Lé c'mîn d'fé est un mouoyen d'transport tchi fait sèrvi des boulants tchi vont sus un c'mîn, en génétha deux relles en acyi. Auprès l'transport des routes, lé c'mîn d'fé est l'deuxième mouoyen d'transport sus la tèrre du monde, et prend dans les 8% des pâssagièrs et cartchaîthon.
D'pis les touos vièrs temps nou-s-a fait sèrvi des boulants halés (dé couôteunme par d's annimaux) sus des relles ou dans des boêteûthes dans l'pavé, mais lé c'mîn d'fé modèrne quémenchit au c'menchement du dgiêx-neuvième siècl'ye auve l'învention d'l'engîn à stînme. Lé preunmié c'mîn d'fé pouor les pâssagièrs fut ouèrt en 1825 en Angliétèrre. Lé c'mîn d'fé 'tait împortant dans la Révolution Îndustrielle. Lé preunmié lian entre des villes fut ouèrt en 1830.
Lé c'mîn d'fé s'êcaloppit en Ûrope et en Améthique du Nord. Chu transport 'tait mains chi est pus vite pouor les cartchaîthons qu'lé transport par l'ieau ou dans des ouadgîns à j'vaux.
Des tramouais dans des villes faîthaient sèrvi des relles et 'taient halés par des j'vaux, dans des cas même auprès l'întroduction d's engîns à stînme, mais pouor la fîn du dgiêx-neuvième siècl'ye des tramouais êlectriques avaient 'té întroduit dans des villes.
Lé preunmié c'mîn d'fé souôtèrrain du monde 'tait lé c'mîn d'fé métropolitain d'Londres tchi fut ouèrt en 1863. Y'a achteu des systèmes dé c'mîn d'fé urbain dans bein des villes partout l'monde. Tchiquefais raîque eune partie des c'mîns est souôtèrraine ou dans des tonnelles. Dans tchiques villes les lîngnes sont êl'vés en d'ssus des rues, ou pâssent lé travèrs des contrées des villes un mio coumme les tramouais.
La difféthence entre un tramouais et un c'mîn d'fé dans les villes est prîncipalement qu'un tramouais a d's arrêts coumme eune beusse et un c'mîn d'fé fait sèrvi des stâtions et les relles sont s'pathées d'la route.
Pouor lier des villes êlouongnies des pays ont întroduit des trains d'grande ièrre. I' font la compétition auve lé transport en vaituthe ou en avion entre les villes. Ches trains sont spécialîsés pouor aller quédaine sans un tas d'arrêts et d'mandent des lîngnes tchi sont mains complyitchies en forme - ch'est en tchi, pus draites sans vars - qu'les lîngnes dé c'mîn d'fé d'trains ordinnaithes. Ches trains sont pouor lé transport des pâssagièrs: i' n'y'a pon d'grand avantage pouor faithe sèrvi des trains d'ité pouor les cartchaîthons.
Jèrri soulait aver des c'mîns d'fé. Y'avait des c'mîns d'fé pouor les pâssagièrs dé Saint Hélyi à La Corbiéthe et d'Saint Hélyi à Gouôrray, mais i' n'pouvaient pon enduther contre la compétition des beusses motorîsées et les lîngnes freunmîtent dans l's années 20s-30s. Duthant l'Otchupâtion 1940-1945 l's Allemands bâttîtent des c'mîns d'fé pouor la construction, mais ches'-chîn fûtent dêmontés auprès la Libéthâtion.
Viyiz étout: