Les sîngnes du zodiaque
Aries
Lé B'lîn
lé vîngt'tch'ieunième d'Mar au vîntchième d'Avri
|
Lé jour chanceux: |
Mardi |
|
Les neunméthos chanceurs: |
ieune et neu |
|
La pièrre d'naîssance: |
lé diamant |
|
La couleu: |
rouoge |
|
Les dangièrs: |
lé feu, l's ôtis aîdgus et la vitesse |
Les b'lîns montre l'activité et l'ênèrgie, et peuvent êt' optimistes et înmpulsifs. I' sont dynnamiques, activistes et couothageurs.
Il' aiment pâler et i' peut êt' împossibl'ye d'les empêchi d'raconter lus opinnions.
Les b'lîns sont des leaders: confidents, îndépendants et tchi savent ristchi et siéthe lus rêves. Mais il' ont la réputâtion d'laîssi înfinni chein tch'il' ont c'menchi. I' sont aîsiment enn'yés.
Les b'lîns sont honnêtes: i' n'peuvent pon bein menti. Lus problième est qu'i' peuvent pon agi diplomatiquement: i' disent chein tch'i veulent dithe hardi directement.
Les b'lîns sont chanceurs auve les sou, mais les sou lus brûlent la pouchette.
La tête est souos l'sîngne du B'lîn, et les b'lîns peuvent êt' afflyigis du ma d'tête.