Me v'là r'venu d'la campagne!
Maît'e Cliément d'Caen a fini d'dêfoui ses patates, et opprès bain d'la minsèthe et bain du tintamarre, il a r'pathé à la fin, d'appréchi toute s'n avaine et san grain. I y a assez d'grenelle de restée sus la terre pour l'ens'menchi djaix fais et chu vier avare-là est comme un satan à cause que l'mauvais temps l'y'a fait perdre une partie d'sa récolte.
Je n'criyais pas qu'i' voulait m'libéther oquo si vite, viyant qu'il a siex vrégies d'navets et d'sweediches qui sont perdues d'serclye et qu'il aithait ieu grand besoin d'mé pour li aidji à les houètter, mais l'aut'e sé, quand j'fûmes finis d'tâsser, et que j'nos assiévîmes à souper, i' m'dis comme chenna: “Caouain, je pense bain que tu as grand hâte de t'en r'aller en ville.”
“Eh bain,” j'li raîponni, “i' faudra bain que je m'y en raille dans tchique temps, mais si ch'est qu'ous avez besoin d'mé pour oquo une tchinzaine de jours, je me f'thai un pliaisi d'rester pour vous baîlli un coup-d'main.”
Ou viyiz, j'aithais bain voulu r'être en ville sus un sens, mais de l'autre côté, tandis que j'tais à la campagne à la tablye à Maît'e Clém, quouaique nou n'y vivait pas gras, ch'tait tout-d'même une grande êconomie sus man maintchien.
Marie Hibou m'avait êcrit à m'dithe qu'en ville tout avait renchéthi. Le pain et la viande étaient à un prix fo, le beurre à deux chelins huit la livre et l's oeus au même prix la douzaine, pas moyen d'aver d'tchèrbon et la parafine qu'ou faisait servi dans san “stove” pour coutchi, v'nait d'être annoncée dans les gâzettes comme ayant hauchi jusqu'à deux chelins quatre le gallon. Ou m'donnait en avis de rester-là aussi longtemps qu'possibl'ye et qu'ou tâch'chait de s'graie d'san mus en faisant d's êconomies.
Comme tout l'restant d'san sexe, oulle avait mins un P.S. au bas d'sa lettre dans tchi qu'ou m'disait qu'i' fallait absolûment que je li envyisse tchiques sous, car Mess Bisson était tout l'temps à la tormenter pour le dernyi quart-d'an! Je n'avais pas d'sous à li envier, mé! Dans les quat'e mais que j'ai 'té siez l'vier de Caen, jamais j'n'ai peu seulement li aîraichi le prix d'un rouoge héthan de d'sus mes gages.
Alors, ou comprenez bain que, souos les circonstances, i' n'y avait pas d'presse de m'en r'aller en ville. Mais le bouanhomme avait fait s'n idée de s'dêfaithe de mé.
I m'dis, “Je pouvons nouos graie d'charme acheteu Caouain, je sais bain que les villais ont grand envie de te r'vaie, alors tu f'thas bain mus de t'en aller dès qu'tu aithas dêjeuné d'main au matin.” Je trouvi chenna bain drôle, mé, et je m'douti bain vite qu'i' d'vait aver tchique motif pour m'expédger de chutte maniéthe-là, alors je li d'mandi: “Est-che, par chance, que je n'vos aithais pas donné satisfaction?”
Nennin, ch'n'est pas chenna du tout, tu as fait bain mus que je n'm'attendais, mais...”
“Mais tchi?”
Maît'e Cliément d'Caen se touânni du côté de Joseph Le Boutillyi qui, jusque là, n'avait pas dit une pathole, et li dis, “Aussi bain lis dithe, Joe.”
“Comme ou voudrez, Mess de Caen,” l'autre li raîponni, “Eh bain, Caouain,” s'fit Maît'e Cliém, “ch'est comme chennechin, le mais d'Mai passé, j'applitchi pour ichin Joe, devant l'Tribunal, et i' li bâillirent jusqu'au 31 d'Août, ernouvelablye. Ah, ça, v'là l'temps êchu, et i' faut que je r'applique pour li. Comprends-tu bain? Dans chu temps-là Joe était le seul homme à m'n empliai. V'là pourtchi qu'i' me l'laissithent. Tout chu temps ilo, j'ai suivi les Tribunaux de gentiment près et j'ai r'mertchi que nou peut enjôler tchiqu'uns des membres comme nou veur, mais i'y en a d'autres qui n'sont pas trop c'modes. Alors, si tu restais en travas ichin i' n'en faudrait qu'un de ches tout-se-mêles-là à me d'mander “Mess de Caen, est-che que l'Caouain n'est pas en travas siez-vous?”
Si j'étais oblige de dithe “Oui, moussieu,” le Président annonc'çait tout-d'un-coup, “Demande refusée!” Et je perdethais Joe!
Si, au contraithe, que je pouorrais lus dithe, “Le Caouain a 'té siez-nous pour une semaine ou deux dans la saison des patates, mais il a fichi san camp et m'a laissi dans l'embarras!” eh bain, tu vai, i' s'saient forchis de m'laissi Joe jusqu'au 31 Décembre au mains. Comprends-tu l'affaithe?”
“Ou oui j'comprends bain, mais dans par ou est qu'j'en s'ais mé, dans tout chennechin?”
“Bah! bah! i' n'y aithait pas d'dangi pour té, i' n'te peuvent rain, i'y a longtemps qu'tu ès en seuthetè.”
“Vaithe, ch'est vrai, mais m'n honneur et ma réputation?”
“Ne t'gênes pas, man vi, fait me chu pliaisi-là. Dêcampes demain au matin, et pis j'arrange'geons chenna pus tard!”
Je m'y accordi.
Et v'là la raison pourtchi que je r'sis à d'meuther en ville.
Caouain
1917
Viyiz étout: