| 1500 | Eune partie d'Galles fut gouvèrnée par l'rouai d'Angliétèrre. L'aut' partie d'Galles fut gouvèrnée par des seigneurs îndépendants. |
| 1501 | Henri Sept 'tait l'rouai d'Angliétèrre (mil quat' chents huiptante chîn à mil chîn chents neuf). I' fut né Henri Tudor au Châté d'Pembroke en Galles en mil quat' chents chînquante sept (1457) |
| 1505 | Les gens d'Galles n'avaient pon les mêmes drouaits qu'les Angliais. Chenna changit pouor des contrées d'Galles entré mil chîn chents chîn (1505) et mil chîn chents huit (1508) |
| 1509 | Henri Sept mouothit. Lé nouvieau rouai d'Angliétèrre fut san fis Henri Huit (mil chîn chents neuf à mil chîn chents quarante sept, 1509-1547) et i' gouvèrnait Galles étout. |
| 1510 | Au c'menchement du seizième siècl'ye Galles 'tait un pays Catholique - mais l'Églyise 'tait bein pauvre auve des faillis prêtres. |
| 1530 | La puspart des gens d'Galles gângnaient lus vie en fèrmant, et v'là tchi continnuait d'même pouor les deux siècl'yes à siéthe. |
| 1536 | La populâtion d'Galles 'tait dans les deux chent septante huit mille pèrsonnes (278,000) |
| 1536 | Entre mil chîn chents trente six et mil chîn chents quarante trais (1536-1543) lé Parlément à Londres 'unnit' Galles et l'Angliétèrre. V'là tchi 'taient les Louais sus l'Unnion. |
| 1540 | Pouor chu temps-chîn, Henri Huit 'tait l'chef d'l'Églyise en Angliétèrre et en Galles. Touos les monastéthes en Galles avaient 'té freunmés d'vant mil chîn chents quarante. |
| 1543 | Coumme eune partie des Louais sus l'Unnion, Galles èrchut un nouvieau système dé cours dé justice tch'avaient nom Grand' Sessions. |
| 1547 | Lé preunmié livre înmprînmé en Gallouais fut Yn y llyfyr hwn (Dans chu livre) |
| 1547 | Duthant l'règne dé Douard Six (mil chîn chents quarante sept à mil chîn chents chînquante trais, 1547-1553) Galles fut changi en pays Protestant - i' n'y'avait pon d'opposition à chenna en Galles. |
| 1550 | Chîn chents tonnes dé tchèrbon fûtent exportées d'la Baie d'Souansea au Sud d'Galles - un amas tch'allait haûchi jusqu'à trais mille tonnes pouor mil siêx chents sept (1607) |
| 1551 | Dans les vîngt pouor chent d'la populâtion d'Galles 'taient d's aûngnièrs d'tèrre, des professionnels, des marchands et d's artisans. Huiptante pouor chent d'la populâtion 'taient des pouôrres campangnards. |
| 1553 | Souos la Reine Mathie Tudor (mil chîn chents chînquante trais à mil chîn chents chînquante huit) Galles èrd'vînt un pays Catholique. Oulle exétchutit trais Protestants en Galles. |
| 1558 | Entre mil chîn chents chînquante huit et mil siêx chents trais (1558 à 1603) Lîzabé Preunmiéthe 'tait la Reine d'Angliétèrre. Oulle 'tait Protestante et tchiques Catholiques tchittîtent Galles pustôt qué d'rester dans un pays Protestant. |
| 1560 | Carmarthenn 'tait la pus grand' ville en Galles auve eune populâtion d'pus d'mille pèrsonnes. |
| 1560 | La faîs'sie d'taile 'tait eune îndustrie împortante du mitan d'Galles et au Nord-Vouêt étout. |
| 1563 | Lé Parlément d'la Reine Lîzabé Preunmiéthe quémandit qu'la Bibl'ye sait translatée en Gallouais. |
| 1566 | Eune cartchaîson d'paîsson fut transportée en baté à Milford dans l'Vouêt d'Galles d'Tèrre-Neuve en Améthique. |
| 1567 | Y'eût un eisteddfod à Caerouys. Y'avait acouo en Galles un grand întéthêt dans la chant'tie et l's èrcitâtions. |
| 1570 | Des fournieaux pouor la fond'die d'fé fûtent bâtis dans la contrée d'Pontypool dans l'Su'êt' dé Galles. |
| 1571 | Galles n'avait pon s'n unnivèrsité à li, mais l'Collège d'Jésû fut fondé à Oxford pouor l'ensîngn'gnie des Gallouais. |
| 1571 | L'êl'vage 'tait împortant pouor l's aûgnièrs d'tèrres en Galles. Morus Ouynn avait mille deux chents neu bêtes à cônes dans la contrée d'Doloueuthélann. |
| 1571 | D'pis les Louais sus l'Unnion des Gallouais pouvaient dév'nîn des Députés à Londres. Entre mil chîn chents septante-tch'iun et mil siêx chents trais (1571 à 1603) y'avaient dans les trente Députés Gallouais à travailli dans l'Parlément. |
| 1573 | La preunmié carte géographique dé Galles fut înmprînmée par Douard Lhuyd à Anvèrs. |
| 1577 | Iun des pus grands Gallouais d'l'Èrnaîssance 'tait Jean Dee. I' 'tait întérêssi dans l'histouaithe et la scienche et publyit des livres. |
| 1579 | Les gardeurs d'bêtes 'taient împortants pouor l'êconomie d'Galles. Il' avaient à m'ner les bêtes à cônes Gallouaises ès marchièrs en Angliétèrre. |
| 1580 | Dans la ville dé Poullhéli, dans l'Nord-Vouêt d'Galles, y'avait eune boutique, mais y'en avait chînq pouor l'année mil siêx chents. |
| 1580 | Lé poète Jean Tudur s'pliaignit qu'i' y'avait d'mains en mains d'rînmeurs Gallouais. |
| 1584 | Eune histouaithe dé Galles fut publiée – Historie of Cambria par Dâvi Powel. |
| 1584 | Du rouoge tchuivre d'Cornouaille 'tait forgé dans des fournieaux à Neath dans l'Sud d'Galles. |
| 1585 | Lé mangi 'tait à court en Galles entré mil chîn chents huiptante chînq et mil chîn chents huiptante sept (1585 à 1587) et mil chîn chents nénante trais et mil chîn chents nénante sept (1593 à 1597). |
| 1588 | Eune vèrsion Gallouaise d'la Bibl'ye fut publiée, dé tchi la pus grand' partie 'tait l'travas d'Ouoyamme Morgan. |
| 1588 | Entré mil chîn chents huiptante huit et mil siêx chents iun (1588 à 1601) l'chein auve lé pus grand pouvé en Galles 'tait l'Comte dé Pembroke. I' 'tait Président du Conseil d'Galles entré mil chîn chents huiptante six et mil siêx chents iun (1586 à 1601). |
| 1590 | Quâsiment touos les cheins d'Galles né pâlaient qu'lé Gallouais, mais l'Angliais 'tait la langue officielle du pays s'lon les Louais sus l'Unnion. |
| 1593 | Ouoyamme Davies, Catholique Gallouais, fut exétchuté à Bieaumathis. |
| 1595 | Galles 'tait un pouôrre pays et don i' n'y'avait pon d'grands bâtisses en Galles à chu temps-là. Ieune d's exceptions 'tait Plas-maour à Conouy (bâti entré mil chîn chents septante six et mil chîn chents nénante chînq). |
| 1599 | Nou crait qu'dans les deux chents douze mille quat' chents chînquante pèrsonnes en Galles 'taient des Protestants tch'allaient à l'églyise rédguliéthement. Y'en avait huit chents huit Catholiques tchi n'allaient pon ès templ'yes Protestants. |
| 1600 | Pouor la fîn du siècl'ye un fliotchet d'Angliais avaient r'mués ès comtés coumme Denbigh et Flint. Mais y'avait étout des chents d'Gallouais tch'avaient r'mué en Angliétèrre duthant l'siècl'ye. |
Viyiz étout: