Les Pages Jèrriaises

La Lettre Jèrriaise


Bouanjour m's anmîns; vèthe, ch'est mé, lé bouistre d'angliais tchi vos pale. Preunmièthement, j'veurs r'mèrcier touos les membres d' l'Assembliée d'Jèrriais tchi m'ont fait l'honneu d'm'êlithe Président pour l'deuxième fais au mais d'Septembre, et j'veurs ermèrcier partitchuliethement Eileen Le Sueux, tchi m'proposit, viyant qu'ou print la tâche à la dreine minute, et pâce qu'ou m'fit un 'té êloge qu'i' m'faut acater un chapé bein pus grand ! J'veurs r'mèrcier touos nos officiers et les membres d'aniet et les siens dreinement èrtithés, des conmités Exetchutif, Dramatique et Social, et l's Etudgiants étout, tchi font tant d'travas en organisant nos sethées, et à touos vous, les membres, tchi viennent ès réunions.

Nos v'chîn à ch't' heu au stembre - les jours raccourchent, l'heuthe a changi, les fielles breunâtres sont à tchaie, nos gardîns sont tout rôseleux l'matîn. Ch'est la saîson de la faîs'sie d'cidre et du nièr beurre, des prepathatis pour la Sethée d'Guy Fawkes et pour l'Eisteddfod, et Noué appraiche à grands pas.

Jusqu'à ch't' heu lé temps n'a pon 'té trop fraid, et j'n'avons pon ieu d'môtuthe ni n'tout, mais bein seux l'hivé veindra, et nou peut penser ès sethées siez nous, assis alentou du feu. I' faut qu'j'vos diche qu'j'n'aime pon trop r'garder la télévision aniet - p'têtre qu' j'en ai ieu assez de chenna dans m'n empliai dé d'vant ; j'aime bein mus travailli sus man compiuteu sus tchiquechose qu' j'ai trouvé hardi întethessant dreinement - ch'est l'histouaithe d'ma fanmil'ye et mes anchêtres. Ch'est p'têtre votr' faute, pâce qu'ous, les jèrriais, ou connaissez vos anchêtres jusqu'au temps d'Adam, et j'ai trèjous 'té jaloux dé chenna.

M'n întethet 'tait augmenté quand j'acatis un magazine tchi offrit un CD auve eune programme tchi pouorrait vos aidgi à faithe un arbre d'fanmil'ye. J'l'installis sus man compiuteu, et j'c'menchis à tapper les dêtails dé m'même - man nom, date et pliaiche d'naîssance et d'mathiage, education et empliai, maladies et opéthâtions - pon fort d'ches-là, Dgieu mèrcie. Pis les mêmes choses pour ma femme, Celia, et nos trais êfants. La préchaine fais qu'mes pathents vintent nos vaie, j'lus d'mandis d'm'aidgi auve lus dêtails étout. Comme d'raîson, j'lus d'mandis entouor mes grand-pathents, et j'tais chanceux, pâce qu'i' pouorraient m'dithe un tas d'choses entouor lus fanmil'yes. Ma mêthe avait 'té donné un arbre d'la fanmil'ye d'ma grand'mèthe tchi r'montait à 1793, l'année d'naîsance d'man grand-grand-grand-grand-pèthe James Muspratt, tchi fut né à Dublin, mais auprès eune vie d'aventuthe comme soudard dans l'armée d'Wellington en Espangne dans la Dgèrre d'Peninsule, et comme matelot ètout, i's'installit à Liverpool et batit eune mannifactuthe chimique. San fis et san p'tit-fis, man grand-grand-pèthe, continnuit à aggrandi lé commerce, et la compangnie d'vint pus tard un des trais parties fondateux de Imperial Chemical Industries. Pus tard, man pèthe m'donnit un portrait d'un vièr train de Great Western Railways, tchi portait l'nom Wilkinson, et tchi 'tait nommé pour un autr' grand-grand-pèthe, Sir Joseph Wilkinson, tch'avait c'menchi san travas sus l'c'mîn d'fé à l'âge dé tchînze ans, mais tchi d'vint gérant du Great Western. Quand i'mouothit, l'Prince d'Galles enviyit s'n aide-de-camp à s'n enterrement dans l'chînm'tchiéthe d'Highgate à Londres.

Du côté d'ma femme, j'ai 'té chanceux ètout; quand j'tais sus l'Internet un jour, j'viyis un nom tchi m'pathait familyi - un homme app'lé Bruce Denny voudrait faithe contact auve des gens tchi 'tait à faithe d's entchêtes entouor l'nom Denny - et j'savais qu'la grand'methe à Celia 'tait un Lucy Denny. J'êcrivis, et j'trouvis qu'Bruce, tchi d'meuthe à la Nouvelle Zélande, est un cousin d'ma femme, et j'avons êchangi un tas d'details entouor la fanmil'ye ramontant à 1683, d'origine d'Suffolk. La majorité avait 'té fermiers et marchands.

Nou dit souvent qu'i' faut saver le passé pour nos dgider à ch't' heu, et i'm'sembl'ye qu'il' sont rouais ou qu'il' sont paysans, ch'est les gens d'nos gens tch'êcliaithent not' c'mîn vèrs l'av'nîn.

Mèrcie pour m'aver êcouté aniet et à la prèchaine.


 

Anthony Scott Warren
2001
 

Viyiz étout:

 

Les Pages Jèrriaises