Trenton,
Michigan,
USA,
Lé 5 dé mai, 1979.
Moussieu l'Rédacteu,
En liésant la gâzette du tchînze dé mar, tchi veint d'arriver, j'vai eune intérêssante lettre dé Moussieu R. Thuillier, BEM, au sujet du dêveloppement du sèrvice des beusses en Jèrri - un dêveloppement tchi finnit par mett' les trains du Jersey Railways & Tramways Ltd. et du Jersey Eastern Railway hors dé combat.
Moussieu Thuillier mentione l'articlye du Sieur Michael Ginns dans la gâzette du tchînze dé févri, et nouos dit qué l'Sieur Ginns oubliyit d'mentionner qué ch'tait feu C. W. Benest, Ecrivain, tchi condîsit l's affaithes du Safety Coach Service auprès qué les deux members fondateurs, des Salutistes, lus trouvîdrent souos l'fou.
En r'liêsant l'articl'ye du Sieur Ginns j'vai qué l'sèrvice des beusses 'tait dêjá considéthabl'ye dévant 1920, et qué lé Red Band Bus Company, fondé lé 14 dé dezembre 1927, par les deux Salutistes, 'tait connu come lé Safety Coach Service et tchi duthit jusqu' au 3 d'novembre, 1946. Quand i' fut envolubinné dans lé JMT.
La chose tchi m'intérêsse dans tout chennechîn est qué ch'tait Moussieu Charles William Binet (pas "C. W. Benest") tchi s'enchèrgit du Safety Coach Service auprès qué les deux fondateurs lus trouvîdrent souos l'fou. Je l'sai bein, car dans chu temps-là j'tais "Traffic Manager" dé la compagnie Great Lakes Engineering Works à Detroit, dans l'Etat d'Michigan, înginnieurs et bâtisseurs dé navithes, auve des chantièrs à Detroit, Michigan et à Ashtabula, Ohio, et eune grand' fonderie à Detroit. Moussieu Binet mé d'mandit, en confianche, si jé s'sais à mème dé r'vénîn en Jèrri pour êt' "Traffic Manager" des beusses souos san contrôle. J'tions grands anmîns, Moussieu Binet et mé. J'avais 'té dans s'n office pour sept ans dévant êt' nommé Commis-Vicomte par Reginald Raoul Lemprière, Ecuier, Seigneu d'Rôzé et Vicomte dé Jèrri, en févri, 1914. Comme j'tais dêjà bein êtablyi en Améthique, jé n'prîns pon avantage dé l'offre dé Moussieu Binet.
J'mé sis souvent d'mande si j'fus sage dé m'en v'nîn au Canada, et pus tard en Améthique , à la pliaiche dé rester en Jèrri. J'n'éthais pon ieu d'embarras à trouver du travas, mais j'éthais probabliément resté dans La Rue ès Trais Pigeons la grand' partie d'ma vie et, tch'est tchi sait, j'y s'sais p't-êt' acouo, car ch'est habituel pour les gens dé louai et lus clèrcots d'continnuer à lus assiéthe dans lus offices jusqué dans lus vièrs jours. Par contre, j'me r'tithis d'affaithes ichîn en Améthique à l'âge dé chînquante-chînq ans auve l'objet dé viagi partout l'monde et, Dgieu mèrci, j'ai 'té chanceux d'pouver viagi à man tchèr content. Comme l'affaithe en est, j'sis chanceux d'pouver, dans mes vièrs jours, pâsser la maintchi d'man temps dans man vièr Ménage à St. Ouën, et l'aut' maintchi près d'ma fanmil'ye ichîn en Améthique. I' faut admettre qué l'Bouan Dgieu m'a 'té bouan!
Nouos anchêtres touann'naient dans lus coffres s'i' pouvaient vaie tch'est tchi s'pâsse en Jèrri à ch't heu. J'viyais, par exempl'ye, dans la gâzette, qué Moussieu l'Député Bailli Crill est d'avis que l'serment tch'est adminnistré ès Officièrs du Connêtabl'ye dév'thait êt traduit en Anglais pouor les cheins tchi n'savent pon l'Français. Il a raîson, sans doute, car ch'n'est pon raîsonnabl'ye dé s'attendre qu'eune pèrsone tchelconque prenge sèrment dans eune langue êtrangiéthe qu'ou n'comprend pon, Mais à tchi dégré que j'sommes arrivés quand nou n'peut pon trouver un Jèrriais tchi connais sa langue natale, ni l'Français, pour êt' Offici d'Connêtabl'ye dans sa pâraisse?
J'savais bien tch'i' y'a bein trop d'baithe et d'ivrouongn'nie en Jèrri d'nouos jours, mais j'tais êtonné en liêsant dans la gâzette qué y'a des gens tchi mettent dé côté entre quarante et chînquante louis la s'maine dé lus gages pour dêpenser à l'aubèrge. Et i' n'y'a pon d'doute qué ch'est la véthité, car ch'est l'président, John Liron, dé la Jersey Licensed Victuallers Association tchi nouos l'dit. Ch'est honteux! Comment qu' des gens peuvent êt' si pèrvèrs et corrompus? I' n'y'a pon d'doute, à m'n idée, qu'un tas d'monde, et ches pèrvèrs-lâ partitchuliéthement, gângnent bein trop d'sou. Né v'la eune preuve qué les gages sont v'nus à hauchi à un point riditchule quand nou pense qu'un travailleux peut dêpenser quarante ou chînquante louis la s'maine à baithe, et acouo vivre au prix qué les bésoins d'la vié couôtent au jour d'aniet. Et l's unions des travailleurs vont en gréve pour acouo pus d'gages! Ch'n'est pon ravissant qu'nouos anchêtres înventîdrent lé diton tchi nouos dit qué "l'appétit veint en mangeant." Evidemment, la sé veint en b'vant étout. Ch'est danmage qué ches quarante ou chînquante louis-là n'lus trouvent pon dans la collecte à la pliaiche d'êt' à enrichi l's aubèrgistes!
George d'La Forge
Viyiz étout: