Dans les souaixante membres dé L'Assembliée d'Jèrriais lus rêunnîtent à l'Églyise Pârouaîssiale d'La Trinneté Dînmanche lé 28 d'Avri pouor lé Sèrvice Annuel 2002. Lé Pâsteur Brian Vibèrt prêchit l'sèrmon et les léçons fûtent liues par l'Sieur Tony Scott Warren et la Danme Enid De Gruchy.
Cantique Marchons, Soudards Chrêtiens
Confêssion Générale
Notre Père tout-puissant, j'té d'mandons d'aver pitchi sus nous pa'ce qué j'avons transgressé tes saints c'mandements et j'n'avons pon fait les choses qué j'dév'thions aver faites; et j'avons fait les siennes qué jé n'dév'thions pon aver faites.
Bouân Dgieu, pardonne ches'-là tchi confêssent lus fautes et fait grâce à ches'-là tchi sé r'pentissent suivant tes promêsses faites au genre humain, en Jésû-Christ, nouotre Seigneur. Et accorde-nous, Père très mînséthicordieux, pouor sén amour, qu'à l' av'nîn, j'pouôrrons vivre sobrément, bouonnement et r'ligieusement, à la glouaithe dé tan Nom saint.
ÂMEN.
L'Absolution
Minnistre Dgieu tout-puissant, accorde à tan peupl'ye, tan pardon et ta paix, à seule fîn qué j'séyons purifiés dé touos nos péchés et qué j'piêssons té sèrvi aniet en trantchillité d'esprit, et j'lé d'mandons au Nom dé nouotre Sauveur, Jésû-Christ.
ÂMEN.
Notre Père
Lé Tchoeu seulement
Minnistre Seigneur, ouvre nos lèvres.
Rêponse Et nouotre bouoche annonce'sa tes louanges.
Minnistre Êtèrnel, dêpêche-té pouor v'nîn à nouotre aide.
Rêponse Dêpêche-té pouor v'nîn à nouotre aide.
Minnistre La Glouaithe sait au Péthe et au Fis, et au Saint-Esprit.
Rêponse Comme ch'tait au c'menchement, comme ch'est à ch't heu
et comme ch'la s'sa à tout janmais. ÂMEN.
Minnistre Louangiz lé Seigneur.
Rêponse Lé Nom du Seigneur sait louangi.
Sieaume Lé Seigneur est man Bèrger (dit)
Lé Seigneur est man Bèrger
Sieaume dé David
(Sieaume XXIII)
Lé Seigneur est man Bèrger ; i' n'mé manqu'tha d'rein.
I' m'condit ès vèrtes pâtuthes des prés pouor qué j'm'èrpose ;
I' mé mène lé long des cannieaux trantchil'yes et rafraîchissants ;
Quand j'ai l's esprits bas, I' m'les ravigote;
I' m'condit dans les bouans c'mîns, comme lé Bouan Bèrger tch'Il est.
Ouaithe qué ma route mène à travèrs eune sombre vallée, auve l'ombre d'la mort tout à l'entou, jé n'craindrai autchun ma, car Tu'es tout au pid d'mé; Ta chouque et Tan cro mé donnent du couothage.
Quand même qué mes ennemîns m'vengent, Tu m'mets eune tabliée
l'avant à mé;
Tu m'oins la tête d'hielle;
Tu m'rempl'yes man dgichon jusqu'au bord.
Toute ma vie jé jouithai d'Ta bouônté et dé T'n amiêtchi, et jé d'meuth'thai dans la maîethon d'l'Êtèrnel pour tréjous.
Léçon
Cantique En Garde! En Garde Pour Jésus
Léçon
Lé Symbole des Apôtres
J'crai en Dgieu, lé Péthe tout-piêssant, Créateu des Cieux et d'la tèrre:
Et en Jésû-Christ, san Fis unnique, nouotre Seigneu tch'a 'té conçu du Saint-Esprit et né d'la Vièrge Marie, a souffèrt souos Ponce Pilate, a 'té crucifié, est mort et a 'té ensev'li; il est descendu en enfé; lé traîsième jour il est ressuscité des morts; il est monté ès Cieux; il est assis à la drouaite dé Dgieu lé Péthe tout-piêssant; et d'ilà i' veindra jugi les vivants et les morts. J'crai au Saint-Esprit; J'crai en l'Églyise unnivèrselle; la Communion des Saints; la Rémission des péchés; la Résurrection dé la chai, et la Vie êtèrnelle.
ÂMEN.
Priéthes suivantes
Minnistre Lé Seigneu sait auve vous.
Rêponse Et auve t'n esprit.
Minnistre Prions Dgieu.
Seigneu, ai pitchi d'nous.
Rêponse Christ, ai pitchi d'nous.
Minnistre Seigneu, ai pitchi d'nous.
Seigneu, fai lithe sus nous ta mînséthicorde.
Rêponse Et accorde-nous tan salut.
Minnistre O Seigneu, sauve la Reine.
Rêponse Et êcoute-nous par ta grâce quand j'té d'mandons.
Minnistre Habil'ye tes minnistres dé justice.
Rêponse Et rêjouis tan monde chouaîsi.
Minnistre Seigneu Dgieu, d'livre tan monde.
Rêponse Et bénie tan héthitage.
Minnistre Donne-nous la paix dans nouos jours, O Seigneu.
Rêponse Pa'ce qué i' n'y' a qué té tout seu, O Bouân Dgieu, tchi
combat pouor nous.
Minnistre O Dgieu, fai nos tchoeurs purs.
Rêponse Et né nouos prend pon l'Esprit dé la Sainteté.
Priéthes par lé Minnistre
Cantique Lis Jésû Lis (L's Etudgiants seulement)
Sèrmon
Cantique et la collecte Reste auprès d'nous
La Bénédiction
Vèpres
Viyiz étout: