Les Pages Jèrriaises

L'astrologie en Jèrriais

Les sîngnes du zodiaque

 

Libra

La Balanche

lé vîngt-quatrième d'Septembre au vîngt-traîsième d'Octobre

 

 

Lé jour chanceux:

Vendrédi

Les neunméthos chanceurs:

six et neu

La pièrre d'naîssance:

l'opale

La couleu:

bliu

Les dangièrs:

l'îndécision, lé désappointement et la dêlouoyaûté

 

 

Les balanches sont charmantes, actives, artistiques, enduthantes, paîsibl'yes, diplomatiques. Il' aiment la bieauté et l'harmonie et les situâtions sociales.

Les balanches sont d'bouans anmîns: i' sont charmantes et i' savent comment encouothager la convèrsation et l's opinnions ès aut's. Il' aiment êcouter chein qu'les aut's veulent dithe.

Les balanches admithent la bieauté et l'êlégance dans la musique, dans l'art, dans la dêcorâtion et dans les gens. Les balanches n'considéthent qu'la cotchiéthe des choses, des situâtions et des gens: i' n'chèrchent pon à trouver chein qu'i' y'a driéthe chutte cotchiéthe. Les balanches n'sont pon profondes, mais il' acceptent l's aut's gens bein librément, et don i' font d'excellents parchounniéthes - dans l'amour et dans l's affaithes.

I' chèrchent l'êtchilibre et l'harmonie et lus d'si est l'ordre et l'calme. Les balanches vaient châque côté d'un ardgument et peuvent semblier un mio îndécises. Prendre eune décision peut êt' un problième pouor les balanches et i' peuvent êt' pustôt têtouongnes.

Les balanches sont idéalistes, optimistes, sentimentales et romantiques: il' aiment pliaîsi les gens, mais n'aiment pon travailli dû, et i' n's'întéthessent pon trop ès sou nitout.

Les fêsses et les reins sont souos l'sîngne d'la Balanche. Les balanches peuvent êt' afflyigies par lé mal ès reins.

 

 

 

Les Pages Jèrriaises