Né v'chîn eune histouaithe. Ch'est tout à fait la véthité mais pour tchique raison înconnue les gâzettes n'en ont pas touchi eune seule pathole à lus lecteurs; ch'est à dithe, j'n'en ai veu rein sus la gâzette du sé ni sus la sienne du matîn et pas même dans chu vèrt papi tch'est si affronté mais tchi n'a pon d'peux d'vos dithe la véthité.
Ch'tait la blianche femme. Lé vaisinné 'tait en affaithe. Nou l'avait veue plusieurs fais à s'promener à l'entou d'eune pliaiche qué nou-s-appelle Rotchette, et spécialement par eune belle séthée, quand plusieurs membres dé chutte maîson, ayant dgetté châtchun à tou au but d'la cache dépis soleit couochant, la vîtent sus l'tard bein distînctement et auve lus propres yièrs à marchi tout en silence lé long du fossé. Né sachant trop bein tchi faithe, nos dgetteurs (tch'étaient our dithe lé vrai un mio êpeûthés) èrtouonnîtent à la maison à rapporter lus dêcouvèrte. La famille dêhale en blo, châtchun armé dé tchique sorte d'articl'yedé d'fense – iun avait eune frouque, l'autre la alette du graie et un traisième prînt la brînge d'êtablye tch'était acouo toute douothée dé... saleté. Neumétho quatre sé meunit d'eune vielle chouque et la bouonnefemme, yi, toute brave et tout en d'visant et donnant l's ordres ès hommes, sans cérémonies dêpend la vielle patraque d'arme des rouaies et file amont la cache comme eune héthonde. Ch'tait reinque quand ou vînt à la hèche qu'ou s'apèrchut qu'l'ameunition mantchait. Là-dessus ou vos laîssit couorre deux ou trais vielles expressions jèrriaises au restant du bataillon, pour aver oublié d'li ramémouaither à penser ès cartouches Mais, en autchun cas, il'tait trop tard; Madame la blianche n'tait pus visiblye. Evidemment qu'même des r'vénants n'aiment pon l'combat.
Mess Bigorne (ch'est là l'nom d'ches gens-là) dit qué i' fallait en vaie pus long. Sans doute, d'en par là i' n'l'avait pas 'couo veue, li, la blianche femme. Mess Chagorne, extchusez, Bigorne, n'est pon un homme tchi sort hardi la niet et, naturellement, n'ayant veu rein i' n'est pas êtonnant tch'il 'tait un mio încrédule; d'ailleurs, ch'est un corps tch'est pûtôt r'ligieux d'sa sorte et n'adgéthe dé respect pour autcheune supèrstition. I' n'crait pon n'tou ès chorchièrs ni à la chorchel'lie, sinon, p'têtre quand i' s'conte enchorchélé li-même!
Enfîn, tréjous, la séthée en r'vénant à peine la niet s'faisait qué not' moussieur print sa pliaiche driéthe iun des fos tchi s'trouvent au but d'la cache. Lé grand fis s'muchit driéthe l'autre fo et tout du long avau l'avenue y'avait un soudard ou eune soudarde à faithe la garde à châtchun des bouais. Nou-s'avait ieu d'l'aide d'à l'entou et chatchun s'était rangi ou plianté à sa pliaiche dé bouonne heuthe. I' faut dithe qué la dame sé montrit et comme d'habitude nou la vit à faithe la garde dans la distance et sé sîllant dans l's ombres parmi l's êpinnes, mais – pas d'résultat satisfaisant. Y'eut un mio pus d'excitement car au cri dé “qui va là?” ou prînt la pathe et dispathu, lé régiment souotre. Les uns fîtent pour lé Haut du Pêtre et d'autres par ava. I' 'taient tous à pèrte d'veue quand jé m'décidit d'les suivre.Y'a des coursiers parmi ieux, j'vos garantie. Y'en eut tchi parcouothîtent beintot la maintchi d'la pâraisse, mais, comme j'vos ai dit, san résultat.
Chutte fais, dgia, il' 'taient marris et – sémname! pardîngue! et bouffre d'mêtchi! Eune dgiexaine d'agents d'police fûtent engagis, ès frais d'la famille Bigorne. Ch'tait là l'coup. Bieau qu'tout fut trantchile pour deux ou trais jours la coupablye fut bein vite gobée. Georges Gris et l'gros Cliém Biché en eutent lé privilège. Mais, ingnots! et bachouards! et achocres! Ch'tait eune jeune fille toute respectablye et bein honnête tch'avait l'habitude d'attendre pour san galant. Chu galant n'a pon grand dêha et n'est pon iun des pus prompts et ch'est ch'tchi fait qué not' hardelle 'tait tréjous là d'vant li. Les explyication nécessaithes données et l's extchuses convenablyes faites, la majorité d'la compangnie s'êclitîtent à rithe. Pas vrainment les Bigornes. Quand i' vîntent à penser à l'êbrouha tch'il' avait fait i' restîtent bein sots et s'en r'fûtent touos peineux à la maîson. Et d'penser qu'les vaisîns s'en allaient en faithe la rîselée! J'vos asseûthe qu'il' en ont grand r'gret. Par là-d'ssus la bliâme fut mînse sus la p'tite Bigorne (la jeune hardelle tchi va touos les jours en ville) et l'bouonhomme lî baillit eune ronde comme nou f'sait à un p'tit êfant, pour aver sa r'venge. Ch'tait yi tch'avait c'menchi tout l'train entouor la blianche femme.
Chein qu'j'vos ai dit est la puthe, plieine et entchiéthe véthité. Dès l'tout s'menchement d'l'affaithe jé m'rendit sus les lieux et j'y fit ma d'meuthe pour un tchînze-jours. Rein n'm'a écappé dé chein tchi s'passit et si si' en cas j'ai fait eune exagération ou deux i' faudra passer par-dessus, car, comme ou l'savez, il est permîns à tout journaliste dé faithe sèrvi sa discrétion et dé temps en temps j'sis sujet à profiter d'chu privilège.
Marie
Les Chroniques de Jersey 29/9/1934
Viyiz étout: