|
Veth de toute la ghienque, le pus malin Chest William si nou le trouv' de buon matin, Si nou peut le trouvai de même tout frais, Y n'y a pus charmant que li a vais, Car chest vrai qu'il a tréjous bain travailhi, Avec le Connêtable GEORG' LARBALESTCHI; Et bain, avec ALFRED MESSERVI, chétai aitou ditai, Entre heux, il n'y eu pas une seule diffiqultai. Mais avec John, il en sétha autrement, Car il y'a hieu, un divers grand changement. Suous PHILIPPE LE VESCONT' y eu un tas d'procès, La chose erquemanche de même, a quicq chose près. JOHN n'est pas partizan, au mains il voudrai A toute forche que l'publihi le créthai, Y quemanchi par lus aidghi, hin peut pus, De toute lus ghienque en avait l'au d'sus. Chain qui y'a d'bon, y peut être rempièchi, Sans grande perte, par san prumi Chantgni; Il a aitou pour Private Secretary, Pour faithe l'êcrituth, le jeune SOHIER. Mais le sien qui li vaut l'mus de tuous hieux. Chest PH'LIP Junieure, le sien qu'est Proquleux, Sans li, JOHN ne puourait pon jamais se grais, Car chest bain li qu'a, a l'iexpliqui les Lois. Quant il y a un point, un mio délica, Chest li qu' est appelai, a l'iexpliqui ch'la, Et dans les derniéthes affaithes, dévrai, JOHN a étai bain, de pouvai le trouvai, Chest dommage, y sethai prêt a y'iadghi, A gardé les comptes, sans PETER SOHI, Mais dans les chiffres, y n'sest pon fort versai, Car chest tréjous les Loies, qu'il a êtudiai, Il a l'idaie de rempièchi son pèthe, comme Député, Y n'veurs pus être Connêtable, y'a trop d'comptes a gardé. Quant à PH'LIP le prumi Chantgni. PH'LIP AUBIN, Pas l'junieur, mais le pus vi, ma dit en amin Qu'il est mihieu que san pèthe, s'il 'tai Connêtable, Il ne fethai pon rain de regrettable J'en ai buounne idaie, j'crai qui n'féthai pas Comme y fit, un muochai d'mauvais travas. Il est rêzervai, et n'est pas trop hardi, J'crai que la hardiesse li manque un petit, Chest vrai, car je n'en mentithai pon Je l'prends pour être un buoun garson. Quant au second Chantgni, JOSUÉ DUOTHAI, Il est le mihieu de tout le fiotchet, Y n'éthai pon besoin de sécretaith, S'il 'tai en tête, pour faith' les affaith', Et chest seux qui puourait tout a fait bain, Se grais, sans avai hieu un Ecrivain, Les Actes y puourait bain les êcrith', Sans les laissi pour d'autres a en rith' Y puourait bain, nos sauvai bain des Louis, Que j'éthons a payi en imprimthie, Car dam, avec li, y ne fethai pon, Imprimé les billets d'convocation, Et pis aitou dans les livres du Rât, Je sis quasi seux qui n'y mettrai pas Le nom des siens, qui sont en embarras, Et pis je demande, pour qui publié, L'nom des puour gens; a qui y faut donnai, Le Rât séthai erchu par Jos. DUOTHAI, Sans payi un homme a faith' ditai, Car chest seux que j'éthons a payi pour, Combain q'faudra donnai es ergots d'Cour, A s'arranghi Jo s'éthai tréjous prêt, Putôt que d'avé un tas d'procais, MESS CABO, n'est pon mauvais, paslais li, Tout de suite y s'mettra a suous-ri, Et pis y vos paulla, tout duouchement, Sans y mettre du tout d'emportement, Je sai qui n'est pas des pus langaghi, Ni comme son pèthe, tréjous a picangni, Et ou pouvais contai qui sétha le dergni, Avec auqune personne a cherchi bri. Mais me v'chin a PH'LIP, le Proquleux, chest li Qu'est acheteu le grand Speaker de l'autre parti, Y n'y'avait personne de hieux, pour expliqui Les affaithes, chest pour chonna qu'il a changi, En tuounnant Kasaque y criait, Que chétait li, qu'ils allaient nommai Pour Connêtable, y fut bain ravi D'y vais nommai, le fils d'un cordongni, Car dam chétai de même, qu'il traitit D'vant tout l'Régiment. Il avait prédi Qui séthai nommai, li même apres LARBALESTCHI. Ch'tai seulement pour chonna qu'il avait changhi d'côtai, Pour jouai l'tou, a CHARLES AUBIN et a JO DUOTHAI, Car de l'autre cotai, quant a des Candidats, Après tout considéthai, y n'en viait pas. Y se vante aitou qu'acheteu Chest li qui quemande le Recteu, Qu'il a causait la difficultai Du Recteu et PHILIPPE DUOTHAI. Y dit que sans MESSERVI, PH'LIP éthai payi bain chi FRED GRUCHI, s'est montrai trop indépendant Pour pouvai pièthe dutout à JOHN NORMAN Car JOHN lis dit un jour qu'il tai bain ravi Qu'il avait passai l'contrat ov MESSERVI, Et qu'il éthai deu faith' comme MESS SAIN'CROIX, D'mandai autorisation a l'Assembiée. FRED s'aperchu, tout d'un coup, ouest que JOHN voulai venin Et lis dis qu'il 'tai a même de savai san quémin. En viaut MESS DE SAIN'CROIX, nou n'craithai pas, Qu'il est un aussi grand faiseux d'embarras. Ou n'avais qu'à lis pâlai, il est tréjous En apathance, de suite avec vous Ei pis ou u'avais qu'a le laissi pâlai, Y cherchétha tranquil'ment a vos halai. J'vos en prie laissies l'ai continué, Faites un mio sembiant de l'admithai, Chest un long sermon qui vos prê'cha Tout en vos expliquant tout chonna, Laissies-le allai, ou verrais bain Quine connait absolument rain Pensant se fichi de tuous les gens, Y finit tréjous en vos disant: "Chest de même, car ou vihies" " Que ch'n'est pas comme ou crihies."
|
Viyiz étout: