|
Ch'était not' tante Jeann'ton tch'en faisait des fricots!... Des pâtès, des gâches et des bourdellos!... Des gâlettes dé vraic et des gâches a fouaie, S'ull' en t'chquisait de fâummeuses fouânnaies!... Et tch'i crêpes lé Mardi Gras, Et tch'i fliottes lé Vendredi Saint, Ent'ré nous, avers, hélas! J'en mangions ben trop, j'en crains - (Sans pâler dé patates, ou dé verte mouâthue Ov' beurre fondu versè par-dessus) Et pis quand 'oull' attendait ses gens de d'St'Où, Ou rammassait t'chierbon et cauffait lé fou' - Le buouochi y'apportait unn' rouelle' de beu' Et ou' la t'chuisait ben et à p'tit feu - Car ou d'vinèz ben Quand des gens veinnent dé lyien Y'l'us faut d'la bourgaille pour l'estoumma, Et la tante Jeann'ton savait ben chounna!... Ch'était des steak dé lard quand-y-l'avaient tué, Ou tchique gigot rôti, ou poule ou poulet, Du jeunne et du tendre, pas dû coumme du t'chui Mais stoffé ov' sauchisses, pain et persi Tant pus qué visite mangeait, tant pus tante était fière, Et si boutons des vestes volaient hors dé boutonnière, Not' tante cryiait tréjous: "Occuo un couaiepin;" Mais fallait l'y dire: "Ah, mercie, ah, nennin! Car y'ia vier dit-on t'chi dure jusqu'à ch'ett'heure, "Faut mus qué deux saient malades qué yieun s'en meure!" Les êfants à not' tante étaient gros, et ben gras, Pas dé maîgraches par là, ma fé, Y'l'avaient des joes t'chi pendaient en bas, Et des bédaine toutes prêtes à busté!... Mais y'n'yavait persounne dans toute la contrée Pour faire coumme not' tante un' bouanne estuivée... Fusche ov' restants dé viande, dé lard ou d'lapin, Oull' arroûsait tout ov' dé riche graîvin - Et v'l'à t'chi s'en allait dé charme avaut lé gôsi Et avait tréjous lé goût d'er-vas-y... Mais un jour not' tante avait dé l'embarrâs, Ch'était au r'nouvé et y'l'avaient râmoûnnè, Chè "Spring Cleaning" là en dounnent'y du travas! Et tchi minsère pour les hoummes en vérité! Tout est chin d'sus d'sous, ch'est épouste et scrobbe, Les femmes n'ont qué ponsi, sus cotillion et robe, Les hoummes et les avers sont tréjous à la vaie Et sé trébuque par sus, sait boutcheit ou traie, Et ch'est crie ichin, grond par là, tout va d'travers, Sécours, quand tout est fini, nou' s'en est si fiers!... Et les femmes ont chutte manie là, eunn' fais par an, Pour les hommes ch'est trop, v'la tchi sé comprend! Tout coumme, not' tante ov' san tintammarre avait Fait pour ses gens un moyen bouan dîner; Et quand tout fut erparè et vaisselle lavée, Tch'est qu'ou vit pliantè tout drait dans l'allée, Qué san n'veu George - t'chi démeuthe en ville, Un raide biau garçon et ben habile, Yieun qué sa tante aimait diversément ben, Et ses couâsinnes étout - n'en doutez d'ren!... Mais ch'était en mauvaise heure t'chi faisait visite, Les hardelles l'avaient veu - y filirent à haut vite, Pour sé muchi , - car y'nia pon d'jeunes filles, Qu'aiment qué lus couâsins les trouvent en g'n'illes! Mais George avait faim, et avait fait du qu'min Et n'avait mangi rein depis le matin; Et y dit à not' tante qué sans comp'lyiement Y'l entrait pour mangi unne bouôchie en pâssant. La tante l'y dit: "Man garçon t'uas ben fait, "Mais ch'est qu'ach'teu not fricot est fraid, "Y'ià occuo assez dé restant pour té stoffé, "Et y faut, tout d'un coup, té l'Estuiver; "J'avons dé l'embarras, mais jé peux t'espaîgni "Ta couâosinne Suzon, où s'en va té souogni." Et la bouannefemme s'en fut scrobber et netti!... Ch'tait la Suzon t'chi fut fièthe d'èscapper Dé cliairgi, dé netti et d'êpouster! Et o vint ben vite - (ah, oull' t'ait malinne) Faire fricot à George - et bouanne minne!... Var la Suzon, quoiqu'oul'' eusse un galant, Faisait la carre à George... en riant! Et vl'a not' couplle à coutchi, Et pis à s'entr'faire Dé nice p'tites manières Coumme couâosin et couâosine... par amièt'chi!... Enfin lé fricot fut t'chui Et Suzon sus la table lé drèschi, Mais y't'ait si caud et si bouillant, Qué George s'brûlit la langue en lé gouôtant!... Y dît à Suzon: "Quoiqu' m'en estoumma sait viède Jé'nn mangérait pon chounna t'chi né'r'fraide, Jé perds man temps à soufflier d'sus" - Et not' parre S'en r'vont au coin de l'âtre s'ent'faire la carre!... Mais not' tante avait eun horrible mâle cat, Qu'ou câchait tréjous hors dé la maison, Y'n 'tait d'aûtchunne race - ni Russe ni Angora, Mais eun voleux fini - et v'là la raison Qué quand oull' vyiait chétait "Quett's laie bête!" Et l'y fliantchais bringes, chabots, bottes à la tête! Mais lé cat était malin, et quand y sentait fricot Y guettait tréjous sa chance pour en voler un mio, Et y l'avait des griffes, vraiment jé l'pense, T'chéraient servi dé cro au but d'eunne anse!... Enfin chett' arlévaie là Moussieu lé mâle cat Trouvit moyen d'entrer dans la tchuisinne; Sans distorber couâosin ou couâosinne, Y saute sus la table et Mess Minaud Né trouvit pon pour ly fricot trop caud! Y suppe et lique tout, et pis s'en va Et sé fiche auprès de souoris ou d'rat!... Mais dans eun temps George pensi Qué san dîner avait deu erfraidi, Et quoique Suzon était ben aimable, George voulait être à table - (Et pourtant nou dit Qu'amour pass appétit!) Et lé v'là tchi sé lêve pour s'y mettre... Et s'assied... mais y n'ya ni chiffre ni lettre Tchi s'en va escrire san dêpied et chagrin Quand y vit qué viande, pommes de terre et graivin Tout était netti - y n'yen restait pas eun mio, Pas seul'ment miette dé chu bouan fricot!!! Et sus lé coup, né vl'à t'y pon Qu'arrive étout not' tante Jeann'ton!... Nos deux paraissaient Pus bêtes qué ouaies, Et n'osaient dire mot Entouarre lé fricot... Suzon restait la bec et les yiers oûve'rts, George la r'gardait euun mio dé travers - Mais not' tante ov' sa fâche dé plienne lunne, Havie, brûlée du soleil, joliment brunne, En riant s'en va Tapper George sus l'estoumma! Disant "man garçon, mais tu'as aimé chounna, Lé pliat et les assiettes sont toutes vièdes, Ah, mais, tu'es un "varry good lad," (Car not' tante parfais Pâlait d'l'Anglyiais) Jé savais ben qué tu trouvr'ais bon Des rêschauffès dé ma faishon - Fallait aver faim, car tu n'en as laissi mie, Cats sou'entre té né f'raient pon longue vie!... Et vl'à comme not' George resti ov' l'estoumma fliat, Au près sa visite à not' tante Jeann'ton, Un mio par la faute dé un vilain mâle cat Et peut-être ben étout dé la chenne à Suzon!!! A tout histoire y'à tréjous morale, "Garçon, s'y tu'as faim, tan fricot avale, "(Et ne fait pon la carre à ta couaousinne) "Quand même t'chi s'rait caud "Mêfieté dé Minaud, "Y peut tréjous ben sé rigaler dé vermine!" J.D.R. |
Viyiz étout: