1.

Que vais-j' donc là, dans chu puté ruôlé,-
Trilli en piech's, et par pierr's achouêmé?
Pas un' côte, i' m' sembl', qui n' sait dépitchie, -
Les ziers crévés, et la tête émaglie? -
Oh, bah! Che n'est qu'un Rat!

2.

Rat tué! - v'lo, que chla m'rappell' temps jadis
Quand homm's-bêt's, prêtr's ou autr's, quiaient sus Juifs
Et, dam' les "arrangeaient!" - Mais sus ieux s'ruaient
Qu'homm's-brut's! - Homme et Brut' Juifs n'avaient
Pour tueurs, coumme a le Rat!

3.

Puôr' Maudit! - Coumm' sa ptiot' cuôsin' Suoris,
Contre li - Homme, Avé - sont réunis -
Furet, Cat, Chan - qui sait? - I' n'a qu'en'min!....
Ah, n' est-i' pas à pliaindr', mon Dieu bénin?
Li, que Tuas fait, - chu Rat!

4.

Vivant, sa pus grand' pensée est d'grugi;
Mort, fins palais n'en veul'nt mêm' pour mangi:
I' n'sert à rein! - Mais, êch' sa faute? - Ah, sa trist' couée
N'eut jamais voix avant que d'êtr' crée....
Qu' airait voulu êtr' Rat?

5.

Tout d'mêm'! je voudrais crair' que Tout est bein.
Que d'pis l'Etelle au Rat rein n'est en vain.
Que Tout a, pour Bon de Tous, Destinée -
Donc, p't'-être un jour - j'ai chla dans men idée -
Nou' saira chell' du Rat!

6.

Pitchi, donc! dans l' ent'-temps, pour le puôr' Rat!
Mangis-le coumm' gibi si chla vos va, -
Mais, pas d'massacrérie! - Songis qu'en faire,
Si s'peut, pour Bein Commun; et t'nez mémouaire
Qui fit Homme a fait Rat.

7.

Tuer que pour tuer suoill' l'âme! - Ah, chest bruta'!
Et chest meurtr' que d'tuer sans cause anima'.
Ainchin donc, - tréjous - au risq' de ris'lée -
Mé - j'f'rai c'que j'peux pour tout' rac' pourchassée, -
Et pliaindrai - même un Rat!

L.
12 Déc. 1867.