Sanm'di l'dgiêx-sept d'Juîn - Dînmanche lé vîngt-chîn d'Juîn
I' fut dêcidé d'mèrtchi lé millénaithe auve eune village dé tentes au Quartchi du Hâvre tchi r'présent'taient les difféthentes nâtionalités et tchultuthes dé Jèrri. Y'avait l's Irlandais, l's Italiens, les Portundgais, les Chinnouais, les Thailandais, les Français, les Bangladeshis et les Hollandais et, bein seu, les Jèrriais étout.
J'fînmes eune exhibition dé textes et d'portraits pouor la tente dé Jèrri - lé vocabulaithe dé l'heuthe en Jèrriais, les saîsons, les mais, les jours - et tchiques poèmes entouor les hôlouges et les mais et les saîsons.
La Section de la langue Jèrriaise avait eune stâle pouor vendre des livres et cassettes - et j'vendînmes un tas d'nos fieillets d'èrchettes étout.
Pouor lé c'menchement d'la s'maine du Village, d's êfants èrprésentant les difféthentes nâtionalités atchilyîtent les vîsiteurs dans lus langues nâtionales. La janne fil'ye Jèrriaise tchi pâlit en Jèrriais l'fît raide bein.
Lundi et Mardi arlévée dans la grande tente, y'avait d's èrcitâtions et des chansons en Jèrriais - et tchiqu's'uns des mousses des êcoles vîntent chanter les chansons qu'j'avions 'té à pratitchi dans les clâsses - Jean, Gros Jean et Tchi P'tit Homme. Ch'fut la preunmié fais qu'les êfants avaient chanté ensembl'ye - et en publyi étout - mais i' chantîtent bein et ch'tait bouôn pouor l'audience et les pathents.
Viyiz étout: