I' m'sembl'ye qué j' avons pâlé entouor l'an 2000 pour hardi longtemps et dans tchiques jours j'pouôrrons célébrer l'arrivée du nouvieau millénium. La sèrvelle du Nouvel An i' y'étha un sèrvice à 6.30 du sé dans la Grand' Églyise où'est qué Méthodistes, Catholiques et Anglyicans prend'thont part. Tous s'sont les beinv'nus et i' faut espéther qué l'Églyise s'sa patchie auve nos pârouaîssiens, jannes et anciens, et lus anmîns. Chu jour-là et lé lendemain i' y'étha étout l'opporteunité dé sonner la clioche, comme dé couôteunme sus dé telles occâsions.
Ch'est bein à propos qué l'conmité enchèrgi d'organiser les êvénements pour lé millénium a încliu lé sèrvice dans les dreines heuthes dé 1999 anno domini. Véthe, ma fé, i' n'faut pon oublier qué lé 31 dé Dézembre mèrque la fin dé deux mil ans d'la chrêtchienneté. Jèrri n'a pas tréjous 'té eune île chrétchienne et je n'sommes pas seux cèrtains dé l'exacte date dé l'arrivée dé l'Évangile. St Magloire et St Sampson sont associés auve les Iles dé la Manche mais ch'est St Hélyi tch'est partitchuliéthement èrconnu ichîn.
À St Ouën, les preunmié chrêtchiens s'rencontraient dans des maîsons privées au 6ième siècl'ye. I' y'a mention qu'eune p'tite chapelle fut construite au 7ième siècl'ye où'est la Grand' Églyise s'trouve aniet. L'églyise, comme j'la connaîssons à ch't heu, a changi avaû l's années, mais j'savons qu'ou fut consacrée au 12ième siècl'ye et dêdiée à St Ouën, Évêque dé Rouën. Pour 900 ans, pus ou mains, l'églyise a rendu un fidèle têmouongnage à la fouai dé Jésû-Christ et a 'té au centre même dé bein des activités d'la pâraisse. Un temps fut quand les Assembliées et même les élections eûtent lieu dans l'églyise.
Les croyants ont adouothé lé Bouon Dgieu ailleurs dans not' pâraisse. La p'tite Chapelle dé Ste Anne fut construite d'vièrs 1300 comme partie du Mangni d'St Ouën, et acouo aujourd'aniet lé Seigneu Philip Malet d'Cart'ret y va à la mêsse chaque dînmanche.
Les Catholiques Romains ont leu lus chapelle dans la pâraisse étout. Pour bein d's années i' y'avait la Chapelle dé Ste Anne à Grantez. Ou fut abattue i' y'a tchique temps et d'nouvelles maîsons l'ont rempliaichie. Dé nos jours les Catholiques vont prîncipalement à l'Églyise dé St Matchi au Coin Vathîn; d'autres vont à Ste Bernadette à St Brélade.
Les Méthodistes ont fait eune forte contribûtion à la vie chrêtchienne à St Ouën. La preunmiéthe chapelle construite spécialement dans l'île 'tait dans la pâraisse. La vielle chapelle, comme j'disons aniet, fut bâtie en 1806 et ch'est là qué la congrégâtion s'rencontre dé nos jours. En 1871 la grande Chapelle Wesléyenne rempliaichit la preunmiéthe tchi 'tait trop p'tite pour acc'moder lé grand nombre dé gens tchi v'naient chaque sémaine. Malheutheusement chu bâtisse si împosant fut freunmé dans les 1970s mais reste là au centre du chînm'tchiéthe.
L'églyise dé St. George
En 1880 l'Églyise dé St George fut consacrée pour sèrvi les Anglyicans dans l'nord-vouêt dé St Ouën. I' n'y avait pas d'motos pour aller à la Grand' Églyise dans chu temps-là! En 1999 dans chutte belle p'tite églyise nou continnue à prêchi les bouonnes nouvelles dé Jésû-Christ.
Qué j'èrmèrcions lé Bouon Dgieu pour sa bouônté envers nous. I' nos a donné san Fis Jésû-Christ comme Sauveu du monde entchi - qué j'célébrons lé salut tch'il a offert pour 2000 ans à tous tchi craient en Li et tch'est acouo en offre pour lé nouvieau millénium.
Brian Vibert
Viyiz étout: