Les Pages Jèrriaises

Bridgette et la Fontaine



“Pour té, tu m'fais penser à la Bridgette, la femme à Tim O'Flakerty: pas dé modération,” disait un jour Rafferty à san vaisin Nolan; “as-tu jamais oui chu conte-là!”

“Nennin,” responnit l'autre, “tch'est qu'on fit?”

“Eh bein,” dit Rafferty, “yià longtemps qué chonna s'arrivit: ch'tait du temps des miracles. Un jour que Tim sé proumm'nait dans un biau p'tit vallon pas bein lyien d'sa baraque, il avisit unn' pétite fontaine qui n'avait jamais veue d'vant. L'iaue qui sortait dé la source était blianche et cliaire, et lé solèt en lsant d'sus faisait jouer des p'tits arc-en-clien tout alentou. Coumme i faisait grand caud et qué Tim avait sai', i s'mins à g'nors au bord dé la fontaine et i but à peu près unn' pinte dé chutte iaue là. Jamais d'sa vis i n'avait bu rein dé si raffraichissant, mais en s'en r'allant siez li, i' qu'menchi à s'trouver un mio drôle. – Lé v'là qu'entre dans la tchuisine, mais sa femme, à sa grand' surprinse, né lé r'connaissait pas.

“Bonjour, moussieu,” l'y dit Bridgette, en faîsant la révérence, “tchest quj'peux faire pour vous!”

“Tu pouorrais mé dounner vite à mangi,car j'ai faim,” s'fit Tim, né s'doutant dé rein.

“Oui djià, moussieu, dans unn'minute, mais moussieu.”

“Allons, Bridgette, tch'est qu'tu-as? Jé n'sis pas moussieu,mais Tim,té'n-houmme!”

“Té, tu'ès Tim?” dit d'unn' voix incrédule la bouann' femme. “Eh bein,ma fé, si tu'ès Tim, tu'as bein changi dépis à matin. Ouêsque tu'as 'tait té ajeuni coumm chonna?” – et prennant un mio dé mireux dé d'sus l'ais d'foyi oulle dounne à s'enn' houmme. En sé r'gardant dédans Tim mantchi dé lé laissi tchais dans l'aire: i rs'é r'counnaissait pon li-même. I n'avait pus les qu'veux rouôge avait touôné blianc, ses yiers erpétilliaient, pas unn' dent né l'y mantchait, et en bouôgeant brasou gambes i n'sentait pus ses roumatisses!

“Djiantre?” séfit-y, “ch'est l'iaue dé la p'tite fonctaine qu'a fait chounna! Biddy, ma vieille, tchitte tan travâs, et va t'en vite en bère étout pour en r'véner toute fraîche et belle, tu trouv'ras lafontaine dans lp'tit vallon par là. Allons, dèspêche té!”

Et v'là don la bouann'femme qui file ossi vite qué ses vieilles gambes pouvaient aller, et Tim s'assied transchillement et allume sa pipe. I l'en fumi une pipèe, deux, trais, quatre, et unn' heure sé pâssi mais Bridgette né r'vénait pas. Tout gênè, Tim s'en fut pour la cherchi. Arrivé à la fontaine i r'garde partout, pas d'femme, nulle part, mais accroupie lé long du fossé i vit unn' pouôre pétite fillede chinq ans tchi plieurait et sé lamentait.

“Tch'est qu'tu'as, fillette, ès tu malade?” ly d'mandi Tim, en la prenant dans ses bras.

“Est-che qué tu né mé r'counnais pas, Tim!” l'y dit l'esfant en lé t'nant bein dé par lé co.

“Ma fé, nennin, pas du tou,” respounnit Tim.

“Mais Tim, jé sis ta femme.”

“Té pétite, tu'es Bridgette?”

“Oui, oui, mais j'en ai bu trop dé hutte iaue là, et jé m'sis bein trop rajeunnie!”

Et lé pouôre Tim en s'en touônant du bord dé la fontaine vit qué la source était à sec! Vaire, djià et ou n'a jamais coulé d'enpis!!

“Les femmes,” quémenchi Nolan à Rafferty quand le conte fut fini – “les femmes...” mais je n'sais pon chein qui conti eutouôre les femmes car oprès chounna jé m'en r'vint!...

 

Les Chroniques de Jersey 1/11/1941
 

Viyiz étout:

 

Les Pages Jèrriaises