Les Pages Jèrriaises

A Laisditeu de la "Nouvelle Chronique."



Mousieu, - Je criais qué ou m'ézêtes renviè par la gazette de Maiscredi une rêponse à ma lettre de Samdi, et ou me mintes un mio dans l'embarras car jène savais pas qui faize, mais enfin jème décidi a yiallé, criyant que Mousieu De Quetteville qu'est aussi ben comme mé un paisqueux, mé fezait la benvenue; et a 6 heuzes et un quart je mins ma bouenne casaque et mé v'la allé. J'arrive de bounne heuze a Pontac et j'attends un p'tit brin, quand né vla Mousieu David qu'arrive sus sen ch'va, la même bête qu'avait étèt l'êtravelé il yia quique tems dans la vaze du croquet; et ben je pensi ch'tennima la est dagegeux pour rencontré le Mazais à la Cocq, car si va s'envazé dans le creux de la fontaine y n'en r'sortiza pon, mais Mousieu David pensi ben a chonna et sescendant de ch'va y donne un sou a un garson pour tenin s'ennima. - Je m'appréche de li et mettant la main a m'en chapé j'lis dis, "Mousieu, je d'meuze a un p'tit pus de trais cars de mil de la ligne, mais comme je sommes des paisqueurs touos les deux j'ai penset que j'veindrais tout d'même." Y me dis, "Si ou zêtes décidet de me souestenin y nia pas de soin qu'ou d'meuzêtes à Niermont ou a l'Etat de St.-Ouen, chest tréjous la même chôze." Et ben, qué j'dis, "j'voudrais ben vos souestenin sou zêtes raisongniable, mais y pazaît que quand Messe Piquéringue, quest un angliais, abattit huit bouéchellies ou fûtes ben content de paisqui un macqsé d'argent! et pis qu quemin de fé de l'Est, qui n'a pas besoin des trés bouéchellies qui restent, ou d'mandez un sautmon et chonna me pazaît drôle." - "Ne pâlons pas d'chonna s'dit Mousieu De Quetteville, pâlons pustôt d'la terre." "J'estait justement arrivet a chu point la," que j'ly dis, "quand ou m'avais corrompu. - Y pazaît qué quant ou zézès le macqsé et le sautmon ou voudraites ouquo qué le quemin de l'Est vos donnent le Mazais a la Cocq pour les faize nagi d'dans, mais s'ou zavaites tout chonna quêque les zautres ézaient? - J'ai droit au Mazais à la Cocq pour pêqui des sansues, et j'voudrais ben avé quique chose pour chu privilège là. - Lad'sus, Mousieu David m'esrgarde de travers et me dit "Ou d'meuzès trop lien de la ligne pour être de la réugnion et ou f'zès mus de vos en allé siès vous." Sus chonna y me touenne le dos, allume sa sigarre et p'tune comme un possédet, - j'massiés sus la muzaille a fumé ma pipe pour vais quest qui s'nallai s'passé et j'restîmes là deux heuzes chinq minutes Mousieu David et mé, mais ni le Mazais a la Cocq ni la Qu'meune de Guorret n'arrivize a Pontac et Mousieu David, enièt d'attendre, monte sus s'en ch'va et la fache en o-rage, cache du bord de Rocqubert et la réugnion fut finie.

Je sis, Mousieu, avec tout le respé qué j'vos dait,
Un Paisqueux

10/8/1872
 

Viyiz étout:

 

Les Pages Jèrriaises