Les Pages Jèrriaises

L'astrologie en Jèrriais

Les sîngnes du zodiaque

 

Capricorn

Lé Capricône

lé vîngt-deuxième dé Dézembre au vîntchième d'Janvyi

 

 

Lé jour chanceux:

Sanmdi

Les neunméthos chanceurs:

huit

La pièrre d'naîssance:

lé grénat

La couleu:

vèrt et brun

Les dangièrs:

les s'grets et la r'venge

 

Les capricônes sont résèrvés, prudents, pâcients, malîns et dêtèrminnés. I' chèrchent la sécurité et i' sont ambitieurs. Il' ont un grand d'si pouor lé succès, les sou, la position, l'autorité et l'amour.

I' veulent lé pouvé et i' sont assèz organisés pouor l'aver. I' connaîssent la valeu du temps et savent comment attendre lé bouan moment. Tout veint à tchi sait attendre - sustout ès capricônes.

Les capricônes peuvent semblier mélancholiques et sévèthes, mais i' sont sympathiques et, ouaithe qu'i' n'montrent pon lus passion, chutte passion existe en véthité.

Les capricônes possèdent un grand sens d'heunmeu. Ch'na né s'montre qu'rarement, mais peut arriver ès moments innattendus,

Les capricônes sont souongneurs d'lus sou et i' sont întelligents auve lus învestissements. I' r'chèrchent et prépathent lus affaithes.

Parfais, les capricônes s'mathient pouor les sou et pouor la prestige. Dans un mathiage, ch'est lé capricône tchi dominne.

Mais i' faut admett' qu'les capricônes sont louoyaux et i' protègent les cheins qu'il' aiment. I' n'les abandonn'nont janmais.

L's os et les g'nouors sont souos l'sîngne du Capricône. Les capricônes peuvent êt' afflyigis par les rhonmatîsses.

 

 

Les Pages Jèrriaises