Les Pages Jèrriaises

L'Histouaithe d'Irlande 1500-1599

1500 Lé Comte dé Kildare payit vîngt vaques pouor lé mannuscrit d'un livret d'èrmièdes.
   
1513 Lé Comte dé Kildare, Garrett 'Lé Grand' fis-Gérald, mouothit. I' tait si piêssant qu'lé rouai d'Angliétèrre, Douard Quat', avait 'té forchi d'l'atchilyi coumme Seigneur Député en Irlande.
   
1536 Lé Parlément d'l'Èrformâtion c'mandit qué tchiqu's'uns des monastéthes saient freunmés et qu'lus tèrres saient données ès cheins tchi 'taient louoyaux à Henri Huit. Henri Huit fut dêcliathé l'chef d'l'Églyise d'Irelande étout.
   
1530 Grâce O'Malley, la Reine des Pithates, tchi n'acceptait pon la bâssêsse d'la femme parmi les gens, fut née.
   
1525 Des bouais pouor la tchèrpent'tie d'batchieaux fûtent exportés d'Ouexford, d'Ouicklo et d'Arklow en Angliétèrre et en Êcôsse.
   
1525 Du saûmon fut exporté dé Dublîn, d'Ouexford, d'Ouatèrford et d'Youghal à Bristo et à Tchestèr.
   
1525 Des pieaux d'vaque fûtent exportées d'la provînce d'Munstèr en Ûrope continnentale, et sustout en Castille.
   
1525 Des pieaux d'loup, d'èrnard, d'êtchutheu et d'martre fûtent exportées en Angliétèrre.
   
1525 Du fronment, du blié et d'l'avaine fut exporté d'Ouexford à Bristo.
   
1525 Du vîn fut împorté d'la France et d'l'Espangne.
   
1525 Du sé fut împorté dans touos les ports d'Ouexford à Sligo pouor la sal'lie d'paîsson.
   
1534 Eune Louai du Parlément dêcliathit qu'autchun rînmeux tchi d'mandait d'l'aîgue dans eune contrée habitée par d's Angliais es'sait mîns en prison.
   
1537 Eune Louai fut pâssée par lé Parlément d'Dublîn tchi dit qu'l'ensîng'gnie et l'èrligion dév'thaient avanchi l'usage d'la langue Angliaîche.
   
1537 Thomas fis-Gèrald (Tanmîn l'Souoyeux) et ses chîn-s oncl'yes fûtent exétchutés dans la Tou d'Londres.
   
1537 Les vielles couôteunmes Gaéliques èrfûtent întèrdites. Nus n'dait s'râser sa tête par-dessus ses ouothelles ni s'moustachi.
   
1537 Messire Anthony St Léger et les Commissionnaithes Rouoyaux Angliais vîntent en Irlande à seule fîn d'faithe eune entchête sus les taxes et la dêpens'sie du gouvèrnément.
   
1540 Roûry Mac Diarmada, un chef, convyit des rînmeurs et des sages et l's atchilyit.
   
1541 Henri Huit fut dêcliathé Rouai d'Irlande à un parlément constitué à Dublîn. Les gouvèrneurs Angliais avait 'té app'lés d'vant des Seigneurs d'Irlande.
   
1542 Les chefs Irlandais lus accordîtent auve la politique souô-disant d'Donner et R'donner. Lé chef donnit ses tèrres. Épis l'rouai r'donnit les tèrres en donnant un titre au chef. Lé chef avait don atchilyi la louai Angliaîche.
   
1549 Les Commissionnaithes du Rouai à Limerick quémandîtent qué: "Nul rînmeux ni autcheune aut' pèrsonne n'faîche des vèrsets ni autcheune aut' chose app'lée auran adréchis à autcheune aut' pèrsonne auprès l'Bouôn Dgieu excepté l'Rouai souos peine dé forfait dé tout s'n héthitage."
   
1550 Hugh O'Neill (O' Neill lé Grand), tchi calengit l'gouvèrnément Angliais duthant la Dgèrre dé Neuf Ans, fut né.
   
1556 Un Parlément constitué à Dublîn dêcliathit qu'les tèrres à O'Moore et O'Connor dans les Comtés d'Laois et d'Offaly es'saient confistchies et otchupées d'colonnistes Angliais.
   
1556 Les Comtés d'Laois et Offaly fûtent èrnommées la Comté d'la Reine et la Comté du Rouai en honneu d'Mathie, Reine d'Angliétèrre, et Ph'lippe, Rouai d'Espangne, l'houmme à Mathie.
   
1563 Eune Commission fut êtablyie à seule fîn d'faithe eune entchête dans l'ensîng'gnie en Irlande et d'examinner les projets pouor l'êtablyissement d'eune Unnivèrsité.
   
1570 Eune Louai du Parlément fut pâssée pouor fonder d's êcoles d'granmaithe.
   
1570 Les Présidences d'Munstèr et d'Connacht fûtent êtablyies. Chenna întroduîsit du gouvèrnément organnisé à l'Angliaîche dans l'Sud et l'Vouêt d'l'Irlande.
   
1571 Un a,b,c auve caticème en Irlandais fut publié. Ch'est l'preunmié livre înmprînmé en Irlandais. Lîzabé Preunmiéthe avait c'mandé la publyicâtion d'chu caticème Protestant.
   
1572 Les Chroniques des Quat' Maîtres racontent qué Conchubhar Ó Briain , Comte dé Thomond, avait pendu deux rînmeurs pouor tchique raîson innexplyitchie. Et viyant chenna, bein des poètes composîtent des vèrsets satiriques contre Ó Briain.
   
1580 Eune armée du Pape, tchi 'tait v'nue pouor aîdgi la révolte dé James fis-Maurice fis-Gérald, fut machacrée à Smerouick dans la Comté d'Kerry.
   
1583 Auprès la dêfaite d'l'èrbel'lie d'Desmond en Munstèr, trente mille pèrsonnes mouothîtent d'faim.
   
1586 La Colonnisâtion d'Munstèr c'menchit. Les tèrres ès fis-Gèralds fûtent confistchies auprès lus révolte faillie et données ès colonnistes Angliais.
   
1586 Messire Oualtèr Raleigh, un fanmeux Angliais et l'anmîn à Lîzabé Preunmiéthe, et Edmond Spenser, poète tch'êcrivit "La Reine des p'tits faîtchieaux", èrchûtent des grands lots d'tèrre dans la Comté d'Cork en rêsultat d'la Colonnisâtion d'Munstèr. Raleigh bâtit eune grand' maîson à Youghal. Il est s'posé d'êt' lé preunmyi à plianter des patates en Irlande.
   
1586 D's entrépranneurs (les cheins tch'entréprannaient d'lus conformer à cèrtaines conditions) coumme Messire Oualtèr Raleigh avaient à payi au gouvèrnément Angliais deux pénîns par acre (un mio mains qu'un pénîn par vrégie) pouor les tèrres qu'il' avaient r'chus.
   
1588 La Grand' Fliotte Espangnole fut naûfragie du bord d'la côte du Vouêt d'l'Irlande, v'là tchi causit un tas d'morts. Ch'est en tchi, même des cheins tchi fûtent saûvés d's ieaux fûtent exétchutés par lé Seigneur Député, Messire Ouoyamme fis-Ouoyamme.
   
1589 Conaire Ó Maoil Chonaire êcrivit eune lettre à Donnchadh Ó Briain, Comte dé Thomond, en s'pliaingnant qu'il avait 'té blioutchi par deux officièrs et condamné à l'exétchution tout sîmpliément pouor aver êcrit eune poésie en honneu d'Ó Ruairc.
   
1590 Eoghan Rua O'Neill, n'veu à O'Neill lé Grand, fut né. I' pâssit trente ans dans l'armée d'l'Espangne. I' rentrit en Irlande à seule fîn d'soudarder pouor la Confédéthâtion d'Kilkenny entré mil siêx chents quarante deux et mil siêx chents quarante neuf (1642 à 1649).
   
1591 Hugh O'Neill (O' Neill lé Grand) s'mathyit pouor la traîsième fais. Sa nouvelle bouonnefemme 'tait Mabel Bagenal, soeu du Marécha Messire Henri Bagenal. I' n'l'approuvit pon et r'fusit d'donner à sa soeu san mathiage.
   
1592 Lé Collège d'la Trinneté à Dublîn fut ouvèrt sus l'site du Monastéthe dé Toussaint d's Audgustîns tch'avait 'té suprînmé.
   
1594 La Dgèrre dé Neuf Ans, tchi finnit à la Batâle dé Kinsale, quémenchit. Chutte batâle s'n'allait m'ner à la dêfaite d'la tchultuthe Gaélique.
   
1598 Y'avait dans les douze mille colonnistes en Munstèr, l's hoummes, les femmes et les mousses înclius. I' tchultivaient et m'ttaient lé bestchias en pâtuthe. I' faîsaient du conmèrce d'bouais pouor la tchèrpent'tie d'batchieaux et d'bathis. I' payaient dans les douze mille louis (£2,000) en louoyi à la Couronne châque année.
 

Viyiz étout:

 

Les Pages Jèrriaises