Y'a un tas d'monde qui se d'mandent dépis un mais tch'est qu'est dev'nu du pouorre Caouain.
Les uns prétendent que j'ai 'tè app'lè pour le service militaithe d'autant que j' pouorrais être utile pour créver les yiers ès Boches la nièt quand i' n'me verraient pas appréchi. D'autres sont d'avis que l'Connétabl'ye d'la ville m'a mins en travas en permanence dans san “Labeur Bureau” - et, de vrai, j' vaudrais tout aussi bein qu'la généralité d'ses r'crues... D'autres s'imaginent que l'dêpiè d'avair tchittè ma vielle démeuthe au Haut du Vièr Marchi pour v'nin au Bas m'a mins malade.
Ou vos trompèz tous, bouannes gens, j'sis occouo ichin, et bein en t'nanche, mais les gazettes sont si pliennes des affaithes de ches maudits tribunaux d'exemption et, coumme disent les Sieurs Perchard et Cristin: “d'autres articles trop nombreux pour énumérer” que nou m'renvie toutes les s'maines avec man baragouin et j'en ai 'tè rèduit, littéralement, à mangi mes patholles ou à créver la faim. Nou vit maigre par ichin, j'vos l'asseuthe.
Pourtant, j'en avais prins, des informations! J'sai' bein tch'est qu'ch'est qu'a demandè d'être portè principa' sus la liste du rât oprès qu'oulle avait tè compliètèe; j's'ai bein tch'est qu'ch'est qu'ètait à grapiner des patates à la c'minse quand nou disait à un tribunal qu'il 'tait les deux bus en yun; j'sai bein tch'est qu'ch'est qu'est à faithe une grosse migaud d'chucre, malgré les r'c'ommandâtions des autorités; j'sai bein tch'est qu'ch'est qu'est à craître un tas d'tomates et qui prêche es autres de faithe du grain; et j'en connais occouo bein d'autre au sujet de bein des gens, mais criy'ous que j'm'en vais vos en dithe pus long? Pas si bête! Mess Bisson prétend qu'i'n'veut pas être ercherchi pour avair imprimè des choses qui pouorraient lis valè deux-trais rémontrances et mai j'tcheins à ma couenne.
J'en êcappi d'une belle, ètou, la dernié fais que j'écrivi pour la gazette! Mai, qui n'y vait pas si cliai d'jour coumme de nièt, j'avais prins l'anima que l'gérant affectionne tout partitchulièth'ment pour une catte, et j'en pâli même dans les “Chroniques” coumme d'une catte...
Mais Marie Hibou n'fut pon longtemps d'vant savair mus et on n'a pas cessi de faithe des riselées sus man co, tandis que l'boustre d'ca - car, ch'est un ca - m'en veurt pour avair si mal dècrit san sexe et m'a dêcliathè une dgèrre à outrance tant et si bein que j'voudrais n'avair jamais mins les pids ichin.
Hélas, tout n'est pas couleur de rose dans l'mêtchi des gazettes!
Caouain
1917
Viyiz étout: