San Antonio, Texas,U.S.A.
Lé 7 janvyi, 1967.
Monsieur l'Rédacteu,
En r'liêsant la lettre dé l'Avocat L'Bro dans la gazette du 27 octobre, 1966 - eune lettre si plieine dé bouan sens qué j'l'ai liue chînq ou siex fais - i' m'veint à l'idée qué quand j'étais en Jèrri l'êté passé j'trouvais souvent iun des trais mille motos loués ès touristes arrêté dans la route quandi qué l'cacheux 'tait à examinner eune carte d'l'Île pour dêcouvri où-est tch'il 'tait, ou ou-est tch'i' voulait aller! Ch'n'est pon tch'i y'a rein d'drôle là d'dans, car si j'tais à êprouver à trouver man c'mîn dans un pays êtrangi jé f'thais probabliément la mème chose, mais ch'est eune bouanne raison pour siéthe l'avis d'l'Avocat et n'pèrmettre pon ès autorités d'en licencier pus à l'av'nîn tch'i' n'y en a à ch't heu!
Eune chose qué j'n'ai pon janmais peu comprandre est pourtch'est qu'les Connêtabl'yes dé châque pâraisse né contrôlent pon la vitesse du trafi dans lus pâraisses. La pèrmission d'aller à quarante milles à l'heuthe est mangnifique pour l'Avenue Victoria en ville, et La Route des Mielles à St. Ouën, mais lé péché en est qué touos les jannes, et eune grand' partie des gens d'âge dé saver mus, ont prînt sus ieux d'întèrpréter chutte vitesse-là comme étant eune licence d'aller à quarante mille à l'heuthe dans toutes les routes - grandes ou p'tites! À m'n idée, ch'est riditchule, et la vitesse excessive est cèrtainement la cause d'un tas d'accidents !
Dans touos les pays du monde où-est qu'y'a gentiment d'motos, nou vait d's affiches ou des sîngnes donnant les difféthentes vitesses pèrmînses ichîn et là. Ichîn en Améthique, les sîngnes sont nombreux et il' avèrtissent en bouan temps tch'i' s'en va faller aller pus douochement en appréchant ville, village ou vaisinnage résidentiel. I' faudrait êt' aveugl'ye pour né pon pouver vaie qu'ch'est riditchule dé cachi aussi vite dans La Route des Pallièthes comme dans La Route des Mielles, et pourtant, quand j'tais à pid dans ch't êtraite route-là, j'y ai souvent rencontré des motos tch'allaient à quarante mille ou pus à l'heuthe, et i' fallait s'fouorrer dêliêment dans l'fossé pour n'êt' pon écrâsé!
I' m'sembl'ye aver ouï quand j'tais en Jèrri qu'la louai d'à ch't heu pèrmet ès Connêtabl'yes dé d'mander l'autorisation d's Êtats d'contrôler la vitesse du trafi dans lus pâraisses. Ch'est p't êt' tchiquechose qué j'ai rêvé, mais s'il' ont l'drouait d'appel ès Êtats i' dév'thaient c'menchi chutte nouvelle année comme i' faut, et d'mander l'autorisation d'affichi des sîngnes lînmitant la vitesse dans les p'tites routes et ès mauvais carrefours. Eune aut' chose tchi dév'thait êt' faite en Jèrri est d'empêchi ches grands babaines dé char-à-bancs d'aller dans cèrtaines petites routes. Ch'est pûtôt l'aubèrgiste qué l'fèrmyi et l'campangnard tch'a autcheun bénéfice des char-à-bancs. I' sont eune embête ès fèrmiers, et lus cacheurs sont dans des temps affrontés. I' craient tch'i' faut qu'toutes aut' vaituthes èrtchulent pour ieux et tch'il' ont l'drouait d'entrer dans les bels au monde! N'est-i' pon temps qu'les Connêtabl'yes lus montrent maîtres dans lus pâraisses?
Quand l'Avocat L'Bro nouos dit qu'j'allons acouo aver à bâti pus d'êcoles, v'la tchi m'fait penser ès maîtres d'êcole du temps passé. J'n'en ai connu qu'deux comme i' faut - Mêssieux Harry James Carter, d'l'Êcole Wesleyenne à St. Ouën, et George Boomer, d'l'Êcole d'La Mouaie à St. Brélade. Il' 'taient aussi difféthents iun d'l'autre comme la niet est au jour! Lé Sieur Carter 'tait un homme sévèthe, et voué à sa tâche. I' n'y avait pon d'manque dé discipline dans s'n êcole. V'la tchi s'faîsait vaie la preunmié chose en arrivant au matin s'nou v'nait tard à l'êcole. À la pliaiche d'aller s'assièthe en classe auve l's aut' mousses, i' fallait s'mâter d'but l'long d'la muthâle à côté d'l'êcritouaithe au maitre, et la punnition 'tait un coup d'baïette dans la main!
Chutte baïette-là 'tait faite sèrvi à londgieu d'jour pour corrigi la mauvaîtchi ou l'manque d'attention en classe. Y'avait des garçons tch'étaient pus ou mains încorrigibl'yes. Ch'tait ordinaithe dé vaie ches'-là attraper siex laches dé baïette - trais dans châque main - eune fais ou deux par jour. I' l'vaient la main en l'air pus haute qué l'êpaule, pour èrchéver les tapes, auve la vaillantise d'un soudard, et allaient lus assiéthe en classe, lé nez en l'air, comme si rein n's'était arrivé. Pour nous, ch'tait des vrais braves! Aujourd'aniet, pathaît-i' un maitre d'êcole n'est pon pèrmins d'disciplinner les mousses atout la baïette. Ch'est danmage, car v'la tchi lus apprand à lus comporter comme i' faut. Dans chu temps-là, nou trouvait chutte punnition-là tout-à-fait naturelle et à propos. Dans touos les cas, l'rêsultat 'tait témouaingnage dé bouan sens, car nou-s apprannait bein dans ch't êcole-là, et oulle avait eune raide bouanne èrnommée partoute l'Île!
Lé Sieur George Boomer, d'l'Êcole dé La Mouaie, 'tait un moussieu bein paisibl'ye et doux d'caractéthe, et ch'tait rare tch'i' faisait sèrvi la baïette, mais nouos y v'la: Nou n'apprannait pon si bein dans s'n êcole comme dans la Wesleyenne à St. Ouën.
George d'la Forge
Viyiz étout: