J'avais tréjous pensé qu'les femmes étaient drôles, - ach'teu j'en sis bein seux! Ma Mérayeu m'a tréjous fichi au nez qu'oulle est pus auffaite qué mé car oulle avait tait au Collège, et mé j'navais 'tait qu'à l'êcole Wesleyenne à St. Ou.
Châque fais au'ou passait des r'merques entouore m'êducation j'pensais à mé-mâme: "Time will tell," coumme i disent en Angliais, - et une chose s'arrivi l'aut' sé qui m'a rasseuthé qué jsis pas si bête coumme ou' crait.
L'aut' sé, êprès l'té, coumme j'dêhalais man chipaudé pour fumer une pipée de p'tun, nout' Frankie, qu'es ach'teu dans Standard Four à l'êcole, et qu'est tréjous à bailli t'sa becque de fractions, d'mandi à sa méthe de y'aidgi à faithe s'en homework. I' pathai qu'il avait une soumme à faithe qu'en 'tait pienne, de fractions, - et sa mèthe mé r'gardi d'travers coumme pour mé dithe. "Là - tu vait bein à tchi qui va quant il a besoin d'tchiqu'uns à y'aidji, nout' garçon." Mais quant ou' r'gardi la soumme ou' z'ethiêtes peut m'tchulbuté avec une piumme de poule quand j'la ouit dithe au mousse qu'oul'tait trop ambarasée à rac'c'modé des cauches, et qui f'sait mus dé d'mandé à san péthe de y'aidji, li qui n'avait jamais rein à faithe que d'fumer sa pipe et envier ses chendres dé p'tun partout sus sans neu tapis qu'oulle avait attendu si longtemps pour accaté à cause de l'otchupation.
Lé v'la don l'mousse qui s'en vein à mé avec tout s'un coup pourtchi qu'ma buanne femme m'avait bailli la djabbe. J'tait y'ieunne de ches tchestions là qu'les maîtres d'êcole sont tréjous à d'mandé ès puourres mousses pour vais s'ils ont des p'tits boudins dans la têtes. L'la f'chin:
"Si une poule et d'mi ponds un oeu et d'mi dans un jour et d'mi, combein qui faudrait de poules pour pondre une douzaine d'oeus dans un jour?"
J'mé gratti la tête et je r'gardi la Mérayeu dé la carre de m'nyi, mais où tait à r'ac'c'modé ses cauches d'une telle vitesse qué j'sis seux qu'oulle 'tait à mantchi la maintchi des creux, car oulle 'tait si praissie de pathaître embarassée qu'oulle avait oublié de mettre ses lunettes qu'étaient a côté d'san pan'yi à cuoutre!
Où savais bein, si j'avais voulu, j'en avais qué pour une munutte à vos dêfrichonné chutte fichue tchestion là, mé, mais i'm'vint une idée à la tête qué si j'lé faisais chutte fais, i'm'enbêtetait la tête pour y'aîdji tuous les sieurs, et pis, étou, j'voulais vais si Mérayeu 'tait si s'merte coumme où l'en avait tréjous fait la minne, - ch'est pourtchi j'dis au Frankie qué j'mé souv'nais qué j'tait là y'iunne des tchestions qu'sa méthe avait y'eu dans s'nexamain au Collège quant ou' gagni la médalle, et qué j'tais seux qu'oulle éthait mal au tcheu si j'lis donnais pas la chance dé nos montrer coumment qu'oulle avait rêponnu la tchestion au Collège.
S'où z'aviêtes oui la Mérayeu! Oh mais George, qu'ou m'dit: "Coumment qu'tu peux dithe des mensonges dé même: Tu dév'thais bein saver qu'les maîtres du temps passé né d'mandais pas d'tchestions qu'étaient si binasses; - à m'idée, ch'est seux qué l'maître à Frankie y'a donné chutte tchestion la pour vais s'il est assez intelligent pour savé qu'une poule et d'mi né s'sait pas capab'y'e dé pondre autchune chose, sans pâslé d's'oeus, car une poule et d'mi éthait trais pids, et trais y's'ieurs, et trais ailes, mais i' sait impossib'y'e d'aver un drièthe et d'mi!
Nou viyait bein qué l'puourre p'tit Frankie était aussi peuzzlé qu'sa méthe! Quant à mé, j'fis la minne que j's'avais pas la rêponse, car j'voulais pas faithe trop d'êpié à Mérayeu en lis montrant qué j'tais réellement pus s'merte qué yi, ch'est pourtchi j'dis à Frankie qué j'tais pas trop buoun mé-même dans les fractions, car j'avais 'tait si longtemps à la Côte quand j'tais janne que j'tais bein pus auffait ès décimulles qu'ès fractions.
Mérayeu mé r'gardi drôlement, mais ou' n'osit pas dithe rein, et l'Frankie s'en alli siez not' vaisin pour téléphoner à san parchonn'yi Bram Du'qu'min, qu'est dans Standard Five, pour l'is d'mander si san péthe, qui travaille dans Hill Street, puourrait l'is dounné la rêponse à chutte tcherounne de tchestion là. Quant i'r'vint, i'nos dis qu'la rêponse 'tait "Une douzaine" et qui y'avait pensé à sans tout seu, car s'n'ami n'tait pas siez li. Quand j'dis à Mérayeu qué j'savais bein la rêponse tout l'temps, mé, ou' n'vouli pas m'craithe. Ou'm'dis que Frankie avait prouvé qui 'tait pus affait qu'san pèthe ès chiffres.
J'éthais bein deu savé qué j'pouvais pas gagni avec la Mérayeu, - oulle a tréjous l'dernier mot. Mais j'sis seux qu'au jour d'aniet qu'ou n'sait pas coumment travailli chutte soumme-là!
George d'La Forge
Les Chroniques de Jersey 23/11/1946