A Jêrry
|
Jêrry, tu m'ensorcheules, j pense; Je sairais pu chèntaïr que d'té; Emaclli d'men cabil immense, Ch'est brâment cîz té qu'je m'ragence, Pour me r'fourniaïr d'bel et d'nouvé. A quànd j'renter dans ma cahutte, Ma femme, au bord d l u du grànd u, C'menche à l'heure à sounnaïr d'sa flute: "Goton," s't-alle, "apporte la jutte, Ma fé, je n'le r'counnissais pu." L'perchain mot qui sort d'sa p'tit' goule: "Là! tu-as rajanni d'pus d'dix àns; Té qui n'avais pouit l'cueur d'un' poule, Qu'errais coum un lapin sàns houle, Tu r'ès neuf et des mûx portànts." "Ola," s't-alle, "i fait bel y coure En Jêrry pour êter r'fondu; Ch'est doummage adret qu'nou n't'y fourre A fin-à-fait pour qu'tu t'y r'bourre Pllain coum un oeu tout frais pounu." "Vère assaïz," j'li dis, "ma dernette, Mais tu n'y counnis rien du 'tout; Jêrry n'est miette en tout pus nette De malsàntaï qu'sa soeut cadette, Ch'est le p'tit l'chàng'ment qui fait tout." "Tu sais qu'la souaris vite est prinse Qui n'a qu'un pertu pour s'fourraïr; Et pour restaïr sain dans sa k'minse Nou f'rait une adret grànd' méprinse Dans sen couain d'âter d's'enfrumaïr." "Si j'échàngeais l'chier peys d'l'âne Pour le biau peys du crapaud, Cré-tu qu'en piâsànt sen pas-d'âne, Bien moins dur en d'viendrait men crane, Ou qu'mé-mime en s'rais moins badaud." "Et pis, cré-tu donc qu'pour me cueure La mort ne s'persent'rait jamais; Ou voudrais-tu t'faire adret seure Que v'là qu'en r'targerait tànt l'heure Qu'nou n'verrait pu que j'vieillirais?" "En Jèrry si j'faisais ma d'meure, Dans p'tit d'temps - n'faut miette en doutaïr - En Guernesy, chose adret seure, La sàntaï, brâment, j'irais cueure, Ou, du moins, j crérais l'y trouvaïr." "La créyànce est, palafràndine, Chu qui terjoûs fait bien pu d'bien Qu'tous les docteurs et leus médchine, Qui n'est souvent que d'la puâzine Respet d'l'hounneur, et n'sert de rien." "Ma garce, j'n'ai pouit la berlue, Ni ch'n'est pouit d'aniet que j'sis naï: Ch'est l'enni, pouit l'peys qui tue, Qui baïlle ès gens la margalue: L'travas, l'écan font la sàntaï." "Le d'sir de vivre," a dit l'vier pouète, "Rallouagne adret la vie étou": Mais, v'la qui f'ra. Jêrry, d'alouette Si j'avais l'aïlle et la lichouette, J'irais t'chàntaïr ma p'tit' sornette Tous les matins, quanté l'coucou. L'Rimeux d'La Fouaret |