Bain du monde, ichin en Jèrri, en liaisant dans les Chroniques, le compte-rendu de tout l'train qui fut fait l'smaine passée par sus le bouonhomme Wace, et au sujet d'la visite des professeurs Normands qui sont v'nus faithe une Conférence dans notre île, ont 'té diversement étonnés de vaie qu'i' n'fut pas du tout tchestion du “Caouain,” le pus illustre poète, et l'pus grand écriveux d'Jerriais que l'île ait jamais produit. Certains ont exprimé l'opinion qu'il aithait deu, dans toutes ches cérémonies à la Cour Royales et à touos les fricots dans difféthentes partis de l'île, aussi bain comme ès baintchèts à l'Hôtel de l'Europe, aver otchupé une pliaiche d'honneur à côté du Bailli, et une grande partie du public est bain indignie de penser que l'pouore “Caouain” n'a seulement pas ieu l'honneur d'être présenté à Messieux Pilou, Prentout, Bridrey, Genestal et touos l's autres Messieux qu'ont honoré l'île de lus visite, et i'y en a hardi qui n'hésitent pas d'affirmer que l's autorités ont sérieusement mantchi dans lus d'ver.
Quant à mé, je n'me plains pas.
Il est vrai que ch'aithait 'té pour mé un grand honneur d'être présente à nos illustres visiteurs, quoique je crai bain que j'aithais 'té prêt à mouothi d'énervement, en m'trouvant en contact avec des savants de chu calibre-là.
Quant à ieux, i' n'ont pas mantchi grand'chose.
Tout ch'qu'i' y' a, ch'est qu'une feis rentrées siez-ieux ils aithaient peu dithe à lus collègues et à lus amins, qu'ils avaient rencontré l' “Caouain,” – une tchuthiosité d'pus, v'là tout!
Mais, que ches bouannes gens-là ne lus en affligent pas.
Che qu'nou lus a supprimé chute feis a 'té tout simplyément rêservé pour lus d'cendants du temps à v'nîn, ch'est-à-dithe, dans sept ou huit cents and d'ichin.
Les Angliais ont un vier dicton qui dit que, “l'Histouaithe se répète.”
Eh bain, s'il a fallu neuf chents ans pour dêcouvri et procliâmer la r'nommée de Maitre Wace, et immortaliser san nom sus l'granit de s'n île natale, tchi période qui faudra qui s'êcoule devant qu'nous en faiche autant pour le “Caouain” des Chroniques de Jèrri?
Car bain seux qu'nou f'tha tchiquechose dans tchique temps.
Dans l'couothant du trentième siècl'ye, peut-être, un d'cendant bain êloigni de notre estimé Vicomte d'acheteu, Moussieu Nicolle, en futhetant parmi des vieilles paperasses dans l'Musée d'la Société Jerriaises ou dans la Bibliothèque Publique, trouvetha tchiques numéthos des “Chroniques de Jersey” et attithé par l'effigie du vilain ouaisé qui s'trouve à la tête de ch't articlye ichin, f'tha la dêcouverte qu'il existait au vingtième sièclye un individu qui s'appelait “Caouain,” qu'êcrivait en Jerriais pour les gâzetters et qui faisait d'la poësie pour les Almonas.
Tch'est qui s'arrivetha?
Les antitchaithes de ces temps-là trouvethont rain d'pus convenablye que d'li graver une pierre à côté d'la sienne à Maitre Wace, i' y a du run tout pliain, - avec une inscription tchiquechose comme chennechin:-
|
Ecrivain et Poëte, qui vêtchu en Jèrri au vingtième sièclye. “Si nou vos d'mande en autchun temps Tch'est qui, la S'maine du Drouait Normand, Ne pathu pas parmi les grands Ou pouvez dithe que ch'tait l'Caouain.” |
Le Bailli d'ches temps-là, en hallant sis la ficelle, f'tha un discours d'occasion et i' pouorrait dithe, comme le nôtre l'aut'e jour, que ses traits n'étaient pas connus ni autchun récord qu'il portait un autre nom.
I' ditha enfin, tout ch'qu'i' voudra.
Mais i' y a une chose sus tchi qu'i' faut qu'j'insiste.
Pour contrebalanchi la fâcheuse omission des autres jours, quand nos illustres vaisins furent laissis les en r'aller sans aver veu l' “Caouain,” je veurs absolument que les Genestal, les Bridrey, les Pilon et les Prentout de chute période-là, saient spécialement invités d'assister à la cérémonie.
Ch'est pourtchi, Messieux les futurs insulaires, pensez-y!
Caouain
Les Chroniques de Jersey 2/6/1923
Viyiz étout: