Les Pages Jèrriaises

Lé Monûment-Wace.


Mousieu l'Editeu, jé vé ov' pliaisi
Qué lé "Vièr Rèmeux" est tout en afi,
A cèll'-fin d'êl'vé un bieau monûment
Pour coumémoyré la mémouèr' dign'ment
Du célèbr' Maît' Wac' "de l'isl' de Jersui,"
Et d'touos nos rèmeurs lé pus distindghi.
- Quèqu' j'sais êloigni du bèr d'ma naissanc',
M'n-amour pour Jerri n'est pas en d'faillanc' ;
Nan, si ch'tait à là i 'rdoubl' mêm', mon-doux :
Pus zêlè qu'jeanmais, jé s'rais bain jaloux
Si not' "Vièr Rèmeux" v'nait san tout fin-soeu
Proposé eun' chos' qué j'ai tant à tchoeu

Dé vès atchili' par tout bouan Jerriais
Qui pris' lé poèt' qu'aimait san patouais.
- A Maît' Bouanne Epaul' j'veur hè-tout d'mandé, -
Lé priyé, s'i l'faut, d'pousé, sans truncé ;
Bieaucoup rêpondront à s'n-apel, jé crai, -
Mai, pour lé prumi, n's'rai pon l'drain, dé-vrai
- Vous, dé vot' côtè, Mousieu l'Editeu,
Engagis châtchun à v'nin d'un grand tchoeu
Pour faire un autre act' dé vrai patriot'
En versant des sous - mais pas dé main mort' -
A cèll'-fin d'êl'vé à Maît' Wac' tchiqu'chos'
En pièr' bain pitchi' qui piès' duré paus'.
J'ai l'honneu
D'êt', Mousieu
L'Editeu,

J.D.R.
Londres, chu 13 Janvi 1864.

 

Viyiz étout:

 

Les Pages Jèrriaises