La lettre ci-dessous a été envoye par un oncle, depuis longtemps à Londres, à son neveu, l'un de nos jeunes amis de la campagne. Ce jeune ami nous l'a transmise avec prière de l'insérer:
60, Green Street, Bel Air Villas,
London, Oct., 1889.
Man chièr John, - Jé t-sis ben obbligi d'mavé envié chu biau p'tit livre qui m'donne des nouvelles de tan quozin Bram Bilo, le Chant'gni d'St.-Ou et de ta quozinne Missis Nancy Bilo, sa femme, et d'lus viage à l'exposition d'Paris. L'histoithe de lus viage est vraiement pliaisante. Bram ne fut pas mal malin dé s'faithe prendre à l'hôtel des ambassadeurs en s'annonçant comme l'Chant'gni d'St.-Ou, car d'même y s'metté au rang des maires de provinces ou des "distinguished strangers" qui v'naient vés la république et san prsident et sa merveilleuse exposicion. En s'y prennant comme ch'la, il eu l'pliaisi d'avé, l'y et sa chiéthe Nancy, une invitation à une grande réception que Moussieu Carnot donnit aux "distinguished strangers" qu'ettais venus l'vès et d'bèthe du champagne comme y n'lavé fait d'sa vie, et d'mangi de toutes choses imaginables tant qu'il en voulut et Nancy étou, et d'vés touos chès biaux mèsieux et toutes chès belles dames danser ensemblle comme des marionettes toute la gnié et pis Nancy vit toutes chès belles robes de soués et de mousseline de toutes les couleurs comme de sa vie ou n'en avé jammais veu. Chès pitchi qu'ou-l'ait mangi tant du pitho, car je vé qu'ou-l'en fut malade le lendemain et fut oblligie de resté à l'hôtel. Chn'en'té pas de d'même de Bram: li, iltai gai comme un pinchon et tandis qu'sa pouore Nancy se reposé, je vé qui s'en fut gambader dans la ville et qu'au but du compte y s'laissit prendre par un fin merle qui l'y print un billet de chan francs de la manièthe la pus civile et le laissit sans moyens de payer la bombance tchi v'naient de fèthe ensemble, et que le ouaiteur, le prenant pour un voleux, envia cherchi un gendarme qui l'mint au violon toute la gnié. Né v'la-t-i-pas une belle affaithe. Li au violon et Nancy au m'sespé à l'hôtel vu qui ne r'vénait pas, nou peu s'immaginner tchi sorte de gnié qui passirent touos les deux. Le lendemain y fut libéthé du violon. Y n'dit pas comment, mais j'pense ben que l'gendarme le m'na à l'hôtel des Ambassadeurs, et que, comme y l'y restait oquo assez d'sous dans sa casse pour payi le p'tit compte de sa ribotte du sé, y'l payi au gendarmeet tout s'arrangi, mais, après ch'la, y n'est vraiement pas étonnant que la pouore Nancy voulit vite s'enr'venin en Jerri, car, comme nou dit en ses termes: "A Paris sans argent y n'y fait nu." Nou dit que les St.-Ouennais ont d'lesprit, mais y m'semblle que tan quozin Bram, tout Chant'gni qui l'té, était un grand bachouard pour se laissi volé comme y fit par un espiègle, et un grand achocre étout pour laissi l'vent l'iemporter, san topper sur la Tour F.L., et un peule pour aller haller sus la quoue d'un chinouais et pis s'encouore de peux et lus laissi san biau paraplyie d'emprunt. Enfin les v'la de r'tou touos les deux. Jespèthe que Nancy a trouvé que ses petits aviers n'avaient pas enhanné et que Bram est content du soin que ses gens ont print de ses g'niches et d'ses animos. Si tu vas l'vés dit l'y que j'sis ben content qui s'est l'ben r'vénu.
Et acheteu, comme est qu'ou zêtes tous siez vous, Phlip, John et té. Mes complliments à tout l'monde. Je m'porte ben, mé et ta quozine Peggy et quozine Jane étou, mais la pouore Betsy n'en change miot.
Tan vier onclle,
T.G.
Viyiz étout: