Le mousse arrive siez li, briyant,
"Tchest qu'tu'as man p'tit canard?"
Demande sa chièze memmée.
- "Une partie d'la sezée
Lé maître, jusqu'à bein tard,
M'a gardé ov' li par'dédans
A êp'ler d'mauvais mots."

Ne p'ieuze pas d'autre, man p'tit poulet,
S'fait la bouanne fenme, qu'affolle,
En l'y'essuy'ant les yièrs;
"Que j'pliains les pouors avièrs
Qui faut qu'âgent à d's'êcoles
Ouèst qu'nou les garde quand i n'ont fait
- Qu'êp'ler mal deux-treis mots.

Vé t'en, man p'tit, l'maître est mauvais
Dé t'garder comme chonna;
Né v'là un sou, prend lé. -
- Chu pouore petit avé -
Ah! si jé t'nais ch't'homme là
Deux-treis p'tis mots vite j'li dithais
Sans cherchi à l'z'l'êp'ler.

"Tch'est qui t'disait?" sé r'fait la mèthe.
Qué j'avais biau êp'ler
Sus mille difféthents sens,
J'trouvais bein touos les plians
Sinon l'sien qui fallait!
Pourtant, i' n'avait qu'une manièthe .
Et mé j'en avais vingt!!

"Oh bein, s'fait alle," ch'là montre bein
L'tchèt d'vous tch'est l'pus savant
Tu'as vingt manièthes, et li,
L'embl'yemme, n'a réussi
A êp'ler qu'sus un sens!
I'n'f'thait qu'un failli écrivain,
S'i n'peut faize pus qu'chonna.

THOMAS LAIDUZE.