"Ch'est bel et bon," s'fit Cliem R'non, l'aut' sé, après l'tée, siez Couillard, la ou-ès que j'nos taimes reunis, eunne petite djingue pour distchuté la loué sus la Milice, et tâchi d'vaie a travers la bliâze qui r'couvre tant d'mystèthes. "Ch'est bel et bin," s'fit Cliement, en satchant sa douzième allumette: "mais tchi djantre s'en va r'sourdre de lus fameuse Loué sus tchi y'a tant d'hertchin'nie?"
"Pour dé mé," s'fit Sam Podêtre, "j'sis prêt a marchi coumme un autre, a condition qu'i n'y'ait pon trop d'exemptions. Ch'qui n'me pliait pon, dans chutte Loué, ch'est d'vaie tant d'Articlyes pour dithe coumment en rêscappé. J'ai peux qu'i' n'y'ait d'la criallie d'vant qu'tout sait fini. Passe mé tan chipaudé; man p'tun est putot mucre."
"Ché s'a coumme tréjous, ou verrez," s'fit Amice Lescaudé. "Les grands mangent les p'tits! Ou n'les verrez pon exempté des machons, ni des tcherpentiers, ni les siens qui vont a la journée - n'y'a pas d'danji! Mais d'eunne faiçhon et d'eunne autre, et sans dithe pourtchi, nou verra des fils d'propriétaithe, des fils d'bourjeais, des couosins d'office, les siens qui sont engagis a des filles de Député - ous en verrez un tas qu'i' s'a dit qu'lus plieche est d'resté en Jerri, et - "
"N'pâsle pon d'même, Amice Lescaudé, ou tu m'verras oblyiji de t'fliantchi eunne talmouze," que j'lis dit en lis montrant man poing. "Nos gens d'la haute-classe s'en vont être les preumiers a r'fûzé - tu m'entends? - a r'fûzé! d'être exemptez sans bouonne raison. Et y'en étha, des raisons, pour les empechi de se rué sus l'enmîn coumme i' voudraient si nou n'les r'tenait d'forche. Quand n'y'a qu'un fils, par exemplye, seul èsfant, héthitchi d'un menage, tu voudrais p'têtre l'faithe couôre le dangi d'etre tué? Belle affaithe si l'héthitchi mouothait et qu'i' faudrait dounné eunne année de r'venu au Seigneur! Avais tu pensé a chu cas la?"
"J'admets qu'y'a des cas, hardi d'cas, ou-ès qu'la mort de l'héthitchi gat'tait la succession," s'fit Hugh Desprès; "et ch'est pour ch'la que j'sis d'avis qu'la miyeu chose a faithe ché s'ait d'envié au Front des gens qui n'ont rin a perdre; mais j'avoue qu'y'étha d'la criethie si l'publyi s'appérchét qu'les p'tits sont prins et les gros laissis. Tchès qu'tu'en pense, té, Cliément d'Can?"
"J'ai dans l'idée," s'fit Cliément, en digottant sa pipe ov sa brioche, pour la faithe hallé mus; "J'ai dans l'idée que l'Gouvernement Anglyais s'en va dithe qui faut mettr' un Articlye dans la Loué pour que touos les siens qui sont trop âgis, ou qui n'ont pon d'fils, ou qui sont empliés par l's Estats, paient l'pus bé des frais du Contingent. Coumme tchi dithait eunne forte taxe sus lus fonçi, pour payi les frais des siens qu'ithont s'battre pour empêchi es Prusses de v'nin ichin brulé et saccagi maisons et hautgars."
"J'ai oui cheunna étout," s'fit Sam Podêtre. "Et ch'qu'i' y'a d'pus, j'ai oui qu'nos Messieux sont de ch't'avis la étou. 'J'avons des fermes, et des maisons, et des rentes,' qu'i' disent. 'Si les Prussiens gagnent, j'soummes ruinés! Et coumme j'soummes trop viers pour allé nos battre, et, bin! J'paiethons des pensions ès veuves des siens qui moûront, gas déouelle! L'publyi n'ditha pas qu'j'avons offert des soudards et qu'nous, les riches, v'la tchi nos couôte rin!'"
Je d'îvzimes la d'sus ocquo tchiq temps; et j'fûmes tous d'accord pour dithe que nos Messieux - j'pâsle ichin des gens riches, propriétaithe, qui n'ont pas d'fils a y'envié - sont tous d'bin braves gens, d'bouans viers Jerriais d'la vielle race, qu'ont l'tcheu sus la main, coumme nou dit, et qu'nou s'en va être surprins d'vaie coumme i' s'en vont être ouillinne de dounné, mettons jusqu'a djix du chent, d'la valeu d'lus proproété a la disposition du Gouvernement, pour les besoins d'la djèrre. I' savent bin qu'lus propriété n'vaudrait pon chi si j'pérdaimes, les braves Jerriais qu'i' sont; et i's ethaient honte d'vaie les pouore gens allé s'faithe èsmaglyi dans les tranchies tandi qu'i' restethaient ichin trantchil'ment a r'chévé lus rentes, loué lus terres, a l'ombre de tout dangi.
Piteur Pain
Evening Post 17/8/1916
Viyiz étout: