Les Pages Jèrriaises

L'Assembliée d'Jèrriais

L'Assembliée d'Jèrriais


Rêunion mensuelle au Mangni d'Rôsé
L'Assembliée d'Jèrriais


À bein près souxante membres lus rêunîtent au Mangni d'Rôsé dans la p'tite chapelle vendrédi, l'28 dé mai, pour la rêunion mensuelle.

D'vant c'menchi, l'Président, lé Sénateu P.J. Romeril, d'mandit ès membres dé lus l'ver et obsèrver eune minute dé silende en mémouaithe du Professeur Lechanteur et l'Chent'nyi Roy Barette.

Auprès, lé rapport du mais d'avri fut liu et accepté, deux nouvieaux membres futent êlus, et la correspondance fut liue.

Lé Président fit la beinv'nue à Mde. Joan Stevens et la r'mèrcyit pour être v'nue donner un discours sus l'magni.

Mde. Stevens dit en c'menchant sa discours coumment bein priviligiés qué L'Assembliée 'tait d'être r'chue dans chu ancien mangni par lé Seigneur et sa Danme et dit étout combein heûtheuse qu'ou 'tait d'être là coumme membre et r'présentant La Sociêté Jèrriaise.

Chapelle de Ste. Marie

Concèrnant la dédicace dé la chapelle il existe p'tite chose dé cèrtain à propos. Quand la Sociêté Jèrriaise fît eune visite en 1878 i' la nommîtent la Chapelle de Ste. Anne, et vîngt ans pus tard, à l'occasion d'eune aut' visite pendant la seigneurie du grand-péthe du Seigneur d'au jour d'aniet, ou fut nommée la Chapelle de Ste. Marie. I' sembl'ye împrobabl'ye qué les deux pus împortants mangnièrs éthaient prîns la même dédicace, car la chapelle à St. Ouën est dêdiée à Ste. Anne.

Quand Daniel Messervy fît eune visite au mangni auvec sa femme pour dîner l'25 dé mai, 1770, i' dit: "Lé Seigneur avait des machons et tchèrpentchièrs à bâti eune nouvelle maîson sus Lé Mont Ste. Marguerite près du vièr mangni; il' ont dêmoli le vièr mangni qu'était driéthe la chapelle et quâsîment joignant au colombier. J'ai donné eune pièche d'êtchu ès machons."

La chapelle date du douzième siècl'ye et fut, coumme toutes chapelles, abiêmés au temps de la Réformation mais ou fut retaurée par Philippe Renaud Lemprière en 1800. Les bancs faits de chât'nyi dé la propriêté sont pus vièrs.

Le vivi existe acouo et les bouais, lé grand cyprès (Taxodium distchium) dé 125 pids d'haut, les bieaux magnolias et camélias et tant d'autres pliantes dîgnes dé notre attention.

Preumyi Seigneur

Le moulîn à ieau dé La Perrelle était un moulîn seigneurial mais fut vendu en 1704. L'héthitchi, Philippe de Carteret, mouothit jeune et l'héritage est dévenu bein complitchi par lé mathiage en deuxième neuches dé Anne Seale à Philippe Pipon. Lé preunmyi Seigneur 'tait Ingram de Fourneaux. I' perdit san fief quand Jean perdit la Nouormandie. Lé rouai Angliais li'accordit à Drogo de Barentin, Gardgien des Iles et i' l'gardit pendant plusieurs généthâtions. Lé dernyi dé la fanmille a vendu san fief auvec lé sien dé Diélament à san attourné, Raöul Lemprière, preunmi dé chu nom à Rosé en 1370. Renaud, san arriéthe-pétit-fis, fut atchusé par les Français, et san jugement est donné dans un Bulletîn de La Sociêté Jèrriaise. San fis étant mort sans êfants, la seigneurie passit à sa fille Catherine, femme de Dominique Perrin de Dgèrnésy, eune fanmille tchi la ieu pouor chînq généthâtions jusqu'à 1625, quand ou fut acatée par Philippe de Carteret dé St. Ouën et restit entre les mains des de Carterets jusqu'à 1735, quand ou r'vînt par mathiage ès Lemprières. Par chu temps-ichîn lé vièr mangni 'té pas habitabl'ye. La maîson actuelle fut bâtie par Charles Lemprière en 1770.

Mde. Stevens èrchut d'grands applaudiss'ments bein méthités pour san mangnifique discours et lé Brigadgi Lemprière-Robin adréchit L'Assembliée en Français et r'mèrcyit Mde. Stevens pour san discours et d'mandit ès membres d'amonter à travers les gardîns à la maîson pour des rafraichiss'ments.

Les annonces

Auprès qué tous avaient 'té si bein servis, lé Président èrmèrcyit l'Brigadgi et Mde. Lemprière-Robin pour aver donné eune si bouanne réception. Lé Brigadgi fît les annonces en Jèrriais coumme suivant: Lé Sèrvice Annuel étha lieu dînmanche, l'27 dé juîn, à trais heuthes l'arlévée, et les pratiques pour lé tchoeu éthont lieu jeudi, l'24, et san'mdi, l'26 dé juîn, à 7 heuthes et d'mie dans l'Églyise dé St. Hélyi.

La touônnée d'l'Ile étha lieu jeudi, l'10 d'août, et lé prix s'sa £1.25p.

1971

 

Viyiz étout:

 

 

Les Pages Jèrriaises