Bein seux qu'ch'tait des pommièrs tchi couvraient Jèrri au temps pâssé, mais y'a d'aut' frits tch'ont 'té tchultivé siez nous avaû l's années. Nou peut ofûche ardgui qu'les tonmates sont techniquement un frit, mais entre la botannie et la tchuîsinne, un couochon n'est pon un vèrmîngnon (ni eune lédgeunme nitout). Des potithons, des cocombres, des pînments et d's aubèrginnes sont botanniquement des frits et la rhubarbe est eune lédgeunme, mais un kiwi, ch'est-i' un ouaîsé ou un frit?
Les kiwis sont natis d'la Chinne et nou soulait l's app'ler des grouaîsil'yes d'la Chinne, mais des pliantes fûdrent pliantées en Nouvelle Zélande au c'menchement du vîngtchième siècl'ye et bétôt eûdrent un grand succès, assez pouor en exporter pouor l's années 1950s. Pouor la markét'tie, nou n'aimait pon des choses "Chinnouaises" pouor des raîsons politiques et don nou-s'app'lait les frits au run des m'lonnettes ("melonettes"). Mais il' avaient des drôles dé règl'yes, les Améthitchains et il' împôsaient d's împôts haûchis sus des frits tch'aient nom "berries" ou "melons". Les Nouvieaux Zélandais chèrchaient un nom tchi couôt'taient mains chi. Nou r'mèrtchit qu'la pé v'loûseuthe du frit d'kiwi r'sembliait pus à co au ouaîsé nâtionna, l'kiwi - et né v'là comme tchi qu'nou markétit l'frit ès Êtats Unnis à seule fîn d'payi mains d'taxe.
Achteu, la Nouvelle Zélande est l'pays tch'adgène lé traîsième pus grand amas d'kiwis dans l'monde - auprès la Chinne et l'Italie. I' n'y'a pon grande chance qué Jèrri pouôrrait faithe d'la compétition dans la tchultivâtion d'kiwis - mais tchi qui sait? Auprès tout, y'avait un temps quand Dgèrnésy 'tait haitchi pouor lé babaco. Vos r'souv'n'-ous du livre Dgèrnésiais d'èrchettes dé babaco?
Au temps pâssé, quand y'avait un tas d'monde en Ville, nous dîthait qué ch'tait la fête des tchoeurs, ou la foule des tchoeurs. ch'est en tchi la saîson des tchoeurièrs en Jèrri n'tait pon bein longue et quand nou tchilyait les tchoeurs et l's aboulait au marchi, nou-s'y'affliotchait en grand nombre pouor acater des tchoeurs.
En pâlant du tchoeuryi ou du grouaîsilyi, sus tchi qu'i' craîssent les kiwis? Logiquement ché s'sait un kiwitchi - mais tchi qu'a ouï d'un kiwitchi?
Geraint Jennings
Viyiz étout: