San Antonio,
Lé 20 d'novembre, 1982.
Texas, USA.
Dans l'chapitre sus la r'ligion dans man livre "Jèrri Jadis", dans l'articl'ye entouôrre l' Armée du Salut, j'disais qué j'avais tréjous ouï qué ch'tait dans l'temps d'Maît' Philippe Le Feuvre, péthe du défunt Francis Vibert Le Feuvre, Juré-Justicier, dé mémouaithe respectée, qué l'Armée s'était établyie à St Ouën. Lé Sieur Philippe Le Feuvre 'tait iun des pilièrs du Méthodisme Wesleyen à St Ouën, et ch'tait à li qu' un missionnaithe Salutiste, lé Cap'taine Tsit-Tser (l's anciens avaient d'la peine à prononcer chu nom-là et il' l'appelaient "Zig-Zag", prononcé comme en Angliais), sé présentit.
Lé Cap'taine, Allemand d'pathenté originne, pathaît-i' 'tait charmant et d'belle présence. I' d'vînt populaithe, prîncipalement parmi les femmes, et fut r'chut à bras ouvèrts, et organnisit, auve l'aîgue du Sieur Le Feuvre, des assembliées d'prièthes siez les Wesleyens du vaîsinné.
Ch'tait probabliément entre 1885 et 1888 qu'eune salle fut êtablyie, pour l'Armée à condithe ses sèrvices, dans l'bel dé la propriêté La Vielle Fontaine, siège dé la fanmil'ye Philippe Le Feuvre (i' mouothit en 1888). Ouaithe qué les Salutistes fûssent dévoués, lus congrégâtion n'duthit pon à St Ouën et i' s'en fûdrent en ville, où'est tch'i' prospéthent acouo au jour d'aniet.
Eune chose qué jé n'savais pon est qué l'Armée du Salut avait ieu tchique activité en Jèrri d'vant man temps. Lé Mâjeur Arthur Maitland Le Feuvre (p'tit-fis dudit Sieur Philippe Le Feuvre) et sa danme, Mâjeur dans l'Armée étout, auprès aver pâssé d's années en Afrique à travailli pour lé Bouan Dgieu parmi l's Afritchains, n'étaient pon contents d'lus mett' à la tâche ordinnaithe dé l'Armée en Angliétèrre. Ils ont ouffèrt dé travailli pour san bein en France, et l'Mâjeur m'a env'yé un p'tit livret întitulé "Le Don des Langues", publiyé en langue Française et êcrit par lé Mâjeur Allister Smith, dans tchi tch'i' y'a un chapitre, "Les Îles Anglo-Normandes à la Rescousse". Chu chapitre donne un accompte dé la contribution qué d's officièrs, originnaithes des Îles, apportîdrent au succès des travaux d'l'Armée en France et en Suisse.
La gâzette "Le Salutiste" du mais d'novembre, 1879, nouos raconte chu livret, donne un rapport au sujet d'l'ouvèrtuthe d'un poste à St Hélyi, et un commentaithe sus l'attitude dé la population tchi, malheutheusement, ne donne pon dé dêtail dé ch't attitude. Mais i' faut penser qu' oulle 'tait favorabl'ye, car il est mentionné qué l'Général Ouoyamme Booth avait dêjà condit des sèrvices d'împortance dans l's Îles dans chu temps-là. Lé rapport dans chutte gâzette dé 1879 mentionne qué les Salutistes "demandent des prières spéciales pour Jersey, non seulement pour son propre bien, mais afin que l'oeuvre dans cette Île contribue à prendre pied sur le sol de France."
Appathemment, lé Bouan Dgieu exaucit ches prièthes, car les Cap'taines Thom, Becquet, Boutmy et Mahy, et l'janne Mâjeur et Madanme Pièrre Bisson fûdrent env'yés en France et en Suisse. Cap'taine Bétchet 'tait dêjà en Suisse en janvyi, 1883, nouos dit lé p'tit livret. I' s'en allit à Neuchâtel auve tchiques camarades à la siette d'eune fausse pétition env'yée au Coronel Clibborn par des farceurs étudiants, mais il' y restîdrent quand-même à avanchi l'oeuvre d'l'Armée.
Lé Mâjeur Bisson mouothit janne à Lyon en France. À Paris les rêunions 'taient souvent disteurbées. Ch'tait la même chose en Suisse. Cap'taine Bétchet êcrivait d'Valence: "Tèrribl'yes bastaudes ichîn à ces sé. La police n'a pon fait san d'vé. Nouos f'nétres sont en brédelles et il' ont forchi la porte d'la salle. Împossibl'ye dé continnuer l'sèrvice".
J'n'ai pon l'run dans chutte lettre pour èrcorder touos les troubl'yes qué ches braves pionnièrs eûdrent à supporter. L's officièrs fûdrent même m'nichis violemment dans plusieurs postes et eûdrent à êt' protégis par la police. Lé Cap'taine Bétchet tait un brave homme. Appathemment, i' survêtchut les bastaudes.
Jé n'sai pon dé tchi nâtionalité tch'était l'Cap'taine Boutmy. Lé Cap'taine Mahy 'tait Dgèrnésiais. Enfin, nou peut dithe qué des Jèrriais et Dgèrnésiais ont aîdgi à êtablyi la fanmeuse Armée du Salut - tchi fait tant bein partout l'monde - en France, et ch'est assez r'mèrquabl'ye qu'un Jèrriais d'nouos jours, lé Mâjeur Arthur Maitland Le Feuvre, p'tit-fis d'un vièr St Ouënnais tch'aîdgit à êtablyi l'Armée en Jèrri y'a pus d'huiptante ans, s'est dêdié à continnuer san bouan travas en France.
Viyiz étout: