Ch'est vrai q'yen a hardi q'dêja
J'ai oublié d'pis chu temps là;
D'autres qué j'nai jamai, perdu d'veux
Car jamais n'ont sorti d'siez yeux
A la même pièche ils ont resté
D'pis qu'ils 'taient mousses, au jour d'anniet.

Y'en a yun d'yeux qu'est cordon'nyi
I sé r'connait dans san mêtchi,
Tout l'long du jour raide i travaille
Et d'bouan t'cheu sus san tchui camaille
I n'souffre pas du mauvais temps
Pis qui n'travaille qué par dédans.

Y'en a y'un qu'est achteu causeux,
Et d'travas ch't'îna n'a pas d'peux;
Il est mathié et a d's'esfants
Quoique ses mousses né sont pas bein grands;
Siez san pêthe i v'a travailli,
L'commerce pus tard es'sa pour li.

Un autre est clerk sus la cauchie
La pipe au bec, la p'yiume sus l'ouie,
I l'is fallit d'l'éducation
Pour pouvé suivre sa vocation,
D'jaunes bottes, dé gants, d'fin drap s'habille,
Fait l'moussieu parce qu'il est en ville.

Y'en a plusieurs au Canada,
Même y'en a qu'ont lus siez-yeux là;
Chest un payi fré, mais bein sain,
Les siens qu'y sont lus y p'yaisent bein
Et né r'vennent pas souvent:- T'chique fais
I restent là, ne r'vennent jamais.

L'pus aufai d'tous est pedagogue
P't'être q'nou l'verra bouan astrologue,
Il est tréjous à êtudié
Crai q'jamais n'peut trop en savé;
I s'pyait à faithe dé biaux êcrits
Et s'exprime d'charme en poésie.

Y'un q'avait p't'être un mio d'orghi
D'pis chu temps là a bein changi,
Dans une grand' banque en Ang'yéterre
Les biaux p'tits jaunes i conte et serre;
Pus tard p't'être qué nou pourra l'vée
Lé pus grand d'tous les financiers.

Un autre achteu e't imprimeur,
Pour chonna n'faut pas être piercheux,
I' m'a aidjhi dans man travas
A mettre chun-chin dans l'Almanâ;
Ch'est man chervé qu'a fait la rime,
Et ch'est ses mains qui vos l'impriment.

Y'en a yun q'est marchand d'padon,
Dé braies d'bâsin d'bianchêts d'coton,
Nou l'vait souvent l'long d'sa boutique
A r'garder si veint des pratiques,
Voulous du bon, à bouan marchi?
J'vos r'quemandais d'allé siex li.

Y'un, milicien, a bein gagni
La médaille d'or sus tout Jerri;
Il a tréjous 'té bouan titheux,
Avec d'zêlingues il 'tait fameux.
San pyaisi est d'aller chasser
Toutes sortes d'oësiaux matin et sé.

Y'en a plusieurs qui sont fermiers
Et deux-treis bouans t'cherpentchiers,
Deux frêthes qui sont marchands d'vaisselle,
Dé bringes et d'bein d'autres âtivelles.
Y'en a d'autres qui j'pourrais nommer
Mais il est presque temps d'tchitter.

J'crai pas q'jamais nou p'yaisse trouver
Maître d'êcole comme ch't'îna 'tait
I n'avait pas peux d'travailli
Pour poussé t'chique bouan êcoyi,
Pas d'embarras trop grand pour li.
D'vos vais apprendre ch'tai san p'yaisi.

PH'LIP D'LA GOLARDE.