Lé Ménage ès Feuvres
St. Ouën
Lé 13 juliet, 1974
Moussieu l'Rédacteu,
Quand j'vai l's annonces dans la gâzette des distractions dé tchi qu'nou peut joui au sé en Jèrri ches jours - des concèrts dans l's aubèrges où'est qu' nou vait un tas d'hardelles à danser, à maîntchi vêtues, à la discorde d'un tas d'brit qu' les jannes appellent d'la mûsique, et des jannes hommes barbus et à longs g'veux à sauticoter sus eune strade comme des marmoûsets en jouant des tambours et des mandolinnes - j'mé d'mande comment qu' des gens peuvent payi des prix fos pour êt' assujettis à des tortuthes dé même. Tch'est tchi sait? P't-êt' qué la bouaisson, tch'est partie d'la séthée d'divèrtissement, endort la finnesse d'esprit des cheins tch'aiment pâsser lus temps d'même. Enfîn, eune chose est cèrtaine - pèrsonne n'est forchi dé l'faithe et des vièrs campangnards comme mé trouvent bein pus d'pliaîsi à rester trantchilement à s'caûffer au coin d'l'âtre.
Si l's anciens pouvaient r'vénîn i' s'créthaient dans un aut' monde. J'y pense souvent, ès anciens, car jé l's ai connus et veu en ieux des qualités tchi n'sont pus considéthées comme étant d'împortance à ch't heu. La vie 'tait duthe pour nouos anchêtres. I' travaillaient d'longues heuthes pour des p'tits gages ou pour faithe valer lus tèrres. Un tas d'fèrmièrs tchi sont prospéthes au jour d'aniet daivent lus prospéthité à ches vièrs-là tch'ont travailli comme des mèrcénaithes dans lus vivant pour lus laîssi la fèrme tchi lus a garanti la bouanne vie, et bein souvent ou lus a 'té laîssie franche dé toutes rédévances sauf les drouaits seigneuriaux.
Quand v'nait l'sé, lus pliaîsi ès anciens, 'tait d'lus assiéthe au pid du feu. L'bouanhomme feunmait sa pipe et la bouannefemme sé m'ttait à ouvrer ou rhabilyi des cauches et faithe sa couôtuthe. Lé tchian ronfliet sus sa natte et avait l'trembliot quand i' sé m'ttait à rêver d'l'os tch'i' s'attendait d'aver quand la maitrêsse lé hallait dé d'dans la soupe, et il espéthait tch'i' y'éthait acouo un mio d'nèr dé restant d'ssus. La catte sus san couossi au coin d'l'âtre à la chaleu du grais, filait san rouet. Peut'i- y'aver rein d'pus paîsibl'ye et pliaîsant?
Dé temps en temps la bouannefemme allait ès assembliées d'priéthes. Y'en avait siez l's uns et siez l's autres. Quand j'tais mousse ch'tait pûtôt siez les Méthodistes Wesleyens ouaithe tch'i' pathaît qué l's Anglyicans en avaient ieu longtemps d'vant. Ès Landes, où'est qu' jé d'meuthais, ch'tait siez les Wesleyens mais l's Anglyicans y'allaient souvent. Il avaient prîns l'habitude dé y'aller d'vant qu' l'Églyise dé St. George fûsse bâtie viyant qu' l'Églyise Parouaîssiale 'tait si liain d'siez ieux. Nou marchait partout dans chu temps-là et il éthait prîns la grand' partie d'eune séthée à y'aller et r'vénîn.
J'm'èrsouveins d'aver ouï tch'i' y'avait eune assembliée y'a chent ans ou pus ès Palliéthes siez la tante et marraine au Juge Francis Vibert Le Feuvre, Missis Edouard Vibert, née Mary L'Feuvre, et qué ch'tait là qué l'Cap'taine Tzit-Tzer, Salutiste Angliais mais d'nâtionalité Allemande, fut fait à connaître ès Wesleyens par lé p'pèe au Juge. L's anciens l'appelaient Cap'taine Zigue-Zeugue. It 'tait un bel homme et les femmes en 'taient toutes êbliouies, et v'la tchi li'aîdgit à êtablyi l'Armée du Salut dans un p'tit bâtisse dans l'bel dé La Vielle Fontaine.
Mais y'avait plusieurs assembliées d'priéthes dans la contrée des Landes. La cheinne tch'était la pus près d'siez Papa à La Forge 'tait siez l'Sieur Jean L'Cornu à North West View, d'l'aut' côté d'la route du Ménage ès Feuvres, et ch'tait là qu' Manman allait d'temps en temps. Eune dgiêxaine dé femmes du vaîsinné lus trouvaient là et i' prannaient lus tou à dithe eune priéthe. Ch'tait dans l'parleux, à la veue d'eune lampe à parafinne tchi n'êcliaithissait pon trop bein, et y'avait un cèrtain air dé mystéthe pour mé tch'était mousse dans l'temps. Les femmes tch'avaient des rhonmatisses dans les g'nouors restaient assises, mais les pus robustes lus m'ttaient à g'nouors en d'vant lus tchaises et s'accoutaient sus l'siège pour les priéthes.
A la pliaiche dé dithe eune priéthe y'en avait tchi liêsaient un chapitre dé d'dans la Bibl'ye. Manman, tch'était accouôteunmée à La Litourgie Angliyicanne et à La Nourriture de l'Âme liêsait des priéthes dé d'dans ieune ou l'autre. I' m'sembliait tchi n'en finnithaient janmais, et j'avais Thomas dans les cricots quand v'nait la maîntchi d'la séthée.
Auprès que l'drein Amen avait 'té prononcé, y'avait tout pliein d'caqu'téthie parmi les femmes, mais Manman lus dîsait tch'il 'tait temps pour lyi d's'en aller car j'dormais sus but, et il 'tait grand temps dé m'mett' au liet. Heutheusement, i' n'y avait qu' deux pas à r'vénîn à La Forge en crouaîsant l'clios driéthe North West View. Un p'tit c'mîn l'long du fossé m'nait tout drait à La Rue Féthiéthe où'est tch'était La Forge, appélée Mossgiel à ch't heu.
La grand' partie des priéthes dans l'assembliée 'taient en Français mêlé atout un mio d'Jèrriais. Les lectuthes dé d'dans La Bibl'ye, La Litourgie et La Nourriture de l'Âme 'taient en Français. Nou n'ouiyait pon d'Angliaîchin'nie dans chu temps-là!
George d'La Forge
Viyiz étout: