'Pas grand sorté d'temps pour les siens en train d'faithe du fain,' jé m'fis au Ph'lip Desclios qui 'tait a r'garder son bétchêt qu'il avait toupiné y'a huit jours quand i' faisait bé, mais qué l'mauvais temps l'a empêchi d'touchi dépis,' si l'temps né s'ramende pas ton fain s'en va pouarri, et tchi djablye qu't'erras à dounner à dounner à tes bêtes ch't hivé?
Estch'qué, d'vant dé l' fauchi, tu n'errais pas deu dounner eun coup d'telephone à l'office du Met, lus d'mander si l'temps s'n'aller countinuer bé ou si j'allaîmes aver d'la plyie?'
'Pour tchi qu'tu m' prends?' s'fit l'Ph'lip assez rupêment, 'bein seux j'lus telephoni, et i'm' ditent qué p'têt' qué j'erraimes eunne faillie p'tite achie, mais pas assez pour faithe dé ma, et qu'autrément j'allaîmes aver du biau temps pour au mains eunne sémaine. Et lé v'là, dépuis qué j'fauchis, i'n'a fait qué d'tchaie d'la plyie et j'n'avouns pas veu eun quart d'heure dé solé. Et ches gâs là, i' prétendent qu'i' s'y r'counnaisant!'
'Hélas, mon Ph'lip', j'lis dis,' vai-tu, ches gâs là chest des experts, et l's experts, eh bein, tu sai bein tchiqu'j'en crai. Prends par exemplye la fèrme d's'Etâts ichein à la Trini'té. N'ya pas a r'dithe, i' fount achteu dé raidde bouan travas, et j'soummes bein heureux dé pouver joui d'lus expéthience et d'lus expèrtise. Mais tu t' rappelles qué quand i' s' mînent sus pid y'a eunne souassantaine d'années les bêtises qu'i' faisaient ch'tait à faithe rithe. I' s' n'allaient nos mountrer coumment fèrmer. Eh bein, lus premiéthe année i' fîtent du fain dans l'clios le loung d'la grand'route. Et d'même touas les fèrmiérs qui passaient ergardaient vaie tchi qu'i' s'passait là. En êffet, i' fauchîtent lus fain, qui 'tait en buoan'état, et i'l' fagottîtent - à la main couamme nou faisait dans chu temps là. Mais té et mé, qui soummes dé viérs fèrmiérs, j'savouns bein qu'en coup fagotté le fain dé être rentré aussi tôt possiblye, car si, fagotté, i'reste dans l'clios et qu'i' fait d'la plyie chest presqu' împossiblye dé l' sitchi.
'Mais ches experts, i' savaient mus qu'nous à la piètche de l' rentrer tout d'suite i' s'en fùtent - jé n'sai pas iou, p'têt' en vacance- et laisaitent le fain là dans l'clios. Bein seux, l'temps changit, i' tchit d'la plyie pour tchinz jours, et lus fain finit par pouarri. L'auberge à Jack Jordan, abbatue d'pis, 'tait au pid du clios, et quand les férmiérs en dèhallaient i' r'gardaient l'fain qui pouarrissait. Eh bein, mon Ph'lip, inutile dé t'dithe, à té, chein qu'i' disaient dé ches souo-disants experts'.
'Ah', s'fit l'Ph'lip, 'té v'là coumme d'amors à dênigrer les experts! Mais dis mé, té, estch'qué tu n'es pas expert té même? T'es expert, à chein qu'nou'm'dit, au sujet du Japoun et d'touas les pays dé par-là. I'm semblye drôle qué té, expert té-même, tu traites les experts coumme des happes-la-leune et des vaureins. Coumment qu'v'là tchi s'fait?'
'Mais', j'lis rèpounnis, chest justément parc'qué j'sis mé même expert qué counnais la valeur. Bah, mon garçoun, coumme expert jai fait pus d'bêtises qu'eun cat n'a d' puches. Vai-tu, dans chu mounde chest par faithe des bêtises qué nou's'dêhalle. En chinquante, quand j'tais Chef dé l'Office à l'Ambassade à Tokyo j'tais réspounsablye, parmi bein d'aut' choses, pour la securité dé l' ambassade, et à Loundres i'n'taient pas dutout countents d'la manièthe qué j'm'y prîns, et i'm' ditent d'aver à rentrer à Loundres m'explytchi. J'tais acquo tout janne et sans grand' expéthience, et j'coumptais qu'i' s'n' allaient mé mett' à la porte. Pas du tout: quand j'êumes distchuté l'affaithe i'm' dîtent: 'Eh bein, je n' soummes pas d'accord, nous et té, et i' nos semble qu'en affaithe dé securité tu t'y'es prîns hardi mal, et d'même j'allouns t'noummer Chef du Departément dé Securité, en chèrge du Foreign Office, et d'toutes les ambassades et
touas les counsulats britanniques partout l'mounde'. J'allous vaie coumment qu't'as t'en dêpiautchi'. Mais, vai-tu, mon Ph'lip, si jé ni' 'tais coumportê à Tokyo s'loun les règles, si j'avais soigni dé tout faithe au gré d'Loundres, si j' n'avais pas fait d' bêtises, i'n'se s'raient pas otchupés d'mé et j'n'éthais jamais ieu eun poste si respounsablye qué Chef dé Securité.
'Lé v'là, mon Ph'lip, n'ya pas a r'dithe: chest nos bêtises qui nos fount experts'.
Viyiz étout: