En Améthique,
Lé 4 dé dézembre, 1964.
Moussieu l'Rédacteu,
Dans ma lettre du 3 d'juilet, 1964, j'vouos disais qu'autchun îndividu tch'à un nom Irlandais a la miyeu chance d'êt' êlu dans la vie politique en Améthique. Ch'est r'mèrquabl'ye, mais ch'est acouo d'autant pus d'même aujourd'aniet qué l'parti Démocrate en a l'au-d'ssus ès êlections. La grand' partie d's Irlandais sont membres dé l'Églyise Romaine, et, chose assez tchuthieuse pour eune églyise aussi consèrvatrice comme oulle est, ou' supporte tréjous l'parti Démocrate, tch'est socialiste et l'escliave des syndicats-ouvriyèrs et opposé au parti Républyicain, tch'est consèrvateur! Les choses étant d'même, quand l'défunt Président Kennedy fut êlu un tas d'Améthitchains craingnaient qu'j'allions aver eune dynastie d'Kennedys êtabl'yie pour vîngt-quatre ans! L'Président d's Êtats-Unis est êlu pour quatre ans à la fais, et est pèrmîns d'êt' êlu deux fais d'siète. V'la tchi li donne huit ans consétchutives à présider dans La Blianche Maiethon. Eh bein: Si l'pouorre John Kennedy, dé mémouaithe respectée, n'avait pon ieu l'malheur d'êt' assassiné il éthait certainement ieu ses huit ans comme Président. Il avait nommé san frèthe Robert Protchuleux-Général et ch'tîla éthait tout probabl'yement 'té êlu à sa pliaiche pour les préchains huit ans, et Douard, lé pus janne des trais, tchi gangnit s'n êlection pour Sénateur à Massachusetts contre John Cabot Lodge (d'scendant d'fanmille Jèrriaise et consèrvateur) éthait peut suivre pour un aut' huit ans!
J'en ai connu eune racachie, d'Irlandais, et j'ai trouvé d'bouans anmîns parmi ieux. Comme îndividus, i' sont génétheux, av'nants et hospitalyèrs. Il' ont un sens d'humour încompathabl'ye, mais, en général, nou peut affirmer tch'i' n'aiment pon l's Angliais, et ch'est un trait r'mèrquabl'ye dans lus caractéthes qué v'la tchi continue à s'faithe vaie même dans les généthations successives nées en Améthique. Iun d'mes bouans anmîns - li-même Irlandais dans l'âme mais pus large d'esprit qu'la pûpart dé ses compatriotes - m'en pâlait l'aut' jour, dé chu trait-là, et comme preuve qué ch'est dans l'sang dépis l'temps jadis, i' m'montrit eune lettre tch'il avait r'chue d'un couôthîn en Irlande. Oulle est rîsibl'ye, et j'ai pensé qu'ou' vaut la peine dé r'produithe. La v'chîn:-
|
Man chièr couôthîn. J'avons r'chu ta charmante lettre, et j't'èrmèrcions, ta tante Bridgit et mé, pour les sou qu'tu nouos as env'yé. J'avons ordonné neu' messes pour lé r'pos d's âmes de tes grand-grand-pèthe et grand'-grand'-mèthe. J'viyons qu'tu ès au haut d'l'êtchelle en Améthique! Qué l'Bouan Dgieu t'bénisse! J'espéthons qu'tu n't'en vas pon en puer d'ordgi et oubl'yiyer l'pays d'tes anchêtres! Tan couôthîn Tim O'Toole fut pendu à Londonderry la s'maine passée viyant tch'il avait tué un Agent d'Police. Piésse lé Bouan Dgieu béni s'n âme et maudithe Terrence O'Callahan tchi l'dênoncit! J'eunmes eune raide bouanne séthée quand j'allînmes vilyi siez Pat Muldoon quand i' mouothit. V'la tch'i' m'fît grand pliaîsi d'vaie ch't êtempèrque-là allouangni sus san liet d'mort. Ch'tait la preunmié fais qué j'l'avais veu atout sa grand' goule freunmée! Il est bein mus mort, ch't'îla. Il avait bein trop d'anmîns parmi les Protestants, et ch'est seux tch'il est auve lé Malîn Esprit! J'allais quâsi oubl'yiyer à t'dithe que t'n oncl'ye Danny tithit sus un touanne-câsaque l'aut' jour, mais i' n'mithit pon trop bein, et sa main trembliait viyant tch'il avait bu trop, et i' l'mantchit. Maudite bouaisson! Ta couôthînne Biddy nouos a fait présent d'un bieau p'tit garçon. Iun d'ches maudits officièrs Angliais-là atout lus belles rouoges câsaques prîns avantage dé lyi. I' voulait la mathier, mais san p'pèe dît 'Nannin! I' vaut mus aver un bâtard dans la fanmile qu'un bouigre d'Angliais!' Qué l'Bouan Dgieu l'bénisse et nouos donne la grâce qué l'pouorre pétit n'sache janmais qu'san p'pèe en n'tait iun! Lé Père O'Flaherty, tchi t'bâptîsit, est faibl'ye d'esprit. I' r'dotte, et t'env'yis sa bénédiction. Kathleen O'Malley, la mousse tch'allait à l'êcole auve té, a mathié un Angliais. Ou' n'prospéth'tha pon! L's affaithes vont mus à ch't heu. Les stations d'police et l's églyises protestantes dans l'Comté d'Cork ont toutes 'té brûlées à râs d'tèrre! J'espèthe qué tu-ès en bouanne santé et qu'tu n'oubliethas pon à nouos env'yer des sou quand tu pouorras. Qué l'Bouan Dgieu prenge souain d'té et t'prêsérve d'eune mort subite! Tan couôthîn d'Irlande. |
Il en faut d'toutes les sortes pour faithe un monde, Moussieu l'Rédacteu, et i' n'y'a pon d'doute qué ch'est seux que l's Irlandais, tch'ont si bein peupl'yé New York qué y'en a pus là qu'à Dublin, ont aîdgi - auve l's Angliais, Écossais, Jèrriais et aut' nationalités - à nouorri l'creuset tch'à fait d'l'Améthique un pays fort, robuste et prospèthe!
George d'La Forge
Viyiz étout: