Les Pages Jèrriaises

Jouaie et Dêtresse

 

Pat O'Grady sé sentant près d'sa fin, voulait mettre sa bouann' femme Bridget au couorant dé l'êtat dé lus finances dévant patchi ses vailes. Et don, pour chonnna, oull' tait assise au pi'd d'san liet, ardoise et crayion en main, toute prête à prendre note dé chein qué san bouan houmme l'y cont'rai....

"Met bas, Bridget," qu'i dît, "qué Mike Sweeney nos dait djièz neu' ch'lins, chinq pennys et d'mi. Y'i est-tu?

"Oui, Pat," qu'ou respounni, et ajouôti réligieûsement, "jé bénis la Providence qu'ou té dounne bouanne mémouaire jusqu'à la fin."

"Tom O'Flanagan," erprins lé vieux, " nos dait seize chélins, djiès pennys," - "Les saints sont bein bons," disait Bridget, " qu'i té gardent dans tan bouan sens coumme chounna."

"Jim Ryan," continui l'vieux, " nos dait onze chélins."

"Qué l'anges t'emportent tout drait au Paradis, Pat, pour raisonner occouo si bein," s' fît Bridget.

Et la liste allit d'maîme pour un p'tit d'temps, la vielle, toute contente, laissait couorre dés r'mèrcièments à touos les Saints oprés châque soumme qu'ou mettait bas.

"Là," s'fît Pat, "comptes-mé tout chounna ensemble et dit mé chein qu'la qui fait."

Et Bridget s'mint bein vite à chiffrer, et unn' fais finie :- "V'là qu'i fait " tant," qu'ou dit, - "Eh bein," Pat erquémenchi, "ach'teu jé d'vons à Peter McQuin, treize chélins quatre pennys....."

"Bouan père de grâce," criyit Bridget en dêtresse, "v'là justément chein qué j'appréhendais! man pouôre vier bouanhoumme erdotte!"

 

J. P.
1920.

 

Viyiz étout:

  • Eune Touônnée à Dublin

     

    Les Pages Jèrriaises