Le Chef ayant té bain embarrassé à ches dernyi ch'est mé qu'a 'té envié dans la campagne ès difféthents Shows d'Boeus, pour faithe un rapport de tout chein qu'i' s'y passait.
Quand nou m'donne une job comme chenna, j'aime à la faithe comme i' faut, ch'est pourtchi ou comprendrez bain que ch'n'est pas bain pliaisant pour mé, quand j'lièt la gâzette le jour d'opprès pour vaie l'rêsultat de man travas, de dêcouvri que l'Chef a passé san blu crayon à travers d'la maintchi de mes pus belles phrases, et changi l'aute maintchi à un tel dégrèt que je ne r'connais pus l'êfant d'ma plume.
Ch'est bain dêcouothageant pour un journaliste, chenna.
Et pis ch'est mé qu'en a toutes les bliaûmes!
J'ai tréjous voulu donner une liste complète de touos les messieux que j'viyais alentou du ring, et je m'gardais bain d'en mantchi un seul, a seule fin de n'causer pas d'jalousie, mais quand man rapport pathaissait dans la gâzette, ch'tait tchiquechose comme chennechin, "Parmi les assistants nous avons remarqué le Connétable de Tourlaville, le Centenier Pince-voyou, Mons. Double-Melle, Mons. Jean Bringe-Poil, Mons. Francois Grattepid et autres."
"Et autres." V'là justment l'expression qui fait les gens mârri. I' n'aiment pas à être classés parmi les "autres."
I' r'gardent chenna comme une insulte, et pis la premié feis qu'i' m'rencontrent, i' s'mettent à m'chanter ma, à mé!
Tch'est qu'chenna veur dithe Caouain? Je sis-t-i' tchan mé? Je n'tais pas au Show don, mé? Je t'pâli pour pus d'une démieuthe et j'aithais creu au mains que man nom aithait 'té sus la gâzette. Tch'est qui fait qu'ou prenez la peine de mentionner Tom Doublymelle, un individu d'rain du tout, qui n'est pas pus d'quarante quartchers au rât? Et pis mé, un ex-Surveillant, qui paie fonci dans trais difféthentes pâraisses, je n'sis que tout simpliement un "autre!"
"Ah, dame!" je dis au Moussieu qui m'astitchi comme chenna, "alez vos dêmêler avec le Chef! Ch'est li qu'a briochi man rapport. J'avais nommé tout l'monde me, jusqu'ès domestiques qu'étaient à bringi la câsaque ès boeus, et même le waîteur qu'aidgi à servi l'lunch. Ch'est pourtchi, ne m'bliâmez pas, j'ai fait d'man mus, et v'là chein qu'j'en ai. S'ous avez des pliaintes, allez trouver l'Boss à la boutique!"
Viyiz étout: