Ottawa, Ontario,
Canada.
Lé 11 dé mai, 1968.
Moussieu l'Rédacteu,
I' faut penser qu'ch'est dans la natuthe des choses humaines qué nou rencontre des gens tchi vont à l'églyise et d'aut' tchi n'y vont pon. Et y'en a qué ouaithe tch'i' n'vont pon ès lieux d'tchultes, il' ont quand-mème eune crianche en Dgieu, et y'en a tchi n'craient ni à Dgieu ni à dgiabl'ye!
Y'a du monde dé chapelle, étout, tchi craient qu'les cérémonies dans l's églyises Anglicannes, Orthodoxes et Romaines sont eune abominnation dévant lé Seigneur. Lé bouanhomme Maît' Ouoyamme Bisson, gérant d'La Nouvelle Chronique et prédicateur laïc dé la Chapelle Îndépendante dans san vivant, 'tait iun d'ches'là. I' mé l'dîsait souvent viyant qu'j'allais à l'églyise dé St. Simon, mais j'tions bouans anmîns quand-mème. Ché s'sait triste si les gens n'pouvaient pon être anmîns tout en ayant d'difféthentes opinnions - réligieuses ou autrément! L'opinnion contraithe à la cheinne du bouanhomme Ouoyamme est qué les louanges du Bouan Dgieu dév'thaient êt' faites dé corps et d'esprit, et qu'l'églyise - tch'est Sa maîson sus chutte tèrre - dév'thait êt' la pus belle et bein garnie qu'nou peut înmaginner, et qu'les sèrvices, lé chant et la musique dév'thaient êt' aussi parfaits commes des êtres humains peuvent les faithe.
L'aut' jour, j'rencontris un anmîn Améthitchain (j'm'en vais pâler d'li comme Mr. John Doe.) tchi m'dît : Toutes ches manniéthes dé crianches-là entouor la réligion qu'vouos minnistres êprouvent à faithe les gens avaler, sans pâler des chînmagrues qu'ou' faites à l'églyise, peuvent-i' êt' justifiées par autcheune chose dans la Bibl'ye?
Eh bein, j'lî dis, Tu n'as qu'à l'êtudier comme i' faut, la Bibl'ye, et tu trouvthas qu'ouï! C'menchons par le preunmié chose tch'i' s'arrive quand un nouvieau-né est présenté dans l'églyise pour lé Bâptème. Dans l'traîsième chapitre de l'êvangile selon St. Jean, i' nouos est dit au vèrset chînq qu'un homme né peut pon entrer dans L'Rouoyaume des Cieux à mains tch'i' s'sait nouvieaument né dg'ieau et d'esprit, et Notre Seigneur fut Li-mème bâptîsi par St. Jean Baptiste - comme i' nouos l'est dit dans l'traîsième chapitre dé St. Matchi, vèrsets treize à dgiex sept, et dans l'vîngt-unième vèrset du traîsième chapitre dé St. Luc.
Eh bein, m'dît l'Sieur John Doe, T'en vas-tu m'dithe qué ch'n'est pon riditchule dé bâptisi un mousse tchi n'sait pon tch'est tch'i' sont à li faithe?
L'églyise, j'lî dis, Prend soin d'chu problème-là. Des pârrains et mârraines agissent pour li et en san nom, et quand i' veint d'âge dé comprendre et d'agi pour Li-mème, l'églyise lé met sus l'sien. Nou-s-appelle ch'là êt' confirmé. Ch'est en sorte, un engâgement religieux. La confirmation est autorisée dans L's Actes d's Apôtres, chapitre huit, vèrsets quatorze dgiex-sept, ou'est tchi'i' nouos est dit qué quand l's Apôtres pôsidrent la main sus la tête des cheins tch'avaient 'té bâptisis, i' r'chûdrent la communication du Saint Esprit.
Et chu sèrvice-là tch'est appelé 'La Sainte Cène?', i' m'dît, Est-ch' autorisé dans la Bibl'ye?
Oui-dgia!, j'lî dîs, J'l'appelons tchiquesfais La Communion ou La Sainte Eucharistie. L'Églyise Orthodoxe l'appelle 'La Litourgie', et L'Églyise Romaine 'La Mêsse'. Tu vèrras l'autorisâtion dans les vèrsets vîngt-six à vîngt-huit du chapitre vîngt-six d'l' Êvangile dé St. Matchi. Lé r'cit nouos dit qué L'Seigneur lî-mème donnit l'ordre à Ses Apôtres dé continnuer l'sacrément, et l's Apôtres, tchi fûdrent, nou peut dithe, les preunmièrs êveques, passîdrent l'autorité à des successeurs tchi l'ont, à lus tou, passée à d'aut' successeurs jusqu'ès cheins d'à ch't heu. Ch'est chein qu'nou-s-appelle 'La Succession Apostolique!'
Mais, comment tch'il' avaient l'drouait d'faithe chenna, l's Apôtres?, Mr. John Doe m'dît.
Eh bein, j'lî dîs, Lé Seigneur Li-mème lus donnit l'drouait. Ch'est tout dêtailli dans les vèrsets vîngt-iun à vîngt-trais du vîngtième chapitre dé l'êvangile selon St. Jean. Mais il a donné bein d'aut' ordres à s'n églyise et à ses minnistres. Lé mathiage, par exempl'ye, a S'n autorité dans l'vîngt-quatrième vèrset du chapitre deux dé Genèse, et dans l'siexième vèrset du dgiex-neuvième chapitre dé St. Matchi. Né v'la don un sacrément tch'est autorisé dans l'ancien et l'nouvieau Testament!
Et pis la confêsse?, i' m'dît. Né v'la eune affaithe qué tu n'peux pon justifier!
Au contraithe, j'lî dis, J'admets bein qué mème un tas des membres dé l'églyise n'y craient pon. Ch'est tréjous difficile dé faithe du monde craithe à tchiquechose tch'i' n'aiment pon faithe! Mais quand Notre Seigneur consacrit Ses Apôtres et l's înduit du Saint Esprit (St. Jean, Chapitre 20, Vèrsets 20 à 23), I' lus dit tch'i' lus donnait l'drouait d'pardonner des péchés, et ch'est la crianche des trais églyises mentionnées qué La Succession Apostolique a continnué chu drouait-là jusqu'à ch't heu. Tu'en vèrras la preuve dans nouot' Litourgie Anglicanne à pus d'un bord. Lé pardon des péchés est prononcé par lé minnistre dans les sèrvices des Priéthes du Matîn et du Sé, dans La Sainte Eucharisties et dans La Communion des Malades!
George d'La Forge.
Viyiz étout: