Le Ménage ès Feuvres, St Ouën.
Lé 2 d'septembre, 1967.
Moussieu l'Rédacteu,
J'ai souvent oui dithe, mème par des gens d'églyise tchi dév'thaient saver mus, qu'l'Églyise Anglyicanne fut fondée par lé Rouai Henry VIII. Tchi niolîn!
Ch'tait l'Pape Cliément VII (Pape dé 1523 à 1534) tch'était sus l'trône pontifical en 1534 quand Henry VIII tchestchionnit la r'cliâme d'autorité ecclésiastique universelle dé Rome, et l'pape ne fit autcheun êffort pour faithe les fidèles tchitter à prendre les Sacréments dans l'Églyise d'Angliétèrre! Si Henri VIII avait fondé eune nouvelle églyise, ch'était 'té ch't'année-là, et l'pape n'éthait janmais permîns à ses fidèles dé s'en touôlli! Au contraithe, lé préchain pape, Paul III (1534-1549), promoteur du Concile dé Trente, permînt ès catholiques dé continnuer à la hanter et y prendre les Sacréments. La mème chose continnuit souos l'Pape Jules III (1550-1555), et Marcel II, pape pour 22 jours auprès s'n élection en 1555. San successeur, Paul IV, régnit jusqu'à 1559 et fut rempliaichi par Pie IV (1559-1565). I' mouothit en 1565 et 'tait l'siexième pape dépis qu'Henri VIII 'tait supposé aver fondé l'Eglyise d'Angliétèrre, et les Catholiques Romains avaient 'té bâptisis, confirmés, r'chu l'absolution et avaient prînt la Sainte Communion d'dans pour pus d'trente ans et Rome n'avait fait autcheun êffort pour dénoncer la catholicité dé la supposée nouvelle églyise ou empêchi les fidèles dé la hanter! Si ch'la n'est pon eune preuve qué l'Saint Siège n'èrgardait pon l'Églyise Anglyicanne comme étant eune nouvieauté fondée par Henri VIII, mais qu'oulle 'tait la vraie églyise nationale, catholique et apostolique du pays, comme l'étaient l's églyises d'Italie (appelée Romaine), d'Espangne et d'La France, i' n'y' en étha janmais!
Ch'tait l'Pape Pie V (1566-1572) tchi, en 1570, ayant pèrdu espéthance dé faithe l's Angliais lus soumettre à la tyrannie d'Rome, prononcit l'excommeunicâtion contre la Reine Élizabeth et l'Eglyise d'Angliétèrre - trente-siez ans auprès qu'Henri VIII avait ieu ses chicangnes auve lé pape dé san temps - et pour la preunmié fais, en 1570, les fidèles fûdrent d'fendus d'hanter l'Églyise Anglyicanne!
I' pathait qué l'chrêtchienisme avait 'té apporté en Angliétèrre par les Galouais tch'avaient 'té convértis par l'Apôtre St. Paul. Y'a mème eune légende tchi nouos dit qu'St. Joseph d'Arimathie, tch'était marchand, soulait visiter l'Angliétèrre dans l'couothant d'ses viages dé commèrce, et tch'il y mouothit et fut entèrré dans l'chînm'tchièthe dé l'Abbaye dé Glastonbury. L's anciens du vaisinné d'chutte vielle abbaye-là pathaîssent aver pensé qué Notre Seigneur Li-mème avait probabliément viagi auve St. Joseph quand Il 'tait mousse et mînt pid à tèrre en Angliétèrre. St. Joseph 'tait supposé aver 'té S'n oncl'ye.
Quand St. Augustîn, env'yé en Angliétèrre par lé Pape Grégoire lé preunmyi (590-604) pour convèrti l's Angliais, y mînt l'pid à tèrre, i' trouvit l'églyise (i' n'y avait qu'eune églyise chrêtchienne dans l'monde dans chu temps-là - les non-conformistes, ou souôdisant “libres” églyises, fîdrent lus appathences bein pus tard) déjà êtabl'yie dans difféthentes contrées du pays. Nou peut don dithe qué l'Églyise d'Angliétèrre avait dêjà ieu san c'menchement longtemps d'vant l'arrivée d'St. Augustîn, et ou' n'a janmais ieu autcheun aut' nom qu'l'Églyise d'Angliétèrre, sénon Anglyicanne - tchi veurt dithe la mème chose. Ou' n'a cèrtainement janmais 'té l'Églyise dé Rome! S'n excommeunicâtion par ch't églyise-là dans l'temps d'la preunmié Reine Élizabeth né changit pon san caractéthe catholique, et la succession apostolique dé s'n hiérarchie a 'té souangneusement continuée jusqu'ou jour d'aniet. S'n indépendance et ses privilèges fûdrent affirmés par lé Rouai Jean à l'instance dé ses barons dans La Grande Charte à Runnymede en 1215.
Mais pour èrvénîn à St. Augustîn. Lé Rouai Ethelbert li donnit eune vielle églyise déjà êtabl'yie à Cantorbéry. Il en fit san siège êpiscopal et d'vînt l'preunmyi êvêque dé Cantorbéry vèrs l'année 605.
Nouot' églyise n'est qu'protestante en ch' tchi concèrne cèrtaines crianches et couôteunmes tchi n'sont pon autorisées par Les Saintes Écrituthes ou tch'i' n'ont pon d'originnes êtabl'yies d'dans, et en ch'tchi concèrne la crianche dans l'înfaillibilité des Papes de Rome. L'excliusion d'ches crianches-là nouos a laîssi un pur catholicisme tch'est pus nettement d'accord auve les Saintes Écrituthes, et tch'est explyitchi en dêtail dans L'Symbole dé St. Athanase à la page 45 dé La Litourgie. Là, ou' vèrrez - au bas d'la page 46 - s'ou' voulez prendre la peine dé r'liéthe vouot' Litourgie, qué “Telle est la Foi Catholique: laquelle quiconque ne croira pas fidèlement ne pourra être sauvé!”
Tel est l'héthitage et l'obligâtion dé touos Anglyicans pratiquants tchi r'citent lé Symbole des Apôtres (et l'chein d'St. Athanase) Dînmanche sus Dînmanche!
J'veurs bein admettre qué les gens d'à ch't heu ont l's idées pus larges qué les cheins du temps jadis tch'ont fait les Litourgies, et qu'l'esprit œcuménique dé nouos jours est admithabl'ye. I' faut penser qué l'rappraichement dé touos les sectes chrêtchiens au sein d'l'Églyise Universelle est d'sithabl'ye, et qu'ch'est nouot' déver d'travailli pour tel rappraichement à cor et à crîn. Ch'est don à l'întéthêt d'chaque églyise îndividuelle d'examinner s'n originne, sa constitution, s'n caractéthe et ses crianches dévant penser à êprouver à s'accorder auve les autres, à seule fin d'êviter les malentendus pus tard!
George d'La Forge
Viyiz étout: