Les Pages Jèrriaises

Le Principa' d'Paraisse


Tch'est qu'ch'est qui pâle dans l's'assembl'èes
Droit d'bu en casaque à pannèe,
Ov une haute dghenne bein du' emp'sée?
Le Principa'.

Tch'est qui marche d'un pas pesant,
Et qui tâche tréjous d'être en temps,
Pour s'assiéthe dans un banc de d'vant?
Le Principa'.

Tch'est qui s'lève avec dignité,
Pour distchuter aucun sujet,
Qu'étha 'té dûment annoncé?
Le Principa'.

Tch'est qu'adrèche tréjous l'Président,
Ov un respect bein êvident,
Toussant d'abord un p'tit secqu'ment?
Le Principa'.

Tch'est qui propose nos officièrs,
Et les r'mercîments ès Chantgnièrs,
Et signe, le prumi, lus papièrs?
Le Principa'.

Tch'est qui connaît sa pôsition,
Et qui combat l'oppôsition,
Quand i' s'agit d'une êlection?
Le Principa'.

Tch'est qui prend tréjous soin que l'rât
S'sait empliyè à d'bouan travas,
Baisse si possibl'ye et n'ramonte pas?
Le Principa'.

Tch'est qui comprend la politique,
Et lièt tréjous dans la Chronique,
Les discours de nos hoummes publics?
Le Principa'.

Enfin tch'est qui s'garde au couothant,
Au cas que l'Député mouothant.
I' lis faudrait un remplièchant?
Le Principa'.

 

Élie

 

Viyiz étout:

 

Les Pages Jèrriaises