Les Pages Jèrriaises

Notre Chant'nyi

Notre Connaîtablye est un charmant corps,
Si tchiquefais un mio hautain,
Le travas d'sa tâche es'sait bain trop fort
Si i'n' avait pas tchique souostchaint.
Mais j'avons un homme qui peut remplyi l'rôle
Quoiqu'i n'y a rein à y gagni.
Il est populaithe, chein qui n'est pas drôle,
Notre Chef de Police, notre Chant'nyi.
Notre Chant'nyi, notre Chant'nyi, notre fameux prumi Chant'nyi.

I'tchaint sa poste dépis huit ans,
Ch'est ichin sa traisieme gestion,
l'allons l'pliaichi pus haut dévant longtemps,
Il en a 'té dêja tchestion.
Mais tout caltchulé, i'n'y a autchune presse
Car che s'sait damage de l'changi ;
I'ny a pas un homme dans toute la pâraisse
Qui peut rempliaichi notre Chant'nyi.
Notre Chant'nyi, notre Chant'nyi, notre estimable Chant'nyi.

I'n'est jamais coupably'e d'un excès d'zèle.
Et n'cherche pas d'causes par pliaisi,
Ch'est un bel exemplye a' bain d'autres tout-s-mêles
Qui n'cherchent que tchiqu'un à saisi.
S'il a une faibliesse ch'est d'être amouotheux
Et souvent trop prêt à s'arrangi
Si une belle prisonniethe li fait les doux yeux
Oulle est seuthe d'enjôler notre pouore Chant'nyi.
Notre Chant'nyi, notre Chant'nyi, notre susceptiblye Chant'nyi.

Si i'présente une cause dévant la Cour,
Faut l'oui liéthe s'n atchusation
Qu'i'prépathe li-même sans autchun s'cours,
Ch'est un homme qu'a d'l'êducation.
Et si par chance le Juge critique
La maniéthe que v'là qu'a 'té rédigi
I's'garde bain de faithe autchune réplique -
Ch'est un homnme de tact, notre Chant'nyi.
Notre Chant'nyi, notre Chant'nyi, notre philosophique Chant'nyi.

 

Viyiz étout:

 

Les Pages Jèrriaises