ma surprinse quand lus porte-vouaix me fît part de lus mission.
Je criyais d'abord qu'i' voulaient cherchi à s'motchi d'mé, mais je vins à réaliser, à la m'suthe qu'i' continuait san discours, qui si ses patholes étaient pus ou mains fliatteuses, comme i' sont tréjous dans d'pathielles occasions, i' n'en étaient pas mains sincéthes, et malgré l'appréhension que j'ressentais d'entreprendre une tâche aussi importante, je m'laissi convaincre que j'étais justement l'homme qu'i' lus fallait et quand iun ou deux des autres messieux eurent fait tchiques observations en ma faveur i' me d'mandirent bain polîment de lus donner ma raîponse espéthant que je m'en allais lus dithe que je m'laîssais porter candidat.
“Messieux,” j'lus dis, “ou m'avez tellement prins en sursaut que les patholes me manquent pour vos dithe combain que j'apprécie le grand honneur qu'ou v'nez de m'faithe à l'instant. J'ai tréjous maintint que ch'est le d'vé de tout citoyen Jersiais de raîpondre à l'appel quand ses compatriotes ont besoin d'li.” (Applaudissements).
“Douochement... Messieux... douochement! I' faut, au mains, qu'il en sait capablye. Et dans les conditions qu'existent au jour d'annièt la job de Chantn'yi ne peut pas être remplyie convenablyement par le premié-v'nu. Malgré toutes les belles choses qu'on v'nez de prononcer à m'n ègard, ou savez tous bain que mes qualifications sont extrèmement limitées. Criyous que l'patouais que j'pâle et que j'êcris s'en va être accepté par la Cour? Che s'sait oquo piéthe que m'n Angliais, sapresti!”
“Bah! bah !” s'fit iun, "si y a qu'chenna, le Chef se f'thait un pliaisi d'êcrithe les atchusations et tes rapports en français!.”
“Je n'en sis pas si seux,” j'lis raîponni, “et pis d'ailleurs, je doute fort qu'i' sait consentant que j'accède à votre demande. Ou viyez je n'sis pas aussi indépendant comme je voudrais l'être, je sis pus ou mains souos san contrôle, mais tant piéthe, ch'est pus fort que mé de vos réfuser, ch'est pourtchi mes services sont à votre disposition.
Là-dessus i' s'minrent à applaudi que tout n'avait qu'd'abattre et chu moment-là le Chef entri “Hallô!'” qu'i' s'fit, “de tch'est qu'i' s'agit don ichin?”
“Ah Moussieu!” s'êcriyi iun d'mes admithateurs, “la Ville est sauvée! Le Caouain prend pour Chantn'yi!”
“Oh, la, la! En v'là une belle!”
Et i' s'mint à rithe comme un fo.
Quand i' fut fini d'sa bordée i' s'adressi ès Messieux et lus dît comme chenna. “Savous-bain que si ou persistez dans votre entreprinse imbécile, ou portez chance d'être mins à l'amende, et pour une forte somme?”
“Et pourtchi mon doux?”
“Pourtchi? Car che sait ni pus ni mains qu'un flagrant “mépris d'Cour,” que d'présenter un ouaisé comme ch'tis-là pour être assermenté!”
Ma députation, naturellement fut indignée de l'entendre pâler d'même de lus candidat et i' protestirent ênergiquement.
L'affaithe vint à d'grosses patholes et l'Chef se permins de dithe des choses à m'n êgard pour lestchelles il aitha à raîpondre à un moment donné.
Dans l'couothant d'la dispute iun des messieux s'en était allé dans l'imprimethie arrangi avec Mess Pain, not'e foremainne pour mettre une grande annonce dans “Les Chroniques” du lendemain annonçant au public que l'Caouain était candidat pour Chantn'yi mais l'Chef en eut l'vent et i' s'en fut dithe au pouore Mess Pain que s'il avait l'malheur d'imprimer un seul mot au sujet, i' li paiethait une semaine de gages et l'flianquethait à la porte “séance tenante.”
Avec tout ch'la, je n'pouvais pas laissi ma députation s'en r'aller comme chenna la gorge sèque. I' fallait bain souôtenin “l'ancienne couôtume.”
Et à cause du grand défaut à Marie Hibou et par le fait que l'Chef à accès dans not'e mansarde, je n'peux pas garder d'litcheu siez-nous, ch'est pourtchi je lus d'mandi de m'accompagner jusqu'à la “British” ouest que j'bûmes deustrais santés.
Opprès que j'eûmes distchuté la position de touos les points-d'veux et afin d'êviter du troublye, je décidîmes d'abandonner la partie.
Ch'est pour chenna que j'ai fait comme Moussieu Ryan, -
Je me sis r'tithé.
Caouain
1933
Viyiz étout: